11 shlokas
- 1
अतिथिर् उवाच
उपदेशं तु ते विप्र करिष्ये ऽहं यथागमम्
गुरुणा मे यथाख्यातम् अर्थतस्तच्च मे शृणु
atithir uvāca
upadeśaṃ tu te vipra kariṣye 'haṃ yathāgamam
guruṇā me yathākhyātam arthatastacca me śṛṇu
- 2
यत्र पूर्वाभिसर्गेण धर्मचक्रं प्रवर्तितम्
नैमिषे गोमतीतीरे तत्र नागाह्वयं पुरम्
yatra pūrvābhisargeṇa dharmacakraṃ pravartitam
naimiṣe gomatītīre tatra nāgāhvayaṃ puram
- 3
समग्रैस्त्रिदशैस्तत्र इष्टम् आसीद्द्विजर्षभ
यत्रेन्द्रातिक्रमं चक्रे मान्धाता राजसत्तमः
samagraistridaśaistatra iṣṭam āsīddvijarṣabha
yatrendrātikramaṃ cakre māndhātā rājasattamaḥ
- 4
कृताधिवासो धर्मात्मा तत्र चक्षुःश्रवा महान्
पद्मनाभो महाभागः पद्म इत्येव विश्रुतः
kṛtādhivāso dharmātmā tatra cakṣuḥśravā mahān
padmanābho mahābhāgaḥ padma ityeva viśrutaḥ
- 5
स वाचा कर्मणा चैव मनसा च द्विजर्षभ
प्रसादयति भूतानि त्रिविधे वर्त्मनि स्थितः
sa vācā karmaṇā caiva manasā ca dvijarṣabha
prasādayati bhūtāni trividhe vartmani sthitaḥ
- 6
साम्ना दानेन भेदेन दण्डेनेति चतुर्विधम्
विषमस्थं जनं स्वं च चक्षुर्ध्यानेन रक्षति
sāmnā dānena bhedena daṇḍeneti caturvidham
viṣamasthaṃ janaṃ svaṃ ca cakṣurdhyānena rakṣati
- 7
तम् अभिक्रम्य विधिना प्रष्टुम् अर्हसि काङ्क्षितम्
स ते परमकं धर्मं नमिथ्या दर्शयिष्यति
tam abhikramya vidhinā praṣṭum arhasi kāṅkṣitam
sa te paramakaṃ dharmaṃ namithyā darśayiṣyati
- 8
स हि सर्वातिथिर्नागो बुद्धिशास्त्रविशारदः
गुणैर् अनवमैर्युक्तः समस्तैर् आभिकामिकैः
sa hi sarvātithirnāgo buddhiśāstraviśāradaḥ
guṇair anavamairyuktaḥ samastair ābhikāmikaiḥ
- 9
प्रकृत्या नित्यसलिलो नित्यम् अध्ययने रतः
तपोदमाभ्यां संयुक्तो वृत्तेनानवरेण च
prakṛtyā nityasalilo nityam adhyayane rataḥ
tapodamābhyāṃ saṃyukto vṛttenānavareṇa ca
- 10
यज्वा दानरुचिः क्षान्तो वृत्ते च परमे स्थितः
सत्यवाग् अनसूयुश्च शीलवान् अभिसंश्रितः
yajvā dānaruciḥ kṣānto vṛtte ca parame sthitaḥ
satyavāg anasūyuśca śīlavān abhisaṃśritaḥ
- 11
शेषान्नभोक्ता वचनानुकूलो हितार्जवोत्कृष्टकृताकृतज्ञः
अवैरकृद्भूतहिते नियुक्तो गङ्गाह्रदाम्भो ऽभिजनोपपन्नः
śeṣānnabhoktā vacanānukūlo hitārjavotkṛṣṭakṛtākṛtajñaḥ
avairakṛdbhūtahite niyukto gaṅgāhradāmbho 'bhijanopapannaḥ

