23 shlokas
- 1
अर्जुन उवाच
कृतास्त्रम् अभिविश्वस्तम् अथ मां हरिवाहनः
संस्पृश्य मूर्ध्नि पाणिभ्याम् इदं वचनम् अब्रवीत्
arjuna uvāca
kṛtāstram abhiviśvastam atha māṃ harivāhanaḥ
saṃspṛśya mūrdhni pāṇibhyām idaṃ vacanam abravīt
- 2
न त्वम् अद्य युधा जेतुं शक्यः सुरगणैर् अपि
किं पुनर्मानुषे लोके मानुषैर् अकृतात्मभिः
अप्रमेयो ऽप्रधृष्यश्च युद्धेष्वप्रतिमस्तथा
na tvam adya yudhā jetuṃ śakyaḥ suragaṇair api
kiṃ punarmānuṣe loke mānuṣair akṛtātmabhiḥ
aprameyo 'pradhṛṣyaśca yuddheṣvapratimastathā
- 3
अथाब्रवीत्पुनर्देवः सम्प्रहृष्टतनूरुहः
अस्त्रयुद्धे समो वीर न ते कश्चिद्भविष्यति
athābravītpunardevaḥ samprahṛṣṭatanūruhaḥ
astrayuddhe samo vīra na te kaścidbhaviṣyati
- 4
अप्रमत्तः सदा दक्षः सत्यवादी जितेन्द्रियः
ब्रह्मण्यश्चास्त्रविच्चासि शूरश्चासि कुरूद्वह
apramattaḥ sadā dakṣaḥ satyavādī jitendriyaḥ
brahmaṇyaścāstraviccāsi śūraścāsi kurūdvaha
- 5
अस्त्राणि समवाप्तानि त्वया दश च पञ्च च
पञ्चभिर्विधिभिः पार्थ न त्वया विद्यते समः
astrāṇi samavāptāni tvayā daśa ca pañca ca
pañcabhirvidhibhiḥ pārtha na tvayā vidyate samaḥ
- 6
प्रयोगम् उपसंहारम् आवृत्तिं च धनंजय
प्रायश्चित्तं च वेत्थ त्वं प्रतिघातं च सर्वशः
prayogam upasaṃhāram āvṛttiṃ ca dhanaṃjaya
prāyaścittaṃ ca vettha tvaṃ pratighātaṃ ca sarvaśaḥ
- 7
तव गुर्वर्थकालो ऽयम् उपपन्नः परंतप
प्रतिजानीष्व तं कर्तुम् अतो वेत्स्याम्यहं परम्
tava gurvarthakālo 'yam upapannaḥ paraṃtapa
pratijānīṣva taṃ kartum ato vetsyāmyahaṃ param
- 8
ततो ऽहम् अब्रुवं राजन्देवराजम् इदं वचः
विषह्यं चेन्मया कर्तुं कृतम् एव निबोध तत्
tato 'ham abruvaṃ rājandevarājam idaṃ vacaḥ
viṣahyaṃ cenmayā kartuṃ kṛtam eva nibodha tat
- 9
ततो माम् अब्रवीद्राजन्प्रहस्य बलवृत्रहा
नाविषह्यं तवाद्यास्ति त्रिषु लोकेषु किंचन
tato mām abravīdrājanprahasya balavṛtrahā
nāviṣahyaṃ tavādyāsti triṣu lokeṣu kiṃcana
- 10
निवातकवचा नाम दानवा मम शत्रवः
समुद्रकुक्षिम् आश्रित्य दुर्गे प्रतिवसन्त्युत
nivātakavacā nāma dānavā mama śatravaḥ
samudrakukṣim āśritya durge prativasantyuta
- 11
तिस्रः कोट्यः समाख्यातास्तुल्यरूपबलप्रभाः
तांस्तत्र जहि कौन्तेय गुर्वर्थस्ते भविष्यति
tisraḥ koṭyaḥ samākhyātāstulyarūpabalaprabhāḥ
tāṃstatra jahi kaunteya gurvarthaste bhaviṣyati
- 12
ततो मातलिसंयुक्तं मयूरसमरोमभिः
हयैर् उपेतं प्रादान्मे रथं दिव्यं महाप्रभम्
tato mātalisaṃyuktaṃ mayūrasamaromabhiḥ
hayair upetaṃ prādānme rathaṃ divyaṃ mahāprabham
- 13
बबन्ध चैव मे मूर्ध्नि किरीटम् इदम् उत्तमम्
स्वरूपसदृशं चैव प्रादाद् अङ्गविभूषणम्
babandha caiva me mūrdhni kirīṭam idam uttamam
svarūpasadṛśaṃ caiva prādād aṅgavibhūṣaṇam
- 14
अभेद्यं कवचं चेदं स्पर्शरूपवद् उत्तमम्
अजरां ज्याम् इमां चापि गाण्डीवे समयोजयत्
abhedyaṃ kavacaṃ cedaṃ sparśarūpavad uttamam
ajarāṃ jyām imāṃ cāpi gāṇḍīve samayojayat
- 15
ततः प्रायाम् अहं तेन स्यन्दनेन विराजता
येनाजयद्देवपतिर्बलिं वैरोचनिं पुरा
tataḥ prāyām ahaṃ tena syandanena virājatā
yenājayaddevapatirbaliṃ vairocaniṃ purā
- 16
ततो देवाः सर्व एव तेन घोषेण बोधितः
मन्वाना देवराजं मां समाजग्मुर्विशां पते
दृष्ट्वा च माम् अपृच्छन्त किं करिष्यसि फल्गुन
tato devāḥ sarva eva tena ghoṣeṇa bodhitaḥ
manvānā devarājaṃ māṃ samājagmurviśāṃ pate
dṛṣṭvā ca mām apṛcchanta kiṃ kariṣyasi phalguna
- 17
तान् अब्रुवं यथाभूतम् इदं कर्तास्मि संयुगे
निवातकवचानां तु प्रस्थितं मां वधैषिणम्
निबोधत महाभागाः शिवं चाशास्त मे ऽनघाः
tān abruvaṃ yathābhūtam idaṃ kartāsmi saṃyuge
nivātakavacānāṃ tu prasthitaṃ māṃ vadhaiṣiṇam
nibodhata mahābhāgāḥ śivaṃ cāśāsta me 'naghāḥ
- 18
तुष्टुवुर्मां प्रसन्नास्ते यथा देवं पुरंदरम्
रथेनानेन मघवा जितवाञ्शम्बरं युधि
नमुचिं बलवृत्रौ च प्रह्लादनरकावपि
tuṣṭuvurmāṃ prasannāste yathā devaṃ puraṃdaram
rathenānena maghavā jitavāñśambaraṃ yudhi
namuciṃ balavṛtrau ca prahlādanarakāvapi
- 19
बहूनि च सहस्राणि प्रयुतान्यर्बुदानि च
रथेनानेन दैत्यानां जितवान्मघवान्युधि
bahūni ca sahasrāṇi prayutānyarbudāni ca
rathenānena daityānāṃ jitavānmaghavānyudhi
- 20
त्वम् अप्येतेन कौन्तेय निवातकवचान्रणे
विजेता युधि विक्रम्य पुरेव मघवान्वशी
tvam apyetena kaunteya nivātakavacānraṇe
vijetā yudhi vikramya pureva maghavānvaśī
- 21
अयं च शङ्खप्रवरो येन जेतासि दानवान्
अनेन विजिता लोकाः शक्रेणापि महात्मना
ayaṃ ca śaṅkhapravaro yena jetāsi dānavān
anena vijitā lokāḥ śakreṇāpi mahātmanā
- 22
प्रदीयमानं देवैस्तु देवदत्तं जलोद्भवम्
प्रत्यगृह्णं जयायैनं स्तूयमानस्तदामरैः
pradīyamānaṃ devaistu devadattaṃ jalodbhavam
pratyagṛhṇaṃ jayāyainaṃ stūyamānastadāmaraiḥ
- 23
स शङ्खी कवची बाणी प्रगृहीतशरासनः
दानवालयम् अत्युग्रं प्रयातो ऽस्मि युयुत्सया
sa śaṅkhī kavacī bāṇī pragṛhītaśarāsanaḥ
dānavālayam atyugraṃ prayāto 'smi yuyutsayā

