9 shlokas
- 1
भीष्म उवाच
स चामन्त्र्योरगश्रेष्ठं ब्राह्मणः कृतनिश्चयः
दीक्षाकाङ्क्षी तदा राजंश्च्यवनं भार्गवं श्रितः
bhīṣma uvāca
sa cāmantryoragaśreṣṭhaṃ brāhmaṇaḥ kṛtaniścayaḥ
dīkṣākāṅkṣī tadā rājaṃścyavanaṃ bhārgavaṃ śritaḥ
- 2
स तेन कृतसंस्कारो धर्मम् एवोपतस्थिवान्
तथैव च कथाम् एतां राजन्कथितवांस्तदा
sa tena kṛtasaṃskāro dharmam evopatasthivān
tathaiva ca kathām etāṃ rājankathitavāṃstadā
- 3
भार्गवेणापि राजेन्द्र जनकस्य निवेशने
कथैषा कथिता पुण्या नारदाय महात्मने
bhārgaveṇāpi rājendra janakasya niveśane
kathaiṣā kathitā puṇyā nāradāya mahātmane
- 4
नारदेनापि राजेन्द्र देवेन्द्रस्य निवेशने
कथिता भरतश्रेष्ठ पृष्टेनाक्लिष्टकर्मणा
nāradenāpi rājendra devendrasya niveśane
kathitā bharataśreṣṭha pṛṣṭenākliṣṭakarmaṇā
- 5
देवराजेन च पुरा कथैषा कथिता शुभा
समस्तेभ्यः प्रशस्तेभ्यो वसुभ्यो वसुधाधिप
devarājena ca purā kathaiṣā kathitā śubhā
samastebhyaḥ praśastebhyo vasubhyo vasudhādhipa
- 6
यदा च मम रामेण युद्धम् आसीत्सुदारुणम्
वसुभिश्च तदा राजन्कथेयं कथिता मम
yadā ca mama rāmeṇa yuddham āsītsudāruṇam
vasubhiśca tadā rājankatheyaṃ kathitā mama
- 7
पृच्छमानाय तत्त्वेन मया तुभ्यं विशां पते
कथेयं कथिता पुण्या धर्म्या धर्मभृतां वर
pṛcchamānāya tattvena mayā tubhyaṃ viśāṃ pate
katheyaṃ kathitā puṇyā dharmyā dharmabhṛtāṃ vara
- 8
तद् एष परमो धर्मो यन्मां पृच्छसि भारत
असन्नधीर् अनाकाङ्क्षी धर्मार्थकरणे नृप
tad eṣa paramo dharmo yanmāṃ pṛcchasi bhārata
asannadhīr anākāṅkṣī dharmārthakaraṇe nṛpa
- 9
स च किल कृतनिश्चयो द्विजाग्र्यो भुजगपतिप्रतिदेशितार्थकृत्यः
यमनियमसमाहितो वनान्तं परिगणितोञ्छशिलाशनः प्रविष्टः
sa ca kila kṛtaniścayo dvijāgryo bhujagapatipratideśitārthakṛtyaḥ
yamaniyamasamāhito vanāntaṃ parigaṇitoñchaśilāśanaḥ praviṣṭaḥ

