16 shlokas
- 1
गुरुर् उवाच
चतुर्विधानि भूतानि स्थावराणि चराणि च
अव्यक्तप्रभवान्याहुर् अव्यक्तनिधनानि च
अव्यक्तनिधनं विद्याद् अव्यक्तात्मात्मकं मनः
gurur uvāca
caturvidhāni bhūtāni sthāvarāṇi carāṇi ca
avyaktaprabhavānyāhur avyaktanidhanāni ca
avyaktanidhanaṃ vidyād avyaktātmātmakaṃ manaḥ
- 2
यथाश्वत्थकणीकायाम् अन्तर्भूतो महाद्रुमः
निष्पन्नो दृश्यते व्यक्तम् अव्यक्तात्संभवस्तथा
yathāśvatthakaṇīkāyām antarbhūto mahādrumaḥ
niṣpanno dṛśyate vyaktam avyaktātsaṃbhavastathā
- 3
अभिद्रवत्ययस्कान्तमयो निश्चेतनावुभौ
स्वभावहेतुजा भावा यद्वद् अन्यद् अपीदृशम्
abhidravatyayaskāntamayo niścetanāvubhau
svabhāvahetujā bhāvā yadvad anyad apīdṛśam
- 4
तद्वद् अव्यक्तजा भावाः कर्तुः कारणलक्षणाः
अचेतनाश्चेतयितुः कारणाद् अभिसंहिताः
tadvad avyaktajā bhāvāḥ kartuḥ kāraṇalakṣaṇāḥ
acetanāścetayituḥ kāraṇād abhisaṃhitāḥ
- 5
न भूः खं द्यौर्न भूतानि नर्षयो न सुरासुराः
नान्यद् आसीद् ऋते जीवम् आसेदुर्न तु संहितम्
na bhūḥ khaṃ dyaurna bhūtāni narṣayo na surāsurāḥ
nānyad āsīd ṛte jīvam āsedurna tu saṃhitam
- 6
सर्वनीत्या सर्वगतं मनोहेतु सलक्षणम्
अज्ञानकर्म निर्दिष्टम् एतत्कारणलक्षणम्
sarvanītyā sarvagataṃ manohetu salakṣaṇam
ajñānakarma nirdiṣṭam etatkāraṇalakṣaṇam
- 7
तत्कारणैर्हि संयुक्तं कार्यसंग्रहकारकम्
येनैतद्वर्तते चक्रम् अनादिनिधनं महत्
tatkāraṇairhi saṃyuktaṃ kāryasaṃgrahakārakam
yenaitadvartate cakram anādinidhanaṃ mahat
- 8
अव्यक्तनाभं व्यक्तारं विकारपरिमण्डलम्
क्षेत्रज्ञाधिष्ठितं चक्रं स्निग्धाक्षं वर्तते ध्रुवम्
avyaktanābhaṃ vyaktāraṃ vikāraparimaṇḍalam
kṣetrajñādhiṣṭhitaṃ cakraṃ snigdhākṣaṃ vartate dhruvam
- 9
स्निग्धत्वात्तिलवत्सर्वं चक्रे ऽस्मिन्पीड्यते जगत्
तिलपीडैर् इवाक्रम्य भोगैर् अज्ञानसंभवैः
snigdhatvāttilavatsarvaṃ cakre 'sminpīḍyate jagat
tilapīḍair ivākramya bhogair ajñānasaṃbhavaiḥ
- 10
कर्म तत्कुरुते तर्षाद् अहंकारपरिग्रहम्
कार्यकारणसंयोगे स हेतुर् उपपादितः
karma tatkurute tarṣād ahaṃkāraparigraham
kāryakāraṇasaṃyoge sa hetur upapāditaḥ
- 11
नात्येति कारणं कार्यं न कार्यं कारणं तथा
कार्याणां तूपकरणे कालो भवति हेतुमान्
nātyeti kāraṇaṃ kāryaṃ na kāryaṃ kāraṇaṃ tathā
kāryāṇāṃ tūpakaraṇe kālo bhavati hetumān
- 12
हेतुयुक्ताः प्रकृतयो विकाराश्च परस्परम्
अन्योन्यम् अभिवर्तन्ते पुरुषाधिष्ठिताः सदा
hetuyuktāḥ prakṛtayo vikārāśca parasparam
anyonyam abhivartante puruṣādhiṣṭhitāḥ sadā
- 13
सरजस्तामसैर्भावैश्च्युतो हेतुबलान्वितः
क्षेत्रज्ञम् एवानुयाति पांसुर्वातेरितो यथा
न च तैः स्पृश्यते भावो न ते तेन महात्मना
sarajastāmasairbhāvaiścyuto hetubalānvitaḥ
kṣetrajñam evānuyāti pāṃsurvāterito yathā
na ca taiḥ spṛśyate bhāvo na te tena mahātmanā
- 14
सरजस्को ऽरजस्कश्च स वै वायुर्यथा भवेत्
तथैतद् अन्तरं विद्यात्क्षेत्रक्षेत्रज्ञयोर्बुधः
अभ्यासात्स तथा युक्तो न गच्छेत्प्रकृतिं पुनः
sarajasko 'rajaskaśca sa vai vāyuryathā bhavet
tathaitad antaraṃ vidyātkṣetrakṣetrajñayorbudhaḥ
abhyāsātsa tathā yukto na gacchetprakṛtiṃ punaḥ
- 15
संदेहम् एतम् उत्पन्नम् अछिनद्भगवान् ऋषिः
तथा वार्तां समीक्षेत कृतलक्षणसंमिताम्
saṃdeham etam utpannam achinadbhagavān ṛṣiḥ
tathā vārtāṃ samīkṣeta kṛtalakṣaṇasaṃmitām
- 16
बीजान्यग्न्युपदग्धानि न रोहन्ति यथा पुनः
ज्ञानदग्धैस्तथा क्लेशैर्नात्मा सम्बध्यते पुनः
bījānyagnyupadagdhāni na rohanti yathā punaḥ
jñānadagdhaistathā kleśairnātmā sambadhyate punaḥ

