6 shlokas
- 1
सूर्य उवाच
नैष देवो ऽनिलसखो नासुरो न च पन्नगः
उञ्छवृत्तिव्रते सिद्धो मुनिर् एष दिवं गतः
sūrya uvāca
naiṣa devo 'nilasakho nāsuro na ca pannagaḥ
uñchavṛttivrate siddho munir eṣa divaṃ gataḥ
- 2
एष मूलफलाहारः शीर्णपर्णाशनस्तथा
अब्भक्षो वायुभक्षश्च आसीद्विप्रः समाहितः
eṣa mūlaphalāhāraḥ śīrṇaparṇāśanastathā
abbhakṣo vāyubhakṣaśca āsīdvipraḥ samāhitaḥ
- 3
ऋचश्चानेन विप्रेण संहितान्तरभिष्टुताः
स्वर्गद्वारकृतोद्योगो येनासौ त्रिदिवं गतः
ṛcaścānena vipreṇa saṃhitāntarabhiṣṭutāḥ
svargadvārakṛtodyogo yenāsau tridivaṃ gataḥ
- 4
असन्नधीरनाकाङ्क्षी नित्यम् उञ्छशिलाशनः
सर्वभूतहिते युक्त एष विप्रो भुजंगम
asannadhīranākāṅkṣī nityam uñchaśilāśanaḥ
sarvabhūtahite yukta eṣa vipro bhujaṃgama
- 5
न हि देवा न गन्धर्वा नासुरा न च पन्नगाः
प्रभवन्तीह भूतानां प्राप्तानां परमां गतिम्
na hi devā na gandharvā nāsurā na ca pannagāḥ
prabhavantīha bhūtānāṃ prāptānāṃ paramāṃ gatim
- 6
नाग उवाच
एतद् एवंविधं दृष्टम् आश्चर्यं तत्र मे द्विज
संसिद्धो मानुषः कायो यो ऽसौ सिद्धगतिं गतः
सूर्येण सहितो ब्रह्मन्पृथिवीं परिवर्तते
nāga uvāca
etad evaṃvidhaṃ dṛṣṭam āścaryaṃ tatra me dvija
saṃsiddho mānuṣaḥ kāyo yo 'sau siddhagatiṃ gataḥ
sūryeṇa sahito brahmanpṛthivīṃ parivartate

