15 shlokas
- 1
वैशंपायन उवाच
ततः स च हृषीकेशः स च राजा युधिष्ठिरः
कृपादयश्च ते सर्वे चत्वारः पाण्डवाश्च ह
vaiśaṃpāyana uvāca
tataḥ sa ca hṛṣīkeśaḥ sa ca rājā yudhiṣṭhiraḥ
kṛpādayaśca te sarve catvāraḥ pāṇḍavāśca ha
- 2
रथैस्ते नगराकारैः पताकाध्वजशोभितैः
ययुर् आशु कुरुक्षेत्रं वाजिभिः शीघ्रगामिभिः
rathaiste nagarākāraiḥ patākādhvajaśobhitaiḥ
yayur āśu kurukṣetraṃ vājibhiḥ śīghragāmibhiḥ
- 3
ते ऽवतीर्य कुरुक्षेत्रं केशमज्जास्थिसंकुलम्
देहन्यासः कृतो यत्र क्षत्रियैस्तैर्महात्मभिः
te 'vatīrya kurukṣetraṃ keśamajjāsthisaṃkulam
dehanyāsaḥ kṛto yatra kṣatriyaistairmahātmabhiḥ
- 4
गजाश्वदेहास्थिचयैः पर्वतैर् इव संचितम्
नरशीर्षकपालैश्च शङ्खैर् इव समाचितम्
gajāśvadehāsthicayaiḥ parvatair iva saṃcitam
naraśīrṣakapālaiśca śaṅkhair iva samācitam
- 5
चितासहस्रैर्निचितं वर्मशस्त्रसमाकुलम्
आपानभूमिं कालस्य तदा भुक्तोज्झिताम् इव
citāsahasrairnicitaṃ varmaśastrasamākulam
āpānabhūmiṃ kālasya tadā bhuktojjhitām iva
- 6
भूतसंघानुचरितं रक्षोगणनिषेवितम्
पश्यन्तस्ते कुरुक्षेत्रं ययुर् आशु महारथाः
bhūtasaṃghānucaritaṃ rakṣogaṇaniṣevitam
paśyantaste kurukṣetraṃ yayur āśu mahārathāḥ
- 7
गच्छन्न् एव महाबाहुः सर्वयादवनन्दनः
युधिष्ठिराय प्रोवाच जामदग्न्यस्य विक्रमम्
gacchann eva mahābāhuḥ sarvayādavanandanaḥ
yudhiṣṭhirāya provāca jāmadagnyasya vikramam
- 8
अमी रामह्रदाः पञ्च दृश्यन्ते पार्थ दूरतः
येषु संतर्पयामास पूर्वान्क्षत्रियशोणितैः
amī rāmahradāḥ pañca dṛśyante pārtha dūrataḥ
yeṣu saṃtarpayāmāsa pūrvānkṣatriyaśoṇitaiḥ
- 9
त्रिःसप्तकृत्वो वसुधां कृत्वा निःक्षत्रियां प्रभुः
इहेदानीं ततो रामः कर्मणो विरराम ह
triḥsaptakṛtvo vasudhāṃ kṛtvā niḥkṣatriyāṃ prabhuḥ
ihedānīṃ tato rāmaḥ karmaṇo virarāma ha
- 10
युधिष्ठिर उवाच
त्रिःसप्तकृत्वः पृथिवी कृता निःक्षत्रिया तदा
रामेणेति यद् आत्थ त्वम् अत्र मे संशयो महान्
yudhiṣṭhira uvāca
triḥsaptakṛtvaḥ pṛthivī kṛtā niḥkṣatriyā tadā
rāmeṇeti yad āttha tvam atra me saṃśayo mahān
- 11
क्षत्रबीजं यदा दग्धं रामेण यदुपुंगव
कथं भूयः समुत्पत्तिः क्षत्रस्यामितविक्रम
kṣatrabījaṃ yadā dagdhaṃ rāmeṇa yadupuṃgava
kathaṃ bhūyaḥ samutpattiḥ kṣatrasyāmitavikrama
- 12
महात्मना भगवता रामेण यदुपुंगव
कथम् उत्सादितं क्षत्रं कथं वृद्धिं पुनर्गतम्
mahātmanā bhagavatā rāmeṇa yadupuṃgava
katham utsāditaṃ kṣatraṃ kathaṃ vṛddhiṃ punargatam
- 13
महाभारतयुद्धे हि कोटिशः क्षत्रिया हताः
तथाभूच्च मही कीर्णा क्षत्रियैर्वदतां वर
mahābhāratayuddhe hi koṭiśaḥ kṣatriyā hatāḥ
tathābhūcca mahī kīrṇā kṣatriyairvadatāṃ vara
- 14
एवं मे छिन्द्धि वार्ष्णेय संशयं तार्क्ष्यकेतन
आगमो हि परः कृष्ण त्वत्तो नो वासवानुज
evaṃ me chinddhi vārṣṇeya saṃśayaṃ tārkṣyaketana
āgamo hi paraḥ kṛṣṇa tvatto no vāsavānuja
- 15
वैशंपायन उवाच
ततो व्रजन्न् एव गदाग्रजः प्रभुः शशंस तस्मै निखिलेन तत्त्वतः
युधिष्ठिरायाप्रतिमौजसे तदा यथाभवत्क्षत्रियसंकुला मही
vaiśaṃpāyana uvāca
tato vrajann eva gadāgrajaḥ prabhuḥ śaśaṃsa tasmai nikhilena tattvataḥ
yudhiṣṭhirāyāpratimaujase tadā yathābhavatkṣatriyasaṃkulā mahī

