12 shlokas
- 1
वैशंपायन उवाच
ततो युधिष्ठिरो राजा ज्ञातीनां ये हता मृधे
श्राद्धानि कारयामास तेषां पृथग् उदारधीः
vaiśaṃpāyana uvāca
tato yudhiṣṭhiro rājā jñātīnāṃ ye hatā mṛdhe
śrāddhāni kārayāmāsa teṣāṃ pṛthag udāradhīḥ
- 2
धृतराष्ट्रो ददौ राजा पुत्राणाम् और्ध्वदेहिकम्
सर्वकामगुणोपेतम् अन्नं गाश्च धनानि च
रत्नानि च विचित्राणि महार्हाणि महायशाः
dhṛtarāṣṭro dadau rājā putrāṇām aurdhvadehikam
sarvakāmaguṇopetam annaṃ gāśca dhanāni ca
ratnāni ca vicitrāṇi mahārhāṇi mahāyaśāḥ
- 3
युधिष्ठिरस्तु कर्णस्य द्रोणस्य च महात्मनः
धृष्टद्युम्नाभिमन्युभ्यां हैडिम्बस्य च रक्षसः
yudhiṣṭhirastu karṇasya droṇasya ca mahātmanaḥ
dhṛṣṭadyumnābhimanyubhyāṃ haiḍimbasya ca rakṣasaḥ
- 4
विराटप्रभृतीनां च सुहृदाम् उपकारिणाम्
द्रुपदद्रौपदेयानां द्रौपद्या सहितो ददौ
virāṭaprabhṛtīnāṃ ca suhṛdām upakāriṇām
drupadadraupadeyānāṃ draupadyā sahito dadau
- 5
ब्राह्मणानां सहस्राणि पृथग् एकैकम् उद्दिशन्
धनैश्च वस्त्रै रत्नैश्च गोभिश्च समतर्पयत्
brāhmaṇānāṃ sahasrāṇi pṛthag ekaikam uddiśan
dhanaiśca vastrai ratnaiśca gobhiśca samatarpayat
- 6
ये चान्ये पृथिवीपाला येषां नास्ति सुहृज्जनः
उद्दिश्योद्दिश्य तेषां च चक्रे राजौर्ध्वदैहिकम्
ye cānye pṛthivīpālā yeṣāṃ nāsti suhṛjjanaḥ
uddiśyoddiśya teṣāṃ ca cakre rājaurdhvadaihikam
- 7
सभाः प्रपाश्च विविधास्तडागानि च पाण्डवः
सुहृदां कारयामास सर्वेषाम् और्ध्वदैहिकम्
sabhāḥ prapāśca vividhāstaḍāgāni ca pāṇḍavaḥ
suhṛdāṃ kārayāmāsa sarveṣām aurdhvadaihikam
- 8
स तेषाम् अनृणो भूत्वा गत्वा लोकेष्ववाच्यताम्
कृतकृत्यो ऽभवद्राजा प्रजा धर्मेण पालयन्
sa teṣām anṛṇo bhūtvā gatvā lokeṣvavācyatām
kṛtakṛtyo 'bhavadrājā prajā dharmeṇa pālayan
- 9
धृतराष्ट्रं यथापूर्वं गान्धारीं विदुरं तथा
सर्वांश्च कौरवामात्यान्भृत्यांश्च समपूजयत्
dhṛtarāṣṭraṃ yathāpūrvaṃ gāndhārīṃ viduraṃ tathā
sarvāṃśca kauravāmātyānbhṛtyāṃśca samapūjayat
- 10
याश्च तत्र स्त्रियः काश्चिद्धतवीरा हतात्मजाः
सर्वास्ताः कौरवो राजा सम्पूज्यापालयद्घृणी
yāśca tatra striyaḥ kāściddhatavīrā hatātmajāḥ
sarvāstāḥ kauravo rājā sampūjyāpālayadghṛṇī
- 11
दीनान्धकृपणानां च गृहाच्छादनभोजनैः
आनृशंस्यपरो राजा चकारानुग्रहं प्रभुः
dīnāndhakṛpaṇānāṃ ca gṛhācchādanabhojanaiḥ
ānṛśaṃsyaparo rājā cakārānugrahaṃ prabhuḥ
- 12
स विजित्य महीं कृत्स्नाम् आनृण्यं प्राप्य वैरिषु
निःसपत्नः सुखी राजा विजहार युधिष्ठिरः
sa vijitya mahīṃ kṛtsnām ānṛṇyaṃ prāpya vairiṣu
niḥsapatnaḥ sukhī rājā vijahāra yudhiṣṭhiraḥ

