20 shlokas
- 1
जनमेजय उवाच
प्राप्य राज्यं महातेजा धर्मराजो युधिष्ठिरः
यद् अन्यद् अकरोद्विप्र तन्मे वक्तुम् इहार्हसि
janamejaya uvāca
prāpya rājyaṃ mahātejā dharmarājo yudhiṣṭhiraḥ
yad anyad akarodvipra tanme vaktum ihārhasi
- 2
भगवान्वा हृषीकेशस्त्रैलोक्यस्य परो गुरुः
ऋषे यद् अकरोद्वीरस्तच्च व्याख्यातुम् अर्हसि
bhagavānvā hṛṣīkeśastrailokyasya paro guruḥ
ṛṣe yad akarodvīrastacca vyākhyātum arhasi
- 3
वैशंपायन उवाच
शृणु राजेन्द्र तत्त्वेन कीर्त्यमानं मयानघ
वासुदेवं पुरस्कृत्य यद् अकुर्वत पाण्डवाः
vaiśaṃpāyana uvāca
śṛṇu rājendra tattvena kīrtyamānaṃ mayānagha
vāsudevaṃ puraskṛtya yad akurvata pāṇḍavāḥ
- 4
प्राप्य राज्यं महातेजा धर्मराजो युधिष्ठिरः
चातुर्वर्ण्यं यथायोगं स्वे स्वे धर्मे न्यवेशयत्
prāpya rājyaṃ mahātejā dharmarājo yudhiṣṭhiraḥ
cāturvarṇyaṃ yathāyogaṃ sve sve dharme nyaveśayat
- 5
ब्राह्मणानां सहस्रं च स्नातकानां महात्मनाम्
सहस्रनिष्कम् एकैकं वाचयामास पाण्डवः
brāhmaṇānāṃ sahasraṃ ca snātakānāṃ mahātmanām
sahasraniṣkam ekaikaṃ vācayāmāsa pāṇḍavaḥ
- 6
तथानुजीविनो भृत्यान्संश्रितान् अतिथीन् अपि
कामैः संतर्पयामास कृपणांस्तर्ककान् अपि
tathānujīvino bhṛtyānsaṃśritān atithīn api
kāmaiḥ saṃtarpayāmāsa kṛpaṇāṃstarkakān api
- 7
पुरोहिताय धौम्याय प्रादाद् अयुतशः स गाः
धनं सुवर्णं रजतं वासांसि विविधानि च
purohitāya dhaumyāya prādād ayutaśaḥ sa gāḥ
dhanaṃ suvarṇaṃ rajataṃ vāsāṃsi vividhāni ca
- 8
कृपाय च महाराज गुरुवृत्तिम् अवर्तत
विदुराय च धर्मात्मा पूजां चक्रे यतव्रतः
kṛpāya ca mahārāja guruvṛttim avartata
vidurāya ca dharmātmā pūjāṃ cakre yatavrataḥ
- 9
भक्षान्नपानैर्विविधैर्वासोभिः शयनासनैः
सर्वान्संतोषयामास संश्रितान्ददतां वरः
bhakṣānnapānairvividhairvāsobhiḥ śayanāsanaiḥ
sarvānsaṃtoṣayāmāsa saṃśritāndadatāṃ varaḥ
- 10
लब्धप्रशमनं कृत्वा स राजा राजसत्तम
युयुत्सोर्धार्तराष्ट्रस्य पूजां चक्रे महायशाः
labdhapraśamanaṃ kṛtvā sa rājā rājasattama
yuyutsordhārtarāṣṭrasya pūjāṃ cakre mahāyaśāḥ
- 11
धृतराष्ट्राय तद्राज्यं गान्धार्यै विदुराय च
निवेद्य स्वस्थवद्राजन्न् आस्ते राजा युधिष्ठिरः
dhṛtarāṣṭrāya tadrājyaṃ gāndhāryai vidurāya ca
nivedya svasthavadrājann āste rājā yudhiṣṭhiraḥ
- 12
तथा सर्वं स नगरं प्रसाद्य जनमेजय
वासुदेवं महात्मानम् अभ्यगच्छत्कृताञ्जलिः
tathā sarvaṃ sa nagaraṃ prasādya janamejaya
vāsudevaṃ mahātmānam abhyagacchatkṛtāñjaliḥ
- 13
ततो महति पर्यङ्के मणिकाञ्चनभूषिते
ददर्श कृष्णम् आसीनं नीलं मेराविवाम्बुदम्
tato mahati paryaṅke maṇikāñcanabhūṣite
dadarśa kṛṣṇam āsīnaṃ nīlaṃ merāvivāmbudam
- 14
जाज्वल्यमानं वपुषा दिव्याभरणभूषितम्
पीतकौशेयसंवीतं हेम्नीवोपहितं मणिम्
jājvalyamānaṃ vapuṣā divyābharaṇabhūṣitam
pītakauśeyasaṃvītaṃ hemnīvopahitaṃ maṇim
- 15
कौस्तुभेन उरःस्थेन मणिनाभिविराजितम्
उद्यतेवोदयं शैलं सूर्येणाप्तकिरीटिनम्
नौपम्यं विद्यते यस्य त्रिषु लोकेषु किंचन
kaustubhena uraḥsthena maṇinābhivirājitam
udyatevodayaṃ śailaṃ sūryeṇāptakirīṭinam
naupamyaṃ vidyate yasya triṣu lokeṣu kiṃcana
- 16
सो ऽभिगम्य महात्मानं विष्णुं पुरुषविग्रहम्
उवाच मधुराभाषः स्मितपूर्वम् इदं तदा
so 'bhigamya mahātmānaṃ viṣṇuṃ puruṣavigraham
uvāca madhurābhāṣaḥ smitapūrvam idaṃ tadā
- 17
सुखेन ते निशा कच्चिद्व्युष्टा बुद्धिमतां वर
कच्चिज्ज्ञानानि सर्वाणि प्रसन्नानि तवाच्युत
sukhena te niśā kaccidvyuṣṭā buddhimatāṃ vara
kaccijjñānāni sarvāṇi prasannāni tavācyuta
- 18
तव ह्याश्रित्य तां देवीं बुद्धिं बुद्धिमतां वर
वयं राज्यम् अनुप्राप्ताः पृथिवी च वशे स्थिता
tava hyāśritya tāṃ devīṃ buddhiṃ buddhimatāṃ vara
vayaṃ rājyam anuprāptāḥ pṛthivī ca vaśe sthitā
- 19
भवत्प्रसादाद्भगवंस्त्रिलोकगतिविक्रम
जयः प्राप्तो यशश्चाग्र्यं न च धर्माच्च्युता वयम्
bhavatprasādādbhagavaṃstrilokagativikrama
jayaḥ prāpto yaśaścāgryaṃ na ca dharmāccyutā vayam
- 20
तं तथा भाषमाणं तु धर्मराजं युधिष्ठिरम्
नोवाच भगवान्किंचिद्ध्यानम् एवान्वपद्यत
taṃ tathā bhāṣamāṇaṃ tu dharmarājaṃ yudhiṣṭhiram
novāca bhagavānkiṃciddhyānam evānvapadyata

