17 shlokas
- 1
वैशंपायन उवाच
अभिषिक्तो महाप्राज्ञो राज्यं प्राप्य युधिष्ठिरः
दाशार्हं पुण्डरीकाक्षम् उवाच प्राञ्जलिः शुचिः
vaiśaṃpāyana uvāca
abhiṣikto mahāprājño rājyaṃ prāpya yudhiṣṭhiraḥ
dāśārhaṃ puṇḍarīkākṣam uvāca prāñjaliḥ śuciḥ
- 2
तव कृष्ण प्रसादेन नयेन च बलेन च
बुद्ध्या च यदुशार्दूल तथा विक्रमणेन च
tava kṛṣṇa prasādena nayena ca balena ca
buddhyā ca yaduśārdūla tathā vikramaṇena ca
- 3
पुनः प्राप्तम् इदं राज्यं पितृपैतामहं मया
नमस्ते पुण्डरीकाक्ष पुनः पुनर् अरिंदम
punaḥ prāptam idaṃ rājyaṃ pitṛpaitāmahaṃ mayā
namaste puṇḍarīkākṣa punaḥ punar ariṃdama
- 4
त्वाम् एकम् आहुः पुरुषं त्वाम् आहुः सात्वतां पतिम्
नामभिस्त्वां बहुविधैः स्तुवन्ति परमर्षयः
tvām ekam āhuḥ puruṣaṃ tvām āhuḥ sātvatāṃ patim
nāmabhistvāṃ bahuvidhaiḥ stuvanti paramarṣayaḥ
- 5
विश्वकर्मन्नमस्ते ऽस्तु विश्वात्मन्विश्वसंभव
विष्णो जिष्णो हरे कृष्ण वैकुण्ठ पुरुषोत्तम
viśvakarmannamaste 'stu viśvātmanviśvasaṃbhava
viṣṇo jiṣṇo hare kṛṣṇa vaikuṇṭha puruṣottama
- 6
अदित्याः सप्तरात्रं तु पुराणे गर्भतां गतः
पृश्निगर्भस्त्वम् एवैकस्त्रियुगं त्वां वदन्त्यपि
adityāḥ saptarātraṃ tu purāṇe garbhatāṃ gataḥ
pṛśnigarbhastvam evaikastriyugaṃ tvāṃ vadantyapi
- 7
शुचिश्रवा हृषीकेशो घृतार्चिर्हंस उच्यसे
त्रिचक्षुः शम्भुर् एकस्त्वं विभुर्दामोदरो ऽपि च
śuciśravā hṛṣīkeśo ghṛtārcirhaṃsa ucyase
tricakṣuḥ śambhur ekastvaṃ vibhurdāmodaro 'pi ca
- 8
वराहो ऽग्निर्बृहद्भानुर्वृषणस्तार्क्ष्यलक्षणः
अनीकसाहः पुरुषः शिपिविष्ट उरुक्रमः
varāho 'gnirbṛhadbhānurvṛṣaṇastārkṣyalakṣaṇaḥ
anīkasāhaḥ puruṣaḥ śipiviṣṭa urukramaḥ
- 9
वाचिष्ठ उग्रः सेनानीः सत्यो वाजसनिर्गुहः
अच्युतश्च्यावनो ऽरीणां संकृतिर्विकृतिर्वृषः
vāciṣṭha ugraḥ senānīḥ satyo vājasanirguhaḥ
acyutaścyāvano 'rīṇāṃ saṃkṛtirvikṛtirvṛṣaḥ
- 10
कृतवर्त्मा त्वम् एवाद्रिर्वृषगर्भो वृषाकपिः
सिन्धुक्षिद् ऊर्मिस्त्रिककुत्त्रिधामा त्रिवृद् अच्युतः
kṛtavartmā tvam evādrirvṛṣagarbho vṛṣākapiḥ
sindhukṣid ūrmistrikakuttridhāmā trivṛd acyutaḥ
- 11
सम्राड्विराट्स्वराट्चैव सुरराड्धर्मदो भवः
विभुर्भूर् अभिभूः कृष्णः कृष्णवर्त्मा त्वम् एव च
samrāḍvirāṭsvarāṭcaiva surarāḍdharmado bhavaḥ
vibhurbhūr abhibhūḥ kṛṣṇaḥ kṛṣṇavartmā tvam eva ca
- 12
स्विष्टकृद्भिषगावर्तः कपिलस्त्वं च वामनः
यज्ञो ध्रुवः पतंगश्च जयत्सेनस्त्वम् उच्यसे
sviṣṭakṛdbhiṣagāvartaḥ kapilastvaṃ ca vāmanaḥ
yajño dhruvaḥ pataṃgaśca jayatsenastvam ucyase
- 13
शिखण्डी नहुषो बभ्रुर्दिवस्पृक्त्वं पुनर्वसुः
सुबभ्रुर् उक्षो रुक्मस्त्वं सुषेणो दुन्दुभिस्तथा
śikhaṇḍī nahuṣo babhrurdivaspṛktvaṃ punarvasuḥ
subabhrur ukṣo rukmastvaṃ suṣeṇo dundubhistathā
- 14
गभस्तिनेमिः श्रीपद्मं पुष्करं पुष्पधारणः
ऋभुर्विभुः सर्वसूक्ष्मस्त्वं सावित्रं च पठ्यसे
gabhastinemiḥ śrīpadmaṃ puṣkaraṃ puṣpadhāraṇaḥ
ṛbhurvibhuḥ sarvasūkṣmastvaṃ sāvitraṃ ca paṭhyase
- 15
अम्भोनिधिस्त्वं ब्रह्मा त्वं पवित्रं धाम धन्व च
हिरण्यगर्भं त्वाम् आहुः स्वधा स्वाहा च केशव
ambhonidhistvaṃ brahmā tvaṃ pavitraṃ dhāma dhanva ca
hiraṇyagarbhaṃ tvām āhuḥ svadhā svāhā ca keśava
- 16
योनिस्त्वम् अस्य प्रलयश्च कृष्ण त्वम् एवेदं सृजसि विश्वम् अग्रे
विश्वं चेदं त्वद्वशे विश्वयोने नमो ऽस्तु ते शार्ङ्गचक्रासिपाणे
yonistvam asya pralayaśca kṛṣṇa tvam evedaṃ sṛjasi viśvam agre
viśvaṃ cedaṃ tvadvaśe viśvayone namo 'stu te śārṅgacakrāsipāṇe
- 17
एवं स्तुतो धर्मराजेन कृष्णः सभामध्ये प्रीतिमान्पुष्कराक्षः
तम् अभ्यनन्दद्भारतं पुष्कलाभिर्वाग्भिर्ज्येष्ठं पाण्डवं यादवाग्र्यः
evaṃ stuto dharmarājena kṛṣṇaḥ sabhāmadhye prītimānpuṣkarākṣaḥ
tam abhyanandadbhārataṃ puṣkalābhirvāgbhirjyeṣṭhaṃ pāṇḍavaṃ yādavāgryaḥ

