28 shlokas
- 1
वैशम्पायन उवाच
ततः प्रयान्तं कौन्तेयं ब्राह्मणा वनवासिनः
अभिगम्य तदा राजन्न् इदं वचनम् अब्रुवन्
vaiśampāyana uvāca
tataḥ prayāntaṃ kaunteyaṃ brāhmaṇā vanavāsinaḥ
abhigamya tadā rājann idaṃ vacanam abruvan
- 2
राजंस्तीर्थानि गन्तासि पुण्यानि भ्रातृभिः सह
देवर्षिणा च सहितो लोमशेन महात्मना
rājaṃstīrthāni gantāsi puṇyāni bhrātṛbhiḥ saha
devarṣiṇā ca sahito lomaśena mahātmanā
- 3
अस्मान् अपि महाराज नेतुम् अर्हसि पाण्डव
अस्माभिर्हि न शक्यानि त्वद् ऋते तानि कौरव
asmān api mahārāja netum arhasi pāṇḍava
asmābhirhi na śakyāni tvad ṛte tāni kaurava
- 4
श्वापदैर् उपसृष्टानि दुर्गाणि विषमाणि च
अगम्यानि नरैर् अल्पैस्तीर्थानि मनुजेश्वर
śvāpadair upasṛṣṭāni durgāṇi viṣamāṇi ca
agamyāni narair alpaistīrthāni manujeśvara
- 5
भवन्तो भ्रातरः शूरा धनुर्धरवराः सदा
भवद्भिः पालिताः शूरैर्गच्छेम वयम् अप्य् उत
bhavanto bhrātaraḥ śūrā dhanurdharavarāḥ sadā
bhavadbhiḥ pālitāḥ śūrairgacchema vayam apy uta
- 6
भवत्प्रसादाद्धि वयं प्राप्नुयाम फलं शुभम्
तीर्थानां पृथिवीपाल व्रतानां च विशां पते
bhavatprasādāddhi vayaṃ prāpnuyāma phalaṃ śubham
tīrthānāṃ pṛthivīpāla vratānāṃ ca viśāṃ pate
- 7
तव वीर्यपरित्राताः शुद्धास्तीर्थपरिप्लुताः
भवेम धूतपाप्मानस्तीर्थसंदर्शनान्नृप
tava vīryaparitrātāḥ śuddhāstīrthapariplutāḥ
bhavema dhūtapāpmānastīrthasaṃdarśanānnṛpa
- 8
भवान् अपि नरेन्द्रस्य कार्तवीर्यस्य भारत
अष्टकस्य च राजर्षेर्लोमपादस्य चैव ह
bhavān api narendrasya kārtavīryasya bhārata
aṣṭakasya ca rājarṣerlomapādasya caiva ha
- 9
भरतस्य च वीरस्य सार्वभौमस्य पार्थिव
ध्रुवं प्राप्स्यसि दुष्प्रापांल्लोकांस्तीर्थपरिप्लुतः
bharatasya ca vīrasya sārvabhaumasya pārthiva
dhruvaṃ prāpsyasi duṣprāpāṃllokāṃstīrthapariplutaḥ
- 10
प्रभासादीनि तीर्थानि महेन्द्रादींश्च पर्वतान्
गङ्गाद्याः सरितश्चैव प्लक्षादींश्च वनस्पतीन्
त्वया सह महीपाल द्रष्टुम् इच्छामहे वयम्
prabhāsādīni tīrthāni mahendrādīṃśca parvatān
gaṅgādyāḥ saritaścaiva plakṣādīṃśca vanaspatīn
tvayā saha mahīpāla draṣṭum icchāmahe vayam
- 11
यदि ते ब्राह्मणेष्वस्ति काचित्प्रीतिर्जनाधिप
कुरु क्षिप्रं वचो ऽस्माकं ततः श्रेयो ऽभिपत्स्यसे
yadi te brāhmaṇeṣvasti kācitprītirjanādhipa
kuru kṣipraṃ vaco 'smākaṃ tataḥ śreyo 'bhipatsyase
- 12
तीर्थानि हि महाबाहो तपोविघ्नकरैः सदा
अनुकीर्णानि रक्षोभिस्तेभ्यो नस्त्रातुम् अर्हसि
tīrthāni hi mahābāho tapovighnakaraiḥ sadā
anukīrṇāni rakṣobhistebhyo nastrātum arhasi
- 13
तीर्थान्युक्तानि धौम्येन नारदेन च धीमता
यान्य् उवाच च देवर्षिर्लोमशः सुमहातपाः
tīrthānyuktāni dhaumyena nāradena ca dhīmatā
yāny uvāca ca devarṣirlomaśaḥ sumahātapāḥ
- 14
विधिवत्तानि सर्वाणि पर्यटस्व नराधिप
धूतपाप्मा सहास्माभिर्लोमशेन च पालितः
vidhivattāni sarvāṇi paryaṭasva narādhipa
dhūtapāpmā sahāsmābhirlomaśena ca pālitaḥ
- 15
स तथा पूज्यमानस्तैर्हर्षाद् अश्रुपरिप्लुतः
भीमसेनादिभिर्वीरैर्भ्रातृभिः परिवारितः
बाढम् इत्य् अब्रवीत्सर्वांस्तान् ऋषीन्पाण्डवर्षभः
sa tathā pūjyamānastairharṣād aśrupariplutaḥ
bhīmasenādibhirvīrairbhrātṛbhiḥ parivāritaḥ
bāḍham ity abravītsarvāṃstān ṛṣīnpāṇḍavarṣabhaḥ
- 16
लोमशं समनुज्ञाप्य धौम्यं चैव पुरोहितम्
ततः स पाण्डवश्रेष्ठो भ्रातृभिः सहितो वशी
द्रौपद्या चानवद्याङ्ग्या गमनाय मनो दधे
lomaśaṃ samanujñāpya dhaumyaṃ caiva purohitam
tataḥ sa pāṇḍavaśreṣṭho bhrātṛbhiḥ sahito vaśī
draupadyā cānavadyāṅgyā gamanāya mano dadhe
- 17
अथ व्यासो महाभागस्तथा नारदपर्वतौ
काम्यके पाण्डवं द्रष्टुं समाजग्मुर्मनीषिणः
atha vyāso mahābhāgastathā nāradaparvatau
kāmyake pāṇḍavaṃ draṣṭuṃ samājagmurmanīṣiṇaḥ
- 18
तेषां युधिष्ठिरो राजा पूजां चक्रे यथाविधि
सत्कृतास्ते महाभागा युधिष्ठिरम् अथाब्रुवन्
teṣāṃ yudhiṣṭhiro rājā pūjāṃ cakre yathāvidhi
satkṛtāste mahābhāgā yudhiṣṭhiram athābruvan
- 19
युधिष्ठिर यमौ भीम मनसा कुरुतार्जवम्
मनसा कृतशौचा वै शुद्धास्तीर्थानि गच्छत
yudhiṣṭhira yamau bhīma manasā kurutārjavam
manasā kṛtaśaucā vai śuddhāstīrthāni gacchata
- 20
शरीरनियमं ह्याहुर्ब्राह्मणा मानुषं व्रतम्
मनोविशुद्धां बुद्धिं च दैवम् आहुर्व्रतं द्विजाः
śarīraniyamaṃ hyāhurbrāhmaṇā mānuṣaṃ vratam
manoviśuddhāṃ buddhiṃ ca daivam āhurvrataṃ dvijāḥ
- 21
मनो ह्यदुष्टं शूराणां पर्याप्तं वै नराधिप
मैत्रीं बुद्धिं समास्थाय शुद्धास्तीर्थानि गच्छत
mano hyaduṣṭaṃ śūrāṇāṃ paryāptaṃ vai narādhipa
maitrīṃ buddhiṃ samāsthāya śuddhāstīrthāni gacchata
- 22
ते यूयं मानसैः शुद्धाः शरीरनियमव्रतैः
दैवं व्रतं समास्थाय यथोक्तं फलम् आप्स्यथ
te yūyaṃ mānasaiḥ śuddhāḥ śarīraniyamavrataiḥ
daivaṃ vrataṃ samāsthāya yathoktaṃ phalam āpsyatha
- 23
ते तथेति प्रतिज्ञाय कृष्णया सह पाण्डवाः
कृतस्वस्त्ययनाः सर्वे मुनिभिर्दिव्यमानुषैः
te tatheti pratijñāya kṛṣṇayā saha pāṇḍavāḥ
kṛtasvastyayanāḥ sarve munibhirdivyamānuṣaiḥ
- 24
लोमशस्योपसंगृह्य पादौ द्वैपायनस्य च
नारदस्य च राजेन्द्र देवर्षेः पर्वतस्य च
lomaśasyopasaṃgṛhya pādau dvaipāyanasya ca
nāradasya ca rājendra devarṣeḥ parvatasya ca
- 25
धौम्येन सहिता वीरास्तथान्यैर्वनवासिभिः
मार्गशीर्ष्याम् अतीतायां पुष्येण प्रययुस्ततः
dhaumyena sahitā vīrāstathānyairvanavāsibhiḥ
mārgaśīrṣyām atītāyāṃ puṣyeṇa prayayustataḥ
- 26
कठिनानि समादाय चीराजिनजटाधराः
अभेद्यैः कवचैर्युक्तास्तीर्थान्यन्वचरंस्तदा
kaṭhināni samādāya cīrājinajaṭādharāḥ
abhedyaiḥ kavacairyuktāstīrthānyanvacaraṃstadā
- 27
इन्द्रसेनादिभिर्भृत्यै रथैः परिचतुर्दशैः
महानसव्यापृतैश्च तथान्यैः परिचारकैः
indrasenādibhirbhṛtyai rathaiḥ paricaturdaśaiḥ
mahānasavyāpṛtaiśca tathānyaiḥ paricārakaiḥ
- 28
सायुधा बद्धनिस्त्रिंशास्तूणवन्तः समार्गणाः
प्राङ्मुखाः प्रययुर्वीराः पाण्डवा जनमेजय
sāyudhā baddhanistriṃśāstūṇavantaḥ samārgaṇāḥ
prāṅmukhāḥ prayayurvīrāḥ pāṇḍavā janamejaya

