10 shlokas
- 1
युधिष्ठिर उवाच
नामृतस्येव पर्याप्तिर्ममास्ति ब्रुवति त्वयि
तस्मात्कथय भूयस्त्वं धर्मम् एव पितामह
yudhiṣṭhira uvāca
nāmṛtasyeva paryāptirmamāsti bruvati tvayi
tasmātkathaya bhūyastvaṃ dharmam eva pitāmaha
- 2
भीष्म उवाच
अत्राप्युदाहरन्तीमम् इतिहासं पुरातनम्
गौतमस्य च संवादं यमस्य च महात्मनः
bhīṣma uvāca
atrāpyudāharantīmam itihāsaṃ purātanam
gautamasya ca saṃvādaṃ yamasya ca mahātmanaḥ
- 3
पारियात्रगिरिं प्राप्य गौतमस्याश्रमो महान्
उवास गौतमो यत्र कालं तद् अपि मे शृणु
pāriyātragiriṃ prāpya gautamasyāśramo mahān
uvāsa gautamo yatra kālaṃ tad api me śṛṇu
- 4
षष्टिं वर्षसहस्राणि सो ऽतप्यद्गौतमस्तपः
तम् उग्रतपसं युक्तं तपसा भावितं मुनिम्
ṣaṣṭiṃ varṣasahasrāṇi so 'tapyadgautamastapaḥ
tam ugratapasaṃ yuktaṃ tapasā bhāvitaṃ munim
- 5
उपयातो नरव्याघ्र लोकपालो यमस्तदा
तम् अपश्यत्सुतपसम् ऋषिं वै गौतमं मुनिम्
upayāto naravyāghra lokapālo yamastadā
tam apaśyatsutapasam ṛṣiṃ vai gautamaṃ munim
- 6
स तं विदित्वा ब्रह्मर्षिर्यमम् आगतम् ओजसा
प्राञ्जलिः प्रयतो भूत्वा उपसृप्तस्तपोधनः
sa taṃ viditvā brahmarṣiryamam āgatam ojasā
prāñjaliḥ prayato bhūtvā upasṛptastapodhanaḥ
- 7
तं धर्मराजो दृष्ट्वैव नमस्कृत्य नरर्षभम्
न्यमन्त्रयत धर्मेण क्रियतां किम् इति ब्रुवन्
taṃ dharmarājo dṛṣṭvaiva namaskṛtya nararṣabham
nyamantrayata dharmeṇa kriyatāṃ kim iti bruvan
- 8
गौतम उवाच
मातापितृभ्याम् आनृण्यं किं कृत्वा समवाप्नुयात्
कथं च लोकान् अश्नाति पुरुषो दुर्लभाञ्शुभान्
gautama uvāca
mātāpitṛbhyām ānṛṇyaṃ kiṃ kṛtvā samavāpnuyāt
kathaṃ ca lokān aśnāti puruṣo durlabhāñśubhān
- 9
यम उवाच
तपःशौचवता नित्यं सत्यधर्मरतेन च
मातापित्रोर् अहरहः पूजनं कार्यम् अञ्जसा
yama uvāca
tapaḥśaucavatā nityaṃ satyadharmaratena ca
mātāpitror aharahaḥ pūjanaṃ kāryam añjasā
- 10
अश्वमेधैश्च यष्टव्यं बहुभिः स्वाप्तदक्षिणैः
तेन लोकान् उपाश्नाति पुरुषो ऽद्भुतदर्शनान्
aśvamedhaiśca yaṣṭavyaṃ bahubhiḥ svāptadakṣiṇaiḥ
tena lokān upāśnāti puruṣo 'dbhutadarśanān

