27 shlokas
- 1
मार्कण्डेय उवाच
यदा स्कन्देन मातॄणाम् एवम् एतत्प्रियं कृतम्
अथैनम् अब्रवीत्स्वाहा मम पुत्रस्त्वम् औरसः
mārkaṇḍeya uvāca
yadā skandena mātṝṇām evam etatpriyaṃ kṛtam
athainam abravītsvāhā mama putrastvam aurasaḥ
- 2
इच्छाम्यहं त्वया दत्तां प्रीतिं परमदुर्लभाम्
ताम् अब्रवीत्ततः स्कन्दः प्रीतिम् इच्छसि कीदृशीम्
icchāmyahaṃ tvayā dattāṃ prītiṃ paramadurlabhām
tām abravīttataḥ skandaḥ prītim icchasi kīdṛśīm
- 3
स्वाहोवाच
दक्षस्याहं प्रिया कन्या स्वाहा नाम महाभुज
बाल्यात्प्रभृति नित्यं च जातकामा हुताशने
svāhovāca
dakṣasyāhaṃ priyā kanyā svāhā nāma mahābhuja
bālyātprabhṛti nityaṃ ca jātakāmā hutāśane
- 4
न च मां कामिनीं पुत्र सम्यग्जानाति पावकः
इच्छामि शाश्वतं वासं वस्तुं पुत्र सहाग्निना
na ca māṃ kāminīṃ putra samyagjānāti pāvakaḥ
icchāmi śāśvataṃ vāsaṃ vastuṃ putra sahāgninā
- 5
स्कन्द उवाच
हव्यं कव्यं च यत्किंचिद्द्विजा मन्त्रपुरस्कृतम्
होष्यन्त्यग्नौ सदा देवि स्वाहेत्युक्त्वा समुद्यतम्
skanda uvāca
havyaṃ kavyaṃ ca yatkiṃciddvijā mantrapuraskṛtam
hoṣyantyagnau sadā devi svāhetyuktvā samudyatam
- 6
अद्य प्रभृति दास्यन्ति सुवृत्ताः सत्पथे स्थिताः
एवम् अग्निस्त्वया सार्धं सदा वत्स्यति शोभने
adya prabhṛti dāsyanti suvṛttāḥ satpathe sthitāḥ
evam agnistvayā sārdhaṃ sadā vatsyati śobhane
- 7
मार्कण्डेय उवाच
एवम् उक्ता ततः स्वाहा तुष्टा स्कन्देन पूजिता
पावकेन समायुक्ता भर्त्रा स्कन्दम् अपूजयत्
mārkaṇḍeya uvāca
evam uktā tataḥ svāhā tuṣṭā skandena pūjitā
pāvakena samāyuktā bhartrā skandam apūjayat
- 8
ततो ब्रह्मा महासेनं प्रजापतिर् अथाब्रवीत्
अभिगच्छ महादेवं पितरं त्रिपुरार्दनम्
tato brahmā mahāsenaṃ prajāpatir athābravīt
abhigaccha mahādevaṃ pitaraṃ tripurārdanam
- 9
रुद्रेणाग्निं समाविश्य स्वाहाम् आविश्य चोमया
हितार्थं सर्वलोकानां जातस्त्वम् अपराजितः
rudreṇāgniṃ samāviśya svāhām āviśya comayā
hitārthaṃ sarvalokānāṃ jātastvam aparājitaḥ
- 10
उमायोन्यां च रुद्रेण शुक्रं सिक्तं महात्मना
आस्ते गिरौ निपतितं मिञ्जिकामिञ्जिकं यतः
umāyonyāṃ ca rudreṇa śukraṃ siktaṃ mahātmanā
āste girau nipatitaṃ miñjikāmiñjikaṃ yataḥ
- 11
सम्भूतं लोहितोदे तु शुक्रशेषम् अवापतत्
सूर्यरश्मिषु चाप्यन्यद् अन्यच्चैवापतद्भुवि
आसक्तम् अन्यद्वृक्षेषु तद् एवं पञ्चधापतत्
sambhūtaṃ lohitode tu śukraśeṣam avāpatat
sūryaraśmiṣu cāpyanyad anyaccaivāpatadbhuvi
āsaktam anyadvṛkṣeṣu tad evaṃ pañcadhāpatat
- 12
त एते विविधाकारा गणा ज्ञेया मनीषिभिः
तव पारिषदा घोरा य एते पिशिताशनाः
ta ete vividhākārā gaṇā jñeyā manīṣibhiḥ
tava pāriṣadā ghorā ya ete piśitāśanāḥ
- 13
एवम् अस्त्विति चाप्युक्त्वा महासेनो महेश्वरम्
अपूजयद् अमेयात्मा पितरं पितृवत्सलः
evam astviti cāpyuktvā mahāseno maheśvaram
apūjayad ameyātmā pitaraṃ pitṛvatsalaḥ
- 14
अर्कपुष्पैस्तु ते पञ्च गणाः पूज्या धनार्थिभिः
व्याधिप्रशमनार्थं च तेषां पूजां समाचरेत्
arkapuṣpaistu te pañca gaṇāḥ pūjyā dhanārthibhiḥ
vyādhipraśamanārthaṃ ca teṣāṃ pūjāṃ samācaret
- 15
मिञ्जिकामिञ्जिकं चैव मिथुनं रुद्रसम्भवम्
नमस्कार्यं सदैवेह बालानां हितम् इच्छता
miñjikāmiñjikaṃ caiva mithunaṃ rudrasambhavam
namaskāryaṃ sadaiveha bālānāṃ hitam icchatā
- 16
स्त्रियो मानुषमांसादा वृद्धिका नाम नामतः
वृक्षेषु जातास्ता देव्यो नमस्कार्याः प्रजार्थिभिः
striyo mānuṣamāṃsādā vṛddhikā nāma nāmataḥ
vṛkṣeṣu jātāstā devyo namaskāryāḥ prajārthibhiḥ
- 17
एवम् एते पिशाचानाम् असंख्येया गणाः स्मृताः
घण्टायाः सपताकायाः शृणु मे सम्भवं नृप
evam ete piśācānām asaṃkhyeyā gaṇāḥ smṛtāḥ
ghaṇṭāyāḥ sapatākāyāḥ śṛṇu me sambhavaṃ nṛpa
- 18
ऐरावतस्य घण्टे द्वे वैजयन्त्याविति श्रुते
गुहस्य ते स्वयं दत्ते शक्रेणानाय्य धीमता
airāvatasya ghaṇṭe dve vaijayantyāviti śrute
guhasya te svayaṃ datte śakreṇānāyya dhīmatā
- 19
एका तत्र विशाखस्य घण्टा स्कन्दस्य चापरा
पताका कार्त्तिकेयस्य विशाखस्य च लोहिता
ekā tatra viśākhasya ghaṇṭā skandasya cāparā
patākā kārttikeyasya viśākhasya ca lohitā
- 20
यानि क्रीडनकान्यस्य देवैर्दत्तानि वै तदा
तैर् एव रमते देवो महासेनो महाबलः
yāni krīḍanakānyasya devairdattāni vai tadā
tair eva ramate devo mahāseno mahābalaḥ
- 21
स संवृतः पिशाचानां गणैर्देवगणैस्तथा
शुशुभे काञ्चने शैले दीप्यमानः श्रिया वृतः
sa saṃvṛtaḥ piśācānāṃ gaṇairdevagaṇaistathā
śuśubhe kāñcane śaile dīpyamānaḥ śriyā vṛtaḥ
- 22
तेन वीरेण शुशुभे स शैलः शुभकाननः
आदित्येनेवांशुमता मन्दरश्चारुकन्दरः
tena vīreṇa śuśubhe sa śailaḥ śubhakānanaḥ
ādityenevāṃśumatā mandaraścārukandaraḥ
- 23
संतानकवनैः फुल्लैः करवीरवनैर् अपि
पारिजातवनैश्चैव जपाशोकवनैस्तथा
saṃtānakavanaiḥ phullaiḥ karavīravanair api
pārijātavanaiścaiva japāśokavanaistathā
- 24
कदम्बतरुषण्डैश्च दिव्यैर्मृगगणैर् अपि
दिव्यैः पक्षिगणैश्चैव शुशुभे श्वेतपर्वतः
kadambataruṣaṇḍaiśca divyairmṛgagaṇair api
divyaiḥ pakṣigaṇaiścaiva śuśubhe śvetaparvataḥ
- 25
तत्र देवगणाः सर्वे सर्वे चैव महर्षयः
मेघतूर्यरवाश्चैव क्षुब्धोदधिसमस्वनाः
tatra devagaṇāḥ sarve sarve caiva maharṣayaḥ
meghatūryaravāścaiva kṣubdhodadhisamasvanāḥ
- 26
तत्र दिव्याश्च गन्धर्वा नृत्यन्त्यप्सरसस्तथा
हृष्टानां तत्र भूतानां श्रूयते निनदो महान्
tatra divyāśca gandharvā nṛtyantyapsarasastathā
hṛṣṭānāṃ tatra bhūtānāṃ śrūyate ninado mahān
- 27
एवं सेन्द्रं जगत्सर्वं श्वेतपर्वतसंस्थितम्
प्रहृष्टं प्रेक्षते स्कन्दं न च ग्लायति दर्शनात्
evaṃ sendraṃ jagatsarvaṃ śvetaparvatasaṃsthitam
prahṛṣṭaṃ prekṣate skandaṃ na ca glāyati darśanāt

