10 shlokas
- 1
भीष्म उवाच
ततस्तं लुब्धकः पश्यन्कृपयाभिपरिप्लुतः
कपोतम् अग्नौ पतितं वाक्यं पुनर् उवाच ह
bhīṣma uvāca
tatastaṃ lubdhakaḥ paśyankṛpayābhipariplutaḥ
kapotam agnau patitaṃ vākyaṃ punar uvāca ha
- 2
किम् ईदृशं नृशंसेन मया कृतम् अबुद्धिना
भविष्यति हि मे नित्यं पातकं हृदि जीवतः
kim īdṛśaṃ nṛśaṃsena mayā kṛtam abuddhinā
bhaviṣyati hi me nityaṃ pātakaṃ hṛdi jīvataḥ
- 3
स विनिन्दन्न् अथात्मानं पुनः पुनर् उवाच ह
धिङ्माम् अस्तु सुदुर्बुद्धिं सदा निकृतिनिश्चयम्
शुभं कर्म परित्यज्य यो ऽहं शकुनिलुब्धकः
sa vinindann athātmānaṃ punaḥ punar uvāca ha
dhiṅmām astu sudurbuddhiṃ sadā nikṛtiniścayam
śubhaṃ karma parityajya yo 'haṃ śakunilubdhakaḥ
- 4
नृशंसस्य ममाद्यायं प्रत्यादेशो न संशयः
दत्तः स्वमांसं ददता कपोतेन महात्मना
nṛśaṃsasya mamādyāyaṃ pratyādeśo na saṃśayaḥ
dattaḥ svamāṃsaṃ dadatā kapotena mahātmanā
- 5
सो ऽहं त्यक्ष्ये प्रियान्प्राणान्पुत्रदारं विसृज्य च
उपदिष्टो हि मे धर्मः कपोतेनातिधर्मिणा
so 'haṃ tyakṣye priyānprāṇānputradāraṃ visṛjya ca
upadiṣṭo hi me dharmaḥ kapotenātidharmiṇā
- 6
अद्य प्रभृति देहं स्वं सर्वभोगैर्विवर्जितम्
यथा स्वल्पं जलं ग्रीष्मे शोषयिष्याम्यहं तथा
adya prabhṛti dehaṃ svaṃ sarvabhogairvivarjitam
yathā svalpaṃ jalaṃ grīṣme śoṣayiṣyāmyahaṃ tathā
- 7
क्षुत्पिपासातपसहः कृशो धमनिसंततः
उपवासैर्बहुविधैश्चरिष्ये पारलौकिकम्
kṣutpipāsātapasahaḥ kṛśo dhamanisaṃtataḥ
upavāsairbahuvidhaiścariṣye pāralaukikam
- 8
अहो देहप्रदानेन दर्शितातिथिपूजना
तस्माद्धर्मं चरिष्यामि धर्मो हि परमा गतिः
दृष्टो हि धर्मो धर्मिष्ठैर्यादृशो विहगोत्तमे
aho dehapradānena darśitātithipūjanā
tasmāddharmaṃ cariṣyāmi dharmo hi paramā gatiḥ
dṛṣṭo hi dharmo dharmiṣṭhairyādṛśo vihagottame
- 9
एवम् उक्त्वा विनिश्चित्य रौद्रकर्मा स लुब्धकः
महाप्रस्थानम् आश्रित्य प्रययौ संशितव्रतः
evam uktvā viniścitya raudrakarmā sa lubdhakaḥ
mahāprasthānam āśritya prayayau saṃśitavrataḥ
- 10
ततो यष्टिं शलाकाश्च क्षारकं पञ्जरं तथा
तांश्च बद्धा कपोतान्स सम्प्रमुच्योत्ससर्ज ह
tato yaṣṭiṃ śalākāśca kṣārakaṃ pañjaraṃ tathā
tāṃśca baddhā kapotānsa sampramucyotsasarja ha

