18 shlokas
- 1
वैशम्पायन उवाच
निदाघान्तकरः कालः सर्वभूतसुखावहः
तत्रैव वसतां तेषां प्रावृट्समभिपद्यत
vaiśampāyana uvāca
nidāghāntakaraḥ kālaḥ sarvabhūtasukhāvahaḥ
tatraiva vasatāṃ teṣāṃ prāvṛṭsamabhipadyata
- 2
छादयन्तो महाघोषाः खं दिशश्च बलाहकाः
प्रववर्षुर्दिवारात्रम् असिताः सततं तदा
chādayanto mahāghoṣāḥ khaṃ diśaśca balāhakāḥ
pravavarṣurdivārātram asitāḥ satataṃ tadā
- 3
तपात्ययनिकेताश्च शतशो ऽथ सहस्रशः
अपेतार्कप्रभाजालाः सविद्युद्विमलप्रभाः
tapātyayaniketāśca śataśo 'tha sahasraśaḥ
apetārkaprabhājālāḥ savidyudvimalaprabhāḥ
- 4
विरूढशष्पा पृथिवी मत्तदंशसरीसृपा
बभूव पयसा सिक्ता शान्तधूमरजोऽरुणा
virūḍhaśaṣpā pṛthivī mattadaṃśasarīsṛpā
babhūva payasā siktā śāntadhūmarajo'ruṇā
- 5
न स्म प्रज्ञायते किंचिद् अम्भसा समवस्तृते
समं वा विषमं वापि नद्यो वा स्थावराणि वा
na sma prajñāyate kiṃcid ambhasā samavastṛte
samaṃ vā viṣamaṃ vāpi nadyo vā sthāvarāṇi vā
- 6
क्षुब्धतोया महाघोषाः श्वसमाना इवाशुगाः
सिन्धवः शोभयांचक्रुः काननानि तपात्यये
kṣubdhatoyā mahāghoṣāḥ śvasamānā ivāśugāḥ
sindhavaḥ śobhayāṃcakruḥ kānanāni tapātyaye
- 7
नदतां काननान्तेषु श्रूयन्ते विविधाः स्वनाः
वृष्टिभिस्ताड्यमानानां वराहमृगपक्षिणाम्
nadatāṃ kānanānteṣu śrūyante vividhāḥ svanāḥ
vṛṣṭibhistāḍyamānānāṃ varāhamṛgapakṣiṇām
- 8
स्तोककाः शिखिनश्चैव पुंस्कोकिलगणैः सह
मत्ताः परिपतन्ति स्म दर्दुराश्चैव दर्पिताः
stokakāḥ śikhinaścaiva puṃskokilagaṇaiḥ saha
mattāḥ paripatanti sma dardurāścaiva darpitāḥ
- 9
तथा बहुविधाकारा प्रावृण्मेघानुनादिता
अभ्यतीता शिवा तेषां चरतां मरुधन्वसु
tathā bahuvidhākārā prāvṛṇmeghānunāditā
abhyatītā śivā teṣāṃ caratāṃ marudhanvasu
- 10
क्रौञ्चहंसगणाकीर्णा शरत्प्रणिहिताभवत्
रूढकक्षवनप्रस्था प्रसन्नजलनिम्नगा
krauñcahaṃsagaṇākīrṇā śaratpraṇihitābhavat
rūḍhakakṣavanaprasthā prasannajalanimnagā
- 11
विमलाकाशनक्षत्रा शरत्तेषां शिवाभवत्
मृगद्विजसमाकीर्णा पाण्डवानां महात्मनाम्
vimalākāśanakṣatrā śaratteṣāṃ śivābhavat
mṛgadvijasamākīrṇā pāṇḍavānāṃ mahātmanām
- 12
पश्यन्तः शान्तरजसः क्षपा जलदशीतलाः
ग्रहनक्षत्रसंघैश्च सोमेन च विराजिताः
paśyantaḥ śāntarajasaḥ kṣapā jaladaśītalāḥ
grahanakṣatrasaṃghaiśca somena ca virājitāḥ
- 13
कुमुदैः पुण्डरीकैश्च शीतवारिधराः शिवाः
नदीः पुष्करिणीश्चैव ददृशुः समलंकृताः
kumudaiḥ puṇḍarīkaiśca śītavāridharāḥ śivāḥ
nadīḥ puṣkariṇīścaiva dadṛśuḥ samalaṃkṛtāḥ
- 14
आकाशनीकाशतटां नीपनीवारसंकुलाम्
बभूव चरतां हर्षः पुण्यतीर्थां सरस्वतीम्
ākāśanīkāśataṭāṃ nīpanīvārasaṃkulām
babhūva caratāṃ harṣaḥ puṇyatīrthāṃ sarasvatīm
- 15
ते वै मुमुदिरे वीराः प्रसन्नसलिलां शिवाम्
पश्यन्तो दृढधन्वानः परिपूर्णां सरस्वतीम्
te vai mumudire vīrāḥ prasannasalilāṃ śivām
paśyanto dṛḍhadhanvānaḥ paripūrṇāṃ sarasvatīm
- 16
तेषां पुण्यतमा रात्रिः पर्वसंधौ स्म शारदी
तत्रैव वसताम् आसीत्कार्त्तिकी जनमेजय
teṣāṃ puṇyatamā rātriḥ parvasaṃdhau sma śāradī
tatraiva vasatām āsītkārttikī janamejaya
- 17
पुण्यकृद्भिर्महासत्त्वैस्तापसैः सह पाण्डवाः
तत्सर्वं भरतश्रेष्ठाः समूहुर्योगम् उत्तमम्
puṇyakṛdbhirmahāsattvaistāpasaiḥ saha pāṇḍavāḥ
tatsarvaṃ bharataśreṣṭhāḥ samūhuryogam uttamam
- 18
तमिस्राभ्युदये तस्मिन्धौम्येन सह पाण्डवाः
सूतैः पौरोगवैश्चैव काम्यकं प्रययुर्वनम्
tamisrābhyudaye tasmindhaumyena saha pāṇḍavāḥ
sūtaiḥ paurogavaiścaiva kāmyakaṃ prayayurvanam

