16 shlokas
- 1
वैशंपायन उवाच
ततो विसर्जयामास सर्वाः प्रकृतयो नृपः
विविशुश्चाभ्यनुज्ञाता यथास्वानि गृहाणि च
vaiśaṃpāyana uvāca
tato visarjayāmāsa sarvāḥ prakṛtayo nṛpaḥ
viviśuścābhyanujñātā yathāsvāni gṛhāṇi ca
- 2
ततो युधिष्ठिरो राजा भीमं भीमपराक्रमम्
सान्त्वयन्न् अब्रवीद्धीमान् अर्जुनं यमजौ तथा
tato yudhiṣṭhiro rājā bhīmaṃ bhīmaparākramam
sāntvayann abravīddhīmān arjunaṃ yamajau tathā
- 3
शत्रुभिर्विविधैः शस्त्रैः कृत्तदेहा महारणे
श्रान्ता भवन्तः सुभृशं तापिताः शोकमन्युभिः
śatrubhirvividhaiḥ śastraiḥ kṛttadehā mahāraṇe
śrāntā bhavantaḥ subhṛśaṃ tāpitāḥ śokamanyubhiḥ
- 4
अरण्ये दुःखवसतीर्मत्कृते पुरुषोत्तमाः
भवद्भिर् अनुभूताश्च यथा कुपुरुषैस्तथा
araṇye duḥkhavasatīrmatkṛte puruṣottamāḥ
bhavadbhir anubhūtāśca yathā kupuruṣaistathā
- 5
यथासुखं यथाजोषं जयो ऽयम् अनुभूयताम्
विश्रान्तांल्लब्धविज्ञानाञ्श्वः समेतास्मि वः पुनः
yathāsukhaṃ yathājoṣaṃ jayo 'yam anubhūyatām
viśrāntāṃllabdhavijñānāñśvaḥ sametāsmi vaḥ punaḥ
- 6
ततो दुर्योधनगृहं प्रासादैर् उपशोभितम्
बहुरत्नसमाकीर्णं दासीदाससमाकुलम्
tato duryodhanagṛhaṃ prāsādair upaśobhitam
bahuratnasamākīrṇaṃ dāsīdāsasamākulam
- 7
धृतराष्ट्राभ्यनुज्ञातं भ्रात्रा दत्तं वृकोदरः
प्रतिपेदे महाबाहुर्मन्दरं मघवान् इव
dhṛtarāṣṭrābhyanujñātaṃ bhrātrā dattaṃ vṛkodaraḥ
pratipede mahābāhurmandaraṃ maghavān iva
- 8
यथा दुर्योधनगृहं तथा दुःशासनस्य च
प्रासादमालासंयुक्तं हेमतोरणभूषितम्
yathā duryodhanagṛhaṃ tathā duḥśāsanasya ca
prāsādamālāsaṃyuktaṃ hematoraṇabhūṣitam
- 9
दासीदाससुसम्पूर्णं प्रभूतधनधान्यवत्
प्रतिपेदे महाबाहुर् अर्जुनो राजशासनात्
dāsīdāsasusampūrṇaṃ prabhūtadhanadhānyavat
pratipede mahābāhur arjuno rājaśāsanāt
- 10
दुर्मर्षणस्य भवनं दुःशासनगृहाद्वरम्
कुबेरभवनप्रख्यं मणिहेमविभूषितम्
durmarṣaṇasya bhavanaṃ duḥśāsanagṛhādvaram
kuberabhavanaprakhyaṃ maṇihemavibhūṣitam
- 11
नकुलाय वरार्हाय कर्शिताय महावने
ददौ प्रीतो महाराज धर्मराजो युधिष्ठिरः
nakulāya varārhāya karśitāya mahāvane
dadau prīto mahārāja dharmarājo yudhiṣṭhiraḥ
- 12
दुर्मुखस्य च वेश्माग्र्यं श्रीमत्कनकभूषितम्
पूर्णं पद्मदलाक्षीणां स्त्रीणां शयनसंकुलम्
durmukhasya ca veśmāgryaṃ śrīmatkanakabhūṣitam
pūrṇaṃ padmadalākṣīṇāṃ strīṇāṃ śayanasaṃkulam
- 13
प्रददौ सहदेवाय सततं प्रियकारिणे
मुमुदे तच्च लब्ध्वा स कैलासं धनदो यथा
pradadau sahadevāya satataṃ priyakāriṇe
mumude tacca labdhvā sa kailāsaṃ dhanado yathā
- 14
युयुत्सुर्विदुरश्चैव संजयश्च महाद्युतिः
सुधर्मा चैव धौम्यश्च यथास्वं जग्मुर् आलयान्
yuyutsurviduraścaiva saṃjayaśca mahādyutiḥ
sudharmā caiva dhaumyaśca yathāsvaṃ jagmur ālayān
- 15
सह सात्यकिना शौरिर् अर्जुनस्य निवेशनम्
विवेश पुरुषव्याघ्रो व्याघ्रो गिरिगुहाम् इव
saha sātyakinā śaurir arjunasya niveśanam
viveśa puruṣavyāghro vyāghro giriguhām iva
- 16
तत्र भक्षान्नपानैस्ते समुपेताः सुखोषिताः
सुखप्रबुद्धा राजानम् उपतस्थुर्युधिष्ठिरम्
tatra bhakṣānnapānaiste samupetāḥ sukhoṣitāḥ
sukhaprabuddhā rājānam upatasthuryudhiṣṭhiram

