10 shlokas
- 1
भीष्म उवाच
अत्र गाथा ब्रह्मगीताः कीर्तयन्ति पुराविदः
येन मार्गेण राजानः कोशं संजनयन्ति च
bhīṣma uvāca
atra gāthā brahmagītāḥ kīrtayanti purāvidaḥ
yena mārgeṇa rājānaḥ kośaṃ saṃjanayanti ca
- 2
न धनं यज्ञशीलानां हार्यं देवस्वम् एव तत्
दस्यूनां निष्क्रियाणां च क्षत्रियो हर्तुम् अर्हति
na dhanaṃ yajñaśīlānāṃ hāryaṃ devasvam eva tat
dasyūnāṃ niṣkriyāṇāṃ ca kṣatriyo hartum arhati
- 3
इमाः प्रजाः क्षत्रियाणां रक्ष्याश्चाद्याश्च भारत
धनं हि क्षत्रियस्येह द्वितीयस्य न विद्यते
imāḥ prajāḥ kṣatriyāṇāṃ rakṣyāścādyāśca bhārata
dhanaṃ hi kṣatriyasyeha dvitīyasya na vidyate
- 4
तद् अस्य स्याद्बलार्थं वा धनं यज्ञार्थम् एव वा
अभोग्या ह्य् ओषधीश्छित्त्वा भोग्या एव पचन्त्युत
tad asya syādbalārthaṃ vā dhanaṃ yajñārtham eva vā
abhogyā hy oṣadhīśchittvā bhogyā eva pacantyuta
- 5
यो वै न देवान्न पितॄन्न मर्त्यान्हविषार्चति
आनन्तिकां तां धनिताम् आहुर्वेदविदो जनाः
yo vai na devānna pitṝnna martyānhaviṣārcati
ānantikāṃ tāṃ dhanitām āhurvedavido janāḥ
- 6
हरेत्तद्द्रविणं राजन्धार्मिकः पृथिवीपतिः
न हि तत्प्रीणयेल्लोकान्न कोशं तद्विधं नृपः
harettaddraviṇaṃ rājandhārmikaḥ pṛthivīpatiḥ
na hi tatprīṇayellokānna kośaṃ tadvidhaṃ nṛpaḥ
- 7
असाधुभ्यो निरादाय साधुभ्यो यः प्रयच्छति
आत्मानं संक्रमं कृत्वा मन्ये धर्मविद् एव सः
asādhubhyo nirādāya sādhubhyo yaḥ prayacchati
ātmānaṃ saṃkramaṃ kṛtvā manye dharmavid eva saḥ
- 8
औद्भिज्जा जन्तवः केचिद्युक्तवाचो यथा तथा
अनिष्टतः सम्भवन्ति तथायज्ञः प्रतायते
audbhijjā jantavaḥ kecidyuktavāco yathā tathā
aniṣṭataḥ sambhavanti tathāyajñaḥ pratāyate
- 9
यथैव दंशमशकं यथा चाण्डपिपीलिकम्
सैव वृत्तिर् अयज्ञेषु तथा धर्मो विधीयते
yathaiva daṃśamaśakaṃ yathā cāṇḍapipīlikam
saiva vṛttir ayajñeṣu tathā dharmo vidhīyate
- 10
यथा ह्यकस्माद्भवति भूमौ पांसुतृणोलपम्
तथैवेह भवेद्धर्मः सूक्ष्मः सूक्ष्मतरो ऽपि च
yathā hyakasmādbhavati bhūmau pāṃsutṛṇolapam
tathaiveha bhaveddharmaḥ sūkṣmaḥ sūkṣmataro 'pi ca

