13 shlokas
- 1
युधिष्ठिर उवाच
गतीनाम् उत्तमा प्राप्तिः कथिता जापकेष्विह
एकैवैषा गतिस्तेषाम् उत यान्त्यपराम् अपि
yudhiṣṭhira uvāca
gatīnām uttamā prāptiḥ kathitā jāpakeṣviha
ekaivaiṣā gatisteṣām uta yāntyaparām api
- 2
भीष्म उवाच
शृणुष्वावहितो राजञ्जापकानां गतिं विभो
यथा गच्छन्ति निरयम् अनेकं पुरुषर्षभ
bhīṣma uvāca
śṛṇuṣvāvahito rājañjāpakānāṃ gatiṃ vibho
yathā gacchanti nirayam anekaṃ puruṣarṣabha
- 3
यथोक्तम् एतत्पूर्वं यो नानुतिष्ठति जापकः
एकदेशक्रियश्चात्र निरयं स निगच्छति
yathoktam etatpūrvaṃ yo nānutiṣṭhati jāpakaḥ
ekadeśakriyaścātra nirayaṃ sa nigacchati
- 4
अवज्ञानेन कुरुते न तुष्यति न शोचति
ईदृशो जापको याति निरयं नात्र संशयः
avajñānena kurute na tuṣyati na śocati
īdṛśo jāpako yāti nirayaṃ nātra saṃśayaḥ
- 5
अहंकारकृतश्चैव सर्वे निरयगामिनः
परावमानी पुरुषो भविता निरयोपगः
ahaṃkārakṛtaścaiva sarve nirayagāminaḥ
parāvamānī puruṣo bhavitā nirayopagaḥ
- 6
अभिध्यापूर्वकं जप्यं कुरुते यश्च मोहितः
यत्राभिध्यां स कुरुते तं वै निरयम् ऋच्छति
abhidhyāpūrvakaṃ japyaṃ kurute yaśca mohitaḥ
yatrābhidhyāṃ sa kurute taṃ vai nirayam ṛcchati
- 7
अथैश्वर्यप्रवृत्तः सञ्जापकस्तत्र रज्यते
स एव निरयस्तस्य नासौ तस्मात्प्रमुच्यते
athaiśvaryapravṛttaḥ sañjāpakastatra rajyate
sa eva nirayastasya nāsau tasmātpramucyate
- 8
रागेण जापको जप्यं कुरुते तत्र मोहितः
यत्रास्य रागः पतति तत्र तत्रोपजायते
rāgeṇa jāpako japyaṃ kurute tatra mohitaḥ
yatrāsya rāgaḥ patati tatra tatropajāyate
- 9
दुर्बुद्धिर् अकृतप्रज्ञश्चले मनसि तिष्ठति
चलाम् एव गतिं याति निरयं वाधिगच्छति
durbuddhir akṛtaprajñaścale manasi tiṣṭhati
calām eva gatiṃ yāti nirayaṃ vādhigacchati
- 10
अकृतप्रज्ञको बालो मोहं गच्छति जापकः
स मोहान्निरयं याति तत्र गत्वानुशोचति
akṛtaprajñako bālo mohaṃ gacchati jāpakaḥ
sa mohānnirayaṃ yāti tatra gatvānuśocati
- 11
दृढग्राही करोमीति जप्यं जपति जापकः
न सम्पूर्णो न वा युक्तो निरयं सो ऽधिगच्छति
dṛḍhagrāhī karomīti japyaṃ japati jāpakaḥ
na sampūrṇo na vā yukto nirayaṃ so 'dhigacchati
- 12
युधिष्ठिर उवाच
अनिमित्तं परं यत्तद् अव्यक्तं ब्रह्मणि स्थितम्
सद्भूतो जापकः कस्मात्स शरीरम् अथाविशेत्
yudhiṣṭhira uvāca
animittaṃ paraṃ yattad avyaktaṃ brahmaṇi sthitam
sadbhūto jāpakaḥ kasmātsa śarīram athāviśet
- 13
भीष्म उवाच
दुष्प्रज्ञानेन निरया बहवः समुदाहृताः
प्रशस्तं जापकत्वं च दोषाश्चैते तदात्मकाः
bhīṣma uvāca
duṣprajñānena nirayā bahavaḥ samudāhṛtāḥ
praśastaṃ jāpakatvaṃ ca doṣāścaite tadātmakāḥ

