21 shlokas
- 1
नारद उवाच
कर्णस्तु समवाप्यैतद् अस्त्रं भार्गवनन्दनात्
दुर्योधनेन सहितो मुमुदे भरतर्षभ
nārada uvāca
karṇastu samavāpyaitad astraṃ bhārgavanandanāt
duryodhanena sahito mumude bharatarṣabha
- 2
ततः कदाचिद्राजानः समाजग्मुः स्वयंवरे
कलिङ्गविषये राजन्राज्ञश्चित्राङ्गदस्य च
tataḥ kadācidrājānaḥ samājagmuḥ svayaṃvare
kaliṅgaviṣaye rājanrājñaścitrāṅgadasya ca
- 3
श्रीमद्राजपुरं नाम नगरं तत्र भारत
राजानः शतशस्तत्र कन्यार्थं समुपागमन्
śrīmadrājapuraṃ nāma nagaraṃ tatra bhārata
rājānaḥ śataśastatra kanyārthaṃ samupāgaman
- 4
श्रुत्वा दुर्योधनस्तत्र समेतान्सर्वपार्थिवान्
रथेन काञ्चनाङ्गेन कर्णेन सहितो ययौ
śrutvā duryodhanastatra sametānsarvapārthivān
rathena kāñcanāṅgena karṇena sahito yayau
- 5
ततः स्वयंवरे तस्मिन्सम्प्रवृत्ते महोत्सवे
समापेतुर्नृपतयः कन्यार्थे नृपसत्तम
tataḥ svayaṃvare tasminsampravṛtte mahotsave
samāpeturnṛpatayaḥ kanyārthe nṛpasattama
- 6
शिशुपालो जरासंधो भीष्मको वक्र एव च
कपोतरोमा नीलश्च रुक्मी च दृढविक्रमः
śiśupālo jarāsaṃdho bhīṣmako vakra eva ca
kapotaromā nīlaśca rukmī ca dṛḍhavikramaḥ
- 7
सृगालश्च महाराज स्त्रीराज्याधिपतिश्च यः
अशोकः शतधन्वा च भोजो वीरश्च नामतः
sṛgālaśca mahārāja strīrājyādhipatiśca yaḥ
aśokaḥ śatadhanvā ca bhojo vīraśca nāmataḥ
- 8
एते चान्ये च बहवो दक्षिणां दिशम् आश्रिताः
म्लेच्छाचार्याश्च राजानः प्राच्योदीच्याश्च भारत
ete cānye ca bahavo dakṣiṇāṃ diśam āśritāḥ
mlecchācāryāśca rājānaḥ prācyodīcyāśca bhārata
- 9
काञ्चनाङ्गदिनः सर्वे बद्धजाम्बूनदस्रजः
सर्वे भास्वरदेहाश्च व्याघ्रा इव मदोत्कटाः
kāñcanāṅgadinaḥ sarve baddhajāmbūnadasrajaḥ
sarve bhāsvaradehāśca vyāghrā iva madotkaṭāḥ
- 10
ततः समुपविष्टेषु तेषु राजसु भारत
विवेश रङ्गं सा कन्या धात्रीवर्षधरान्विता
tataḥ samupaviṣṭeṣu teṣu rājasu bhārata
viveśa raṅgaṃ sā kanyā dhātrīvarṣadharānvitā
- 11
ततः संश्राव्यमाणेषु राज्ञां नामसु भारत
अत्यक्रामद्धार्तराष्ट्रं सा कन्या वरवर्णिनी
tataḥ saṃśrāvyamāṇeṣu rājñāṃ nāmasu bhārata
atyakrāmaddhārtarāṣṭraṃ sā kanyā varavarṇinī
- 12
दुर्योधनस्तु कौरव्यो नामर्षयत लङ्घनम्
प्रत्यषेधच्च तां कन्याम् असत्कृत्य नराधिपान्
duryodhanastu kauravyo nāmarṣayata laṅghanam
pratyaṣedhacca tāṃ kanyām asatkṛtya narādhipān
- 13
स वीर्यमदमत्तत्वाद्भीष्मद्रोणावुपाश्रितः
रथम् आरोप्य तां कन्याम् आजुहाव नराधिपान्
sa vīryamadamattatvādbhīṣmadroṇāvupāśritaḥ
ratham āropya tāṃ kanyām ājuhāva narādhipān
- 14
तम् अन्वयाद्रथी खड्गी बद्धगोधाङ्गुलित्रवान्
कर्णः शस्त्रभृतां श्रेष्ठः पृष्ठतः पुरुषर्षभ
tam anvayādrathī khaḍgī baddhagodhāṅgulitravān
karṇaḥ śastrabhṛtāṃ śreṣṭhaḥ pṛṣṭhataḥ puruṣarṣabha
- 15
ततो विमर्दः सुमहान्राज्ञाम् आसीद्युधिष्ठिर
संनह्यतां तनुत्राणि रथान्योजयताम् अपि
tato vimardaḥ sumahānrājñām āsīdyudhiṣṭhira
saṃnahyatāṃ tanutrāṇi rathānyojayatām api
- 16
ते ऽभ्यधावन्त संक्रुद्धाः कर्णदुर्योधनावुभौ
शरवर्षाणि मुञ्चन्तो मेघाः पर्वतयोर् इव
te 'bhyadhāvanta saṃkruddhāḥ karṇaduryodhanāvubhau
śaravarṣāṇi muñcanto meghāḥ parvatayor iva
- 17
कर्णस्तेषाम् आपतताम् एकैकेन क्षुरेण ह
धनूंषि सशरावापान्यपातयत भूतले
karṇasteṣām āpatatām ekaikena kṣureṇa ha
dhanūṃṣi saśarāvāpānyapātayata bhūtale
- 18
ततो विधनुषः कांश्चित्कांश्चिद् उद्यतकार्मुकान्
कांश्चिद् उद्वहतो बाणान्रथशक्तिगदास्तथा
tato vidhanuṣaḥ kāṃścitkāṃścid udyatakārmukān
kāṃścid udvahato bāṇānrathaśaktigadāstathā
- 19
लाघवाद् आकुलीकृत्य कर्णः प्रहरतां वरः
हतसूतांश्च भूयिष्ठान् अवजिग्ये नराधिपान्
lāghavād ākulīkṛtya karṇaḥ praharatāṃ varaḥ
hatasūtāṃśca bhūyiṣṭhān avajigye narādhipān
- 20
ते स्वयं त्वरयन्तो ऽश्वान्याहि याहीति वादिनः
व्यपेयुस्ते रणं हित्वा राजानो भग्नमानसाः
te svayaṃ tvarayanto 'śvānyāhi yāhīti vādinaḥ
vyapeyuste raṇaṃ hitvā rājāno bhagnamānasāḥ
- 21
दुर्योधनस्तु कर्णेन पाल्यमानो ऽभ्ययात्तदा
हृष्टः कन्याम् उपादाय नगरं नागसाह्वयम्
duryodhanastu karṇena pālyamāno 'bhyayāttadā
hṛṣṭaḥ kanyām upādāya nagaraṃ nāgasāhvayam

