13 shlokas
- 1
भीष्म उवाच
स वनानि विचित्राणि तीर्थानि च सरांसि च
अभिगच्छन्क्रमेण स्म कंचिन्मुनिम् उपस्थितः
bhīṣma uvāca
sa vanāni vicitrāṇi tīrthāni ca sarāṃsi ca
abhigacchankrameṇa sma kaṃcinmunim upasthitaḥ
- 2
तं स तेन यथोद्दिष्टं नागं विप्रेण ब्राह्मणः
पर्यपृच्छद्यथान्यायं श्रुत्वैव च जगाम सः
taṃ sa tena yathoddiṣṭaṃ nāgaṃ vipreṇa brāhmaṇaḥ
paryapṛcchadyathānyāyaṃ śrutvaiva ca jagāma saḥ
- 3
सो ऽभिगम्य यथाख्यातं नागायतनम् अर्थवित्
प्रोक्तवान् अहम् अस्मीति भोःशब्दालंकृतं वचः
so 'bhigamya yathākhyātaṃ nāgāyatanam arthavit
proktavān aham asmīti bhoḥśabdālaṃkṛtaṃ vacaḥ
- 4
ततस्तस्य वचः श्रुत्वा रूपिणी धर्मवत्सला
दर्शयामास तं विप्रं नागपत्नी पतिव्रता
tatastasya vacaḥ śrutvā rūpiṇī dharmavatsalā
darśayāmāsa taṃ vipraṃ nāgapatnī pativratā
- 5
सा तस्मै विधिवत्पूजां चक्रे धर्मपरायणा
स्वागतेनागतं कृत्वा किं करोमीति चाब्रवीत्
sā tasmai vidhivatpūjāṃ cakre dharmaparāyaṇā
svāgatenāgataṃ kṛtvā kiṃ karomīti cābravīt
- 6
ब्राह्मण उवाच
विश्रान्तो ऽभ्यर्चितश्चास्मि भवत्या श्लक्ष्णया गिरा
द्रष्टुम् इच्छामि भवति तं देवं नागम् उत्तमम्
brāhmaṇa uvāca
viśrānto 'bhyarcitaścāsmi bhavatyā ślakṣṇayā girā
draṣṭum icchāmi bhavati taṃ devaṃ nāgam uttamam
- 7
एतद्धि परमं कार्यम् एतन्मे फलम् ईप्सितम्
अनेनार्थेन चास्म्यद्य सम्प्राप्तः पन्नगालयम्
etaddhi paramaṃ kāryam etanme phalam īpsitam
anenārthena cāsmyadya samprāptaḥ pannagālayam
- 8
नागभार्योवाच
आर्य सूर्यरथं वोढुं गतो ऽसौ मासचारिकः
सप्ताष्टभिर्दिनैर्विप्र दर्शयिष्यत्यसंशयम्
nāgabhāryovāca
ārya sūryarathaṃ voḍhuṃ gato 'sau māsacārikaḥ
saptāṣṭabhirdinairvipra darśayiṣyatyasaṃśayam
- 9
एतद्विदितम् आर्यस्य विवासकरणं मम
भर्तुर्भवतु किं चान्यत्क्रियतां तद्वदस्व मे
etadviditam āryasya vivāsakaraṇaṃ mama
bharturbhavatu kiṃ cānyatkriyatāṃ tadvadasva me
- 10
ब्राह्मण उवाच
अनेन निश्चयेनाहं साध्वि सम्प्राप्तवान् इह
प्रतीक्षन्न् आगमं देवि वत्स्याम्यस्मिन्महावने
brāhmaṇa uvāca
anena niścayenāhaṃ sādhvi samprāptavān iha
pratīkṣann āgamaṃ devi vatsyāmyasminmahāvane
- 11
सम्प्राप्तस्यैव चाव्यग्रम् आवेद्यो ऽहम् इहागतः
ममाभिगमनं प्राप्तो वाच्यश्च वचनं त्वया
samprāptasyaiva cāvyagram āvedyo 'ham ihāgataḥ
mamābhigamanaṃ prāpto vācyaśca vacanaṃ tvayā
- 12
अहम् अप्यत्र वत्स्यामि गोमत्याः पुलिने शुभे
कालं परिमिताहारो यथोक्तं परिपालयन्
aham apyatra vatsyāmi gomatyāḥ puline śubhe
kālaṃ parimitāhāro yathoktaṃ paripālayan
- 13
भीष्म उवाच
ततः स विप्रस्तां नागीं समाधाय पुनः पुनः
तद् एव पुलिनं नद्याः प्रययौ ब्राह्मणर्षभः
bhīṣma uvāca
tataḥ sa viprastāṃ nāgīṃ samādhāya punaḥ punaḥ
tad eva pulinaṃ nadyāḥ prayayau brāhmaṇarṣabhaḥ

