12 shlokas
- 1
भीष्म उवाच
ततो गते शाकुनिके कपोती प्राह दुःखिता
संस्मृत्य भर्तारम् अथो रुदती शोकमूर्छिता
bhīṣma uvāca
tato gate śākunike kapotī prāha duḥkhitā
saṃsmṛtya bhartāram atho rudatī śokamūrchitā
- 2
नाहं ते विप्रियं कान्त कदाचिद् अपि संस्मरे
सर्वा वै विधवा नारी बहुपुत्रापि खेचर
शोच्या भवति बन्धूनां पतिहीना मनस्विनी
nāhaṃ te vipriyaṃ kānta kadācid api saṃsmare
sarvā vai vidhavā nārī bahuputrāpi khecara
śocyā bhavati bandhūnāṃ patihīnā manasvinī
- 3
लालिताहं त्वया नित्यं बहुमानाच्च सान्त्विता
वचनैर्मधुरैः स्निग्धैर् असकृत्सुमनोहरैः
lālitāhaṃ tvayā nityaṃ bahumānācca sāntvitā
vacanairmadhuraiḥ snigdhair asakṛtsumanoharaiḥ
- 4
कन्दरेषु च शैलानां नदीनां निर्झरेषु च
द्रुमाग्रेषु च रम्येषु रमिताहं त्वया प्रिय
kandareṣu ca śailānāṃ nadīnāṃ nirjhareṣu ca
drumāgreṣu ca ramyeṣu ramitāhaṃ tvayā priya
- 5
आकाशगमने चैव सुखिताहं त्वया सुखम्
विहृतास्मि त्वया कान्त तन्मे नाद्यास्ति किंचन
ākāśagamane caiva sukhitāhaṃ tvayā sukham
vihṛtāsmi tvayā kānta tanme nādyāsti kiṃcana
- 6
मितं ददाति हि पिता मितं माता मितं सुतः
अमितस्य तु दातारं भर्तारं का न पूजयेत्
mitaṃ dadāti hi pitā mitaṃ mātā mitaṃ sutaḥ
amitasya tu dātāraṃ bhartāraṃ kā na pūjayet
- 7
नास्ति भर्तृसमो नाथो न च भर्तृसमं सुखम्
विसृज्य धनसर्वस्वं भर्ता वै शरणं स्त्रियाः
nāsti bhartṛsamo nātho na ca bhartṛsamaṃ sukham
visṛjya dhanasarvasvaṃ bhartā vai śaraṇaṃ striyāḥ
- 8
न कार्यम् इह मे नाथ जीवितेन त्वया विना
पतिहीनापि का नारी सती जीवितुम् उत्सहेत्
na kāryam iha me nātha jīvitena tvayā vinā
patihīnāpi kā nārī satī jīvitum utsahet
- 9
एवं विलप्य बहुधा करुणं सा सुदुःखिता
पतिव्रता संप्रदीप्तं प्रविवेश हुताशनम्
evaṃ vilapya bahudhā karuṇaṃ sā suduḥkhitā
pativratā saṃpradīptaṃ praviveśa hutāśanam
- 10
ततश्चित्राम्बरधरं भर्तारं सान्वपश्यत
विमानस्थं सुकृतिभिः पूज्यमानं महात्मभिः
tataścitrāmbaradharaṃ bhartāraṃ sānvapaśyata
vimānasthaṃ sukṛtibhiḥ pūjyamānaṃ mahātmabhiḥ
- 11
चित्रमाल्याम्बरधरं सर्वाभरणभूषितम्
विमानशतकोटीभिर् आवृतं पुण्यकीर्तिभिः
citramālyāmbaradharaṃ sarvābharaṇabhūṣitam
vimānaśatakoṭībhir āvṛtaṃ puṇyakīrtibhiḥ
- 12
ततः स्वर्गगतः पक्षी भार्यया सह संगतः
कर्मणा पूजितस्तेन रेमे तत्र स भार्यया
tataḥ svargagataḥ pakṣī bhāryayā saha saṃgataḥ
karmaṇā pūjitastena reme tatra sa bhāryayā

