10 shlokas
- 1
ब्राह्मण उवाच
अतिभारोद्यतस्यैव भारापनयनं महत्
पराश्वासकरं वाक्यम् इदं मे भवतः श्रुतम्
brāhmaṇa uvāca
atibhārodyatasyaiva bhārāpanayanaṃ mahat
parāśvāsakaraṃ vākyam idaṃ me bhavataḥ śrutam
- 2
अध्वक्लान्तस्य शयनं स्थानक्लान्तस्य चासनम्
तृषितस्य च पानीयं क्षुधार्तस्य च भोजनम्
adhvaklāntasya śayanaṃ sthānaklāntasya cāsanam
tṛṣitasya ca pānīyaṃ kṣudhārtasya ca bhojanam
- 3
ईप्सितस्येव संप्राप्तिर् अन्नस्य समये ऽतिथेः
एषितस्यात्मनः काले वृद्धस्येव सुतो यथा
īpsitasyeva saṃprāptir annasya samaye 'titheḥ
eṣitasyātmanaḥ kāle vṛddhasyeva suto yathā
- 4
मनसा चिन्तितस्येव प्रीतिस्निग्धस्य दर्शनम्
प्रह्लादयति मां वाक्यं भवता यद् उदीरितम्
manasā cintitasyeva prītisnigdhasya darśanam
prahlādayati māṃ vākyaṃ bhavatā yad udīritam
- 5
दत्तचक्षुर् इवाकाशे पश्यामि विमृशामि च
प्रज्ञानवचनाद्यो ऽयम् उपदेशो हि मे कृतः
बाढम् एवं करिष्यामि यथा मां भाषते भवान्
dattacakṣur ivākāśe paśyāmi vimṛśāmi ca
prajñānavacanādyo 'yam upadeśo hi me kṛtaḥ
bāḍham evaṃ kariṣyāmi yathā māṃ bhāṣate bhavān
- 6
इहेमां रजनीं साधो निवसस्व मया सह
प्रभाते यास्यति भवान्पर्याश्वस्तः सुखोषितः
असौ हि भगवान्सूर्यो मन्दरश्मिर् अवाङ्मुखः
ihemāṃ rajanīṃ sādho nivasasva mayā saha
prabhāte yāsyati bhavānparyāśvastaḥ sukhoṣitaḥ
asau hi bhagavānsūryo mandaraśmir avāṅmukhaḥ
- 7
भीष्म उवाच
ततस्तेन कृतातिथ्यः सो ऽतिथिः शत्रुसूदन
उवास किल तां रात्रिं सह तेन द्विजेन वै
bhīṣma uvāca
tatastena kṛtātithyaḥ so 'tithiḥ śatrusūdana
uvāsa kila tāṃ rātriṃ saha tena dvijena vai
- 8
तत्तच्च धर्मसंयुक्तं तयोः कथयतोस्तदा
व्यतीता सा निशा कृत्स्ना सुखेन दिवसोपमा
tattacca dharmasaṃyuktaṃ tayoḥ kathayatostadā
vyatītā sā niśā kṛtsnā sukhena divasopamā
- 9
ततः प्रभातसमये सो ऽतिथिस्तेन पूजितः
ब्राह्मणेन यथाशक्त्या स्वकार्यम् अभिकाङ्क्षता
tataḥ prabhātasamaye so 'tithistena pūjitaḥ
brāhmaṇena yathāśaktyā svakāryam abhikāṅkṣatā
- 10
ततः स विप्रः कृतधर्मनिश्चयः कृताभ्यनुज्ञः स्वजनेन धर्मवित्
यथोपदिष्टं भुजगेन्द्रसंश्रयं जगाम काले सुकृतैकनिश्चयः
tataḥ sa vipraḥ kṛtadharmaniścayaḥ kṛtābhyanujñaḥ svajanena dharmavit
yathopadiṣṭaṃ bhujagendrasaṃśrayaṃ jagāma kāle sukṛtaikaniścayaḥ

