12 shlokas
- 1
युधिष्ठिर उवाच
हताः पुत्राश्च पौत्राश्च भ्रातरः पितरस्तथा
श्वशुरा गुरवश्चैव मातुलाः सपितामहाः
yudhiṣṭhira uvāca
hatāḥ putrāśca pautrāśca bhrātaraḥ pitarastathā
śvaśurā guravaścaiva mātulāḥ sapitāmahāḥ
- 2
क्षत्रियाश्च महात्मानः संबन्धिसुहृदस्तथा
वयस्या ज्ञातयश्चैव भ्रातरश्च पितामह
kṣatriyāśca mahātmānaḥ saṃbandhisuhṛdastathā
vayasyā jñātayaścaiva bhrātaraśca pitāmaha
- 3
बहवश्च मनुष्येन्द्रा नानादेशसमागताः
घातिता राज्यलुब्धेन मयैकेन पितामह
bahavaśca manuṣyendrā nānādeśasamāgatāḥ
ghātitā rājyalubdhena mayaikena pitāmaha
- 4
तांस्तादृशान् अहं हत्वा धर्मनित्यान्महीक्षितः
असकृत्सोमपान्वीरान्किं प्राप्स्यामि तपोधन
tāṃstādṛśān ahaṃ hatvā dharmanityānmahīkṣitaḥ
asakṛtsomapānvīrānkiṃ prāpsyāmi tapodhana
- 5
दह्याम्यनिशम् अद्याहं चिन्तयानः पुनः पुनः
हीनां पार्थिवसिंहैस्तैः श्रीमद्भिः पृथिवीम् इमाम्
dahyāmyaniśam adyāhaṃ cintayānaḥ punaḥ punaḥ
hīnāṃ pārthivasiṃhaistaiḥ śrīmadbhiḥ pṛthivīm imām
- 6
दृष्ट्वा ज्ञातिवधं घोरं हतांश्च शतशः परान्
कोटिशश्च नरान् अन्यान्परितप्ये पितामह
dṛṣṭvā jñātivadhaṃ ghoraṃ hatāṃśca śataśaḥ parān
koṭiśaśca narān anyānparitapye pitāmaha
- 7
का नु तासां वरस्त्रीणाम् अवस्थाद्य भविष्यति
विहीनानां स्वतनयैः पतिभिर्भ्रातृभिस्तथा
kā nu tāsāṃ varastrīṇām avasthādya bhaviṣyati
vihīnānāṃ svatanayaiḥ patibhirbhrātṛbhistathā
- 8
अस्मान् अन्तकरान्घोरान्पाण्डवान्वृष्णिसंहितान्
आक्रोशन्त्यः कृशा दीना निपतन्त्यश्च भूतले
asmān antakarānghorānpāṇḍavānvṛṣṇisaṃhitān
ākrośantyaḥ kṛśā dīnā nipatantyaśca bhūtale
- 9
अपश्यन्त्यः पितॄन्भ्रातॄन्पतीन्पुत्रांश्च योषितः
त्यक्त्वा प्राणान्प्रियान्सर्वा गमिष्यन्ति यमक्षयम्
apaśyantyaḥ pitṝnbhrātṝnpatīnputrāṃśca yoṣitaḥ
tyaktvā prāṇānpriyānsarvā gamiṣyanti yamakṣayam
- 10
वत्सलत्वाद्द्विजश्रेष्ठ तत्र मे नास्ति संशयः
व्यक्तं सौक्ष्म्याच्च धर्मस्य प्राप्स्यामः स्त्रीवधं वयम्
vatsalatvāddvijaśreṣṭha tatra me nāsti saṃśayaḥ
vyaktaṃ saukṣmyācca dharmasya prāpsyāmaḥ strīvadhaṃ vayam
- 11
ते वयं सुहृदो हत्वा कृत्वा पापम् अनन्तकम्
नरके निपतिष्यामो ह्यधःशिरस एव च
te vayaṃ suhṛdo hatvā kṛtvā pāpam anantakam
narake nipatiṣyāmo hyadhaḥśirasa eva ca
- 12
शरीराणि विमोक्ष्यामस्तपसोग्रेण सत्तम
आश्रमांश्च विशेषांस्त्वं ममाचक्ष्व पितामह
śarīrāṇi vimokṣyāmastapasogreṇa sattama
āśramāṃśca viśeṣāṃstvaṃ mamācakṣva pitāmaha

