9 shlokas
- 1
भीष्म उवाच
आसीत्किल कुरुश्रेष्ठ महापद्मे पुरोत्तमे
गङ्गाया दक्षिणे तीरे कश्चिद्विप्रः समाहितः
bhīṣma uvāca
āsītkila kuruśreṣṭha mahāpadme purottame
gaṅgāyā dakṣiṇe tīre kaścidvipraḥ samāhitaḥ
- 2
सौम्यः सोमान्वये वेदे गताध्वा छिन्नसंशयः
धर्मनित्यो जितक्रोधो नित्यतृप्तो जितेन्द्रियः
saumyaḥ somānvaye vede gatādhvā chinnasaṃśayaḥ
dharmanityo jitakrodho nityatṛpto jitendriyaḥ
- 3
अहिंसानिरतो नित्यं सत्यः सज्जनसंमतः
न्यायप्राप्तेन वित्तेन स्वेन शीलेन चान्वितः
ahiṃsānirato nityaṃ satyaḥ sajjanasaṃmataḥ
nyāyaprāptena vittena svena śīlena cānvitaḥ
- 4
ज्ञातिसंबन्धिविपुले मित्रापाश्रयसंमते
कुले महति विख्याते विशिष्टां वृत्तिम् आस्थितः
jñātisaṃbandhivipule mitrāpāśrayasaṃmate
kule mahati vikhyāte viśiṣṭāṃ vṛttim āsthitaḥ
- 5
स पुत्रान्बहुलान्दृष्ट्वा विपुले कर्मणि स्थितः
कुलधर्माश्रितो राजन्धर्मचर्यापरो ऽभवत्
sa putrānbahulāndṛṣṭvā vipule karmaṇi sthitaḥ
kuladharmāśrito rājandharmacaryāparo 'bhavat
- 6
ततः स धर्मं वेदोक्तं यथाशास्त्रोक्तम् एव च
शिष्टाचीर्णं च धर्मं च त्रिविधं चिन्त्य चेतसा
tataḥ sa dharmaṃ vedoktaṃ yathāśāstroktam eva ca
śiṣṭācīrṇaṃ ca dharmaṃ ca trividhaṃ cintya cetasā
- 7
किं नु मे स्याच्छुभं कृत्वा किं क्षमं किं परायणम्
इत्येवं खिद्यते नित्यं न च याति विनिश्चयम्
kiṃ nu me syācchubhaṃ kṛtvā kiṃ kṣamaṃ kiṃ parāyaṇam
ityevaṃ khidyate nityaṃ na ca yāti viniścayam
- 8
तस्यैवं खिद्यमानस्य धर्मं परमम् आस्थितः
कदाचिद् अतिथिः प्राप्तो ब्राह्मणः सुसमाहितः
tasyaivaṃ khidyamānasya dharmaṃ paramam āsthitaḥ
kadācid atithiḥ prāpto brāhmaṇaḥ susamāhitaḥ
- 9
स तस्मै सत्क्रियां चक्रे क्रियायुक्तेन हेतुना
विश्रान्तं चैनम् आसीनम् इदं वचनम् अब्रवीत्
sa tasmai satkriyāṃ cakre kriyāyuktena hetunā
viśrāntaṃ cainam āsīnam idaṃ vacanam abravīt

