13 shlokas
- 1
बृहदश्व उवाच
वृते तु नैषधे भैम्या लोकपाला महौजसः
यान्तो ददृशुर् आयान्तं द्वापरं कलिना सह
bṛhadaśva uvāca
vṛte tu naiṣadhe bhaimyā lokapālā mahaujasaḥ
yānto dadṛśur āyāntaṃ dvāparaṃ kalinā saha
- 2
अथाब्रवीत्कलिं शक्रः सम्प्रेक्ष्य बलवृत्रहा
द्वापरेण सहायेन कले ब्रूहि क्व यास्यसि
athābravītkaliṃ śakraḥ samprekṣya balavṛtrahā
dvāpareṇa sahāyena kale brūhi kva yāsyasi
- 3
ततो ऽब्रवीत्कलिः शक्रं दमयन्त्याः स्वयंवरम्
गत्वाहं वरयिष्ये तां मनो हि मम तद्गतम्
tato 'bravītkaliḥ śakraṃ damayantyāḥ svayaṃvaram
gatvāhaṃ varayiṣye tāṃ mano hi mama tadgatam
- 4
तम् अब्रवीत्प्रहस्येन्द्रो निर्वृत्तः स स्वयंवरः
वृतस्तया नलो राजा पतिर् अस्मत्समीपतः
tam abravītprahasyendro nirvṛttaḥ sa svayaṃvaraḥ
vṛtastayā nalo rājā patir asmatsamīpataḥ
- 5
एवम् उक्तस्तु शक्रेण कलिः कोपसमन्वितः
देवान् आमन्त्र्य तान्सर्वान् उवाचेदं वचस्तदा
evam uktastu śakreṇa kaliḥ kopasamanvitaḥ
devān āmantrya tānsarvān uvācedaṃ vacastadā
- 6
देवानां मानुषं मध्ये यत्सा पतिम् अविन्दत
ननु तस्या भवेन्न्याय्यं विपुलं दण्डधारणम्
devānāṃ mānuṣaṃ madhye yatsā patim avindata
nanu tasyā bhavennyāyyaṃ vipulaṃ daṇḍadhāraṇam
- 7
एवम् उक्ते तु कलिना प्रत्यूचुस्ते दिवौकसः
अस्माभिः समनुज्ञातो दमयन्त्या नलो वृतः
evam ukte tu kalinā pratyūcuste divaukasaḥ
asmābhiḥ samanujñāto damayantyā nalo vṛtaḥ
- 8
कश्च सर्वगुणोपेतं नाश्रयेत नलं नृपम्
यो वेद धर्मान् अखिलान्यथावच्चरितव्रतः
kaśca sarvaguṇopetaṃ nāśrayeta nalaṃ nṛpam
yo veda dharmān akhilānyathāvaccaritavrataḥ
- 9
यस्मिन्सत्यं धृतिर्दानं तपः शौचं दमः शमः
ध्रुवाणि पुरुषव्याघ्रे लोकपालसमे नृपे
yasminsatyaṃ dhṛtirdānaṃ tapaḥ śaucaṃ damaḥ śamaḥ
dhruvāṇi puruṣavyāghre lokapālasame nṛpe
- 10
आत्मानं स शपेन्मूढो हन्याच्चात्मानम् आत्मना
एवंगुणं नलं यो वै कामयेच्छपितुं कले
ātmānaṃ sa śapenmūḍho hanyāccātmānam ātmanā
evaṃguṇaṃ nalaṃ yo vai kāmayecchapituṃ kale
- 11
कृच्छ्रे स नरके मज्जेद् अगाधे विपुले ऽप्लवे
एवम् उक्त्वा कलिं देवा द्वापरं च दिवं ययुः
kṛcchre sa narake majjed agādhe vipule 'plave
evam uktvā kaliṃ devā dvāparaṃ ca divaṃ yayuḥ
- 12
ततो गतेषु देवेषु कलिर्द्वापरम् अब्रवीत्
संहर्तुं नोत्सहे कोपं नले वत्स्यामि द्वापर
tato gateṣu deveṣu kalirdvāparam abravīt
saṃhartuṃ notsahe kopaṃ nale vatsyāmi dvāpara
- 13
भ्रंशयिष्यामि तं राज्यान्न भैम्या सह रंस्यते
त्वम् अप्यक्षान्समाविश्य कर्तुं साहाय्यम् अर्हसि
bhraṃśayiṣyāmi taṃ rājyānna bhaimyā saha raṃsyate
tvam apyakṣānsamāviśya kartuṃ sāhāyyam arhasi

