15 shlokas
- 1
मार्कण्डेय उवाच
ग्रहाः सोपग्रहाश्चैव ऋषयो मातरस्तथा
हुताशनमुखाश्चापि दीप्ताः पारिषदां गणाः
mārkaṇḍeya uvāca
grahāḥ sopagrahāścaiva ṛṣayo mātarastathā
hutāśanamukhāścāpi dīptāḥ pāriṣadāṃ gaṇāḥ
- 2
एते चान्ये च बहवो घोरास्त्रिदिववासिनः
परिवार्य महासेनं स्थिता मातृगणैः सह
ete cānye ca bahavo ghorāstridivavāsinaḥ
parivārya mahāsenaṃ sthitā mātṛgaṇaiḥ saha
- 3
संदिग्धं विजयं दृष्ट्वा विजयेप्सुः सुरेश्वरः
आरुह्यैरावतस्कन्धं प्रययौ दैवतैः सह
विजिघांसुर्महासेनम् इन्द्रस्तूर्णतरं ययौ
saṃdigdhaṃ vijayaṃ dṛṣṭvā vijayepsuḥ sureśvaraḥ
āruhyairāvataskandhaṃ prayayau daivataiḥ saha
vijighāṃsurmahāsenam indrastūrṇataraṃ yayau
- 4
उग्रं तच्च महावेगं देवानीकं महाप्रभम्
विचित्रध्वजसंनाहं नानावाहनकार्मुकम्
प्रवराम्बरसंवीतं श्रिया जुष्टम् अलंकृतम्
ugraṃ tacca mahāvegaṃ devānīkaṃ mahāprabham
vicitradhvajasaṃnāhaṃ nānāvāhanakārmukam
pravarāmbarasaṃvītaṃ śriyā juṣṭam alaṃkṛtam
- 5
विजिघांसुं तदायान्तं कुमारः शक्रम् अभ्ययात्
विनदन्पथि शक्रस्तु द्रुतं याति महाबलः
संहर्षयन्देवसेनां जिघांसुः पावकात्मजम्
vijighāṃsuṃ tadāyāntaṃ kumāraḥ śakram abhyayāt
vinadanpathi śakrastu drutaṃ yāti mahābalaḥ
saṃharṣayandevasenāṃ jighāṃsuḥ pāvakātmajam
- 6
सम्पूज्यमानस्त्रिदशैस्तथैव परमर्षिभिः
समीपम् उपसंप्राप्तः कार्त्तिकेयस्य वासवः
sampūjyamānastridaśaistathaiva paramarṣibhiḥ
samīpam upasaṃprāptaḥ kārttikeyasya vāsavaḥ
- 7
सिंहनादं ततश्चक्रे देवेशः सहितः सुरैः
गुहो ऽपि शब्दं तं श्रुत्वा व्यनदत्सागरो यथा
siṃhanādaṃ tataścakre deveśaḥ sahitaḥ suraiḥ
guho 'pi śabdaṃ taṃ śrutvā vyanadatsāgaro yathā
- 8
तस्य शब्देन महता समुद्धूतोदधिप्रभम्
बभ्राम तत्र तत्रैव देवसैन्यम् अचेतनम्
tasya śabdena mahatā samuddhūtodadhiprabham
babhrāma tatra tatraiva devasainyam acetanam
- 9
जिघांसून् उपसंप्राप्तान्देवान्दृष्ट्वा स पावकिः
विससर्ज मुखात्क्रुद्धः प्रवृद्धाः पावकार्चिषः
ता देवसैन्यान्यदहन्वेष्टमानानि भूतले
jighāṃsūn upasaṃprāptāndevāndṛṣṭvā sa pāvakiḥ
visasarja mukhātkruddhaḥ pravṛddhāḥ pāvakārciṣaḥ
tā devasainyānyadahanveṣṭamānāni bhūtale
- 10
ते प्रदीप्तशिरोदेहाः प्रदीप्तायुधवाहनाः
प्रच्युताः सहसा भान्ति चित्रास्तारागणा इव
te pradīptaśirodehāḥ pradīptāyudhavāhanāḥ
pracyutāḥ sahasā bhānti citrāstārāgaṇā iva
- 11
दह्यमानाः प्रपन्नास्ते शरणं पावकात्मजम्
देवा वज्रधरं त्यक्त्वा ततः शान्तिम् उपागताः
dahyamānāḥ prapannāste śaraṇaṃ pāvakātmajam
devā vajradharaṃ tyaktvā tataḥ śāntim upāgatāḥ
- 12
त्यक्तो देवैस्ततः स्कन्दे वज्रं शक्रो ऽभ्यवासृजत्
तद्विसृष्टं जघानाशु पार्श्वं स्कन्दस्य दक्षिणम्
बिभेद च महाराज पार्श्वं तस्य महात्मनः
tyakto devaistataḥ skande vajraṃ śakro 'bhyavāsṛjat
tadvisṛṣṭaṃ jaghānāśu pārśvaṃ skandasya dakṣiṇam
bibheda ca mahārāja pārśvaṃ tasya mahātmanaḥ
- 13
वज्रप्रहारात्स्कन्दस्य संजातः पुरुषो ऽपरः
युवा काञ्चनसंनाहः शक्तिधृग्दिव्यकुण्डलः
यद्वज्रविशनाज्जातो विशाखस्तेन सो ऽभवत्
vajraprahārātskandasya saṃjātaḥ puruṣo 'paraḥ
yuvā kāñcanasaṃnāhaḥ śaktidhṛgdivyakuṇḍalaḥ
yadvajraviśanājjāto viśākhastena so 'bhavat
- 14
तं जातम् अपरं दृष्ट्वा कालानलसमद्युतिम्
भयाद् इन्द्रस्ततः स्कन्दं प्राञ्जलिः शरणं गतः
taṃ jātam aparaṃ dṛṣṭvā kālānalasamadyutim
bhayād indrastataḥ skandaṃ prāñjaliḥ śaraṇaṃ gataḥ
- 15
तस्याभयं ददौ स्कन्दः सहसैन्यस्य सत्तम
ततः प्रहृष्टास्त्रिदशा वादित्राण्यभ्यवादयन्
tasyābhayaṃ dadau skandaḥ sahasainyasya sattama
tataḥ prahṛṣṭāstridaśā vāditrāṇyabhyavādayan

