15 shlokas
- 1
नारद उवाच
आविष्कृतबलं कर्णं ज्ञात्वा राजा तु मागधः
आह्वयद्द्वैरथेनाजौ जरासंधो महीपतिः
nārada uvāca
āviṣkṛtabalaṃ karṇaṃ jñātvā rājā tu māgadhaḥ
āhvayaddvairathenājau jarāsaṃdho mahīpatiḥ
- 2
तयोः समभवद्युद्धं दिव्यास्त्रविदुषोर्द्वयोः
युधि नानाप्रहरणैर् अन्योन्यम् अभिवर्षतोः
tayoḥ samabhavadyuddhaṃ divyāstraviduṣordvayoḥ
yudhi nānāpraharaṇair anyonyam abhivarṣatoḥ
- 3
क्षीणबाणौ विधनुषौ भग्नखड्गौ महीं गतौ
बाहुभिः समसज्जेताम् उभावपि बलान्वितौ
kṣīṇabāṇau vidhanuṣau bhagnakhaḍgau mahīṃ gatau
bāhubhiḥ samasajjetām ubhāvapi balānvitau
- 4
बाहुकण्टकयुद्धेन तस्य कर्णो ऽथ युध्यतः
बिभेद संधिं देहस्य जरया श्लेषितस्य ह
bāhukaṇṭakayuddhena tasya karṇo 'tha yudhyataḥ
bibheda saṃdhiṃ dehasya jarayā śleṣitasya ha
- 5
स विकारं शरीरस्य दृष्ट्वा नृपतिर् आत्मनः
प्रीतो ऽस्मीत्यब्रवीत्कर्णं वैरम् उत्सृज्य भारत
sa vikāraṃ śarīrasya dṛṣṭvā nṛpatir ātmanaḥ
prīto 'smītyabravītkarṇaṃ vairam utsṛjya bhārata
- 6
प्रीत्या ददौ स कर्णाय मालिनीं नगरीम् अथ
अङ्गेषु नरशार्दूल स राजासीत्सपत्नजित्
prītyā dadau sa karṇāya mālinīṃ nagarīm atha
aṅgeṣu naraśārdūla sa rājāsītsapatnajit
- 7
पालयामास चम्पां तु कर्णः परबलार्दनः
दुर्योधनस्यानुमते तवापि विदितं तथा
pālayāmāsa campāṃ tu karṇaḥ parabalārdanaḥ
duryodhanasyānumate tavāpi viditaṃ tathā
- 8
एवं शस्त्रप्रतापेन प्रथितः सो ऽभवत्क्षितौ
त्वद्धितार्थं सुरेन्द्रेण भिक्षितो वर्मकुण्डले
evaṃ śastrapratāpena prathitaḥ so 'bhavatkṣitau
tvaddhitārthaṃ surendreṇa bhikṣito varmakuṇḍale
- 9
स दिव्ये सहजे प्रादात्कुण्डले परमार्चिते
सहजं कवचं चैव मोहितो देवमायया
sa divye sahaje prādātkuṇḍale paramārcite
sahajaṃ kavacaṃ caiva mohito devamāyayā
- 10
विमुक्तः कुण्डलाभ्यां च सहजेन च वर्मणा
निहतो विजयेनाजौ वासुदेवस्य पश्यतः
vimuktaḥ kuṇḍalābhyāṃ ca sahajena ca varmaṇā
nihato vijayenājau vāsudevasya paśyataḥ
- 11
ब्राह्मणस्याभिशापेन रामस्य च महात्मनः
कुन्त्याश्च वरदानेन मायया च शतक्रतोः
brāhmaṇasyābhiśāpena rāmasya ca mahātmanaḥ
kuntyāśca varadānena māyayā ca śatakratoḥ
- 12
भीष्मावमानात्संख्यायां रथानाम् अर्धकीर्तनात्
शल्यात्तेजोवधाच्चापि वासुदेवनयेन च
bhīṣmāvamānātsaṃkhyāyāṃ rathānām ardhakīrtanāt
śalyāttejovadhāccāpi vāsudevanayena ca
- 13
रुद्रस्य देवराजस्य यमस्य वरुणस्य च
कुबेरद्रोणयोश्चैव कृपस्य च महात्मनः
rudrasya devarājasya yamasya varuṇasya ca
kuberadroṇayoścaiva kṛpasya ca mahātmanaḥ
- 14
अस्त्राणि दिव्यान्यादाय युधि गाण्डीवधन्वना
हतो वैकर्तनः कर्णो दिवाकरसमद्युतिः
astrāṇi divyānyādāya yudhi gāṇḍīvadhanvanā
hato vaikartanaḥ karṇo divākarasamadyutiḥ
- 15
एवं शप्तस्तव भ्राता बहुभिश्चापि वञ्चितः
न शोच्यः स नरव्याघ्रो युद्धे हि निधनं गतः
evaṃ śaptastava bhrātā bahubhiścāpi vañcitaḥ
na śocyaḥ sa naravyāghro yuddhe hi nidhanaṃ gataḥ

