28 shlokas
- 1
वैशम्पायन उवाच
सा तु कन्या बहुविधं ब्रुवन्ती मधुरं वचः
अनुनेतुं सहस्रांशुं न शशाक मनस्विनी
vaiśampāyana uvāca
sā tu kanyā bahuvidhaṃ bruvantī madhuraṃ vacaḥ
anunetuṃ sahasrāṃśuṃ na śaśāka manasvinī
- 2
न शशाक यदा बाला प्रत्याख्यातुं तमोनुदम्
भीता शापात्ततो राजन्दध्यौ दीर्घम् अथान्तरम्
na śaśāka yadā bālā pratyākhyātuṃ tamonudam
bhītā śāpāttato rājandadhyau dīrgham athāntaram
- 3
अनागसः पितुः शापो ब्राह्मणस्य तथैव च
मन्निमित्तः कथं न स्यात्क्रुद्धाद् अस्माद्विभावसोः
anāgasaḥ pituḥ śāpo brāhmaṇasya tathaiva ca
mannimittaḥ kathaṃ na syātkruddhād asmādvibhāvasoḥ
- 4
बालेनापि सता मोहाद्भृशं सापह्नवान्यपि
नात्यासादयितव्यानि तेजांसि च तपांसि च
bālenāpi satā mohādbhṛśaṃ sāpahnavānyapi
nātyāsādayitavyāni tejāṃsi ca tapāṃsi ca
- 5
साहम् अद्य भृशं भीता गृहीता च करे भृशम्
कथं त्वकार्यं कुर्यां वै प्रदानं ह्यात्मनः स्वयम्
sāham adya bhṛśaṃ bhītā gṛhītā ca kare bhṛśam
kathaṃ tvakāryaṃ kuryāṃ vai pradānaṃ hyātmanaḥ svayam
- 6
सैवं शापपरित्रस्ता बहु चिन्तयती तदा
मोहेनाभिपरीताङ्गी स्मयमाना पुनः पुनः
saivaṃ śāpaparitrastā bahu cintayatī tadā
mohenābhiparītāṅgī smayamānā punaḥ punaḥ
- 7
तं देवम् अब्रवीद्भीता बन्धूनां राजसत्तम
व्रीडाविह्वलया वाचा शापत्रस्ता विशां पते
taṃ devam abravīdbhītā bandhūnāṃ rājasattama
vrīḍāvihvalayā vācā śāpatrastā viśāṃ pate
- 8
कुन्त्युवाच
पिता मे ध्रियते देव माता चान्ये च बान्धवाः
न तेषु ध्रियमाणेषु विधिलोपो भवेद् अयम्
kuntyuvāca
pitā me dhriyate deva mātā cānye ca bāndhavāḥ
na teṣu dhriyamāṇeṣu vidhilopo bhaved ayam
- 9
त्वया मे संगमो देव यदि स्याद्विधिवर्जितः
मन्निमित्तं कुलस्यास्य लोके कीर्तिर्नशेत्ततः
tvayā me saṃgamo deva yadi syādvidhivarjitaḥ
mannimittaṃ kulasyāsya loke kīrtirnaśettataḥ
- 10
अथ वा धर्मम् एतं त्वं मन्यसे तपतां वर
ऋते प्रदानाद्बन्धुभ्यस्तव कामं करोम्यहम्
atha vā dharmam etaṃ tvaṃ manyase tapatāṃ vara
ṛte pradānādbandhubhyastava kāmaṃ karomyaham
- 11
आत्मप्रदानं दुर्धर्ष तव कृत्वा सती त्वहम्
त्वयि धर्मो यशश्चैव कीर्तिर् आयुश्च देहिनाम्
ātmapradānaṃ durdharṣa tava kṛtvā satī tvaham
tvayi dharmo yaśaścaiva kīrtir āyuśca dehinām
- 12
सूर्य उवाच
न ते पिता न ते माता गुरवो वा शुचिस्मिते
प्रभवन्ति वरारोहे भद्रं ते शृणु मे वचः
sūrya uvāca
na te pitā na te mātā guravo vā śucismite
prabhavanti varārohe bhadraṃ te śṛṇu me vacaḥ
- 13
सर्वान्कामयते यस्मात्कनेर्धातोश्च भामिनि
तस्मात्कन्येह सुश्रोणि स्वतन्त्रा वरवर्णिनि
sarvānkāmayate yasmātkanerdhātośca bhāmini
tasmātkanyeha suśroṇi svatantrā varavarṇini
- 14
नाधर्मश्चरितः कश्चित्त्वया भवति भामिनि
अधर्मं कुत एवाहं चरेयं लोककाम्यया
nādharmaścaritaḥ kaścittvayā bhavati bhāmini
adharmaṃ kuta evāhaṃ careyaṃ lokakāmyayā
- 15
अनावृताः स्त्रियः सर्वा नराश्च वरवर्णिनि
स्वभाव एष लोकानां विकारो ऽन्य इति स्मृतः
anāvṛtāḥ striyaḥ sarvā narāśca varavarṇini
svabhāva eṣa lokānāṃ vikāro 'nya iti smṛtaḥ
- 16
सा मया सह संगम्य पुनः कन्या भविष्यसि
पुत्रश्च ते महाबाहुर्भविष्यति महायशाः
sā mayā saha saṃgamya punaḥ kanyā bhaviṣyasi
putraśca te mahābāhurbhaviṣyati mahāyaśāḥ
- 17
कुन्त्युवाच
यदि पुत्रो मम भवेत्त्वत्तः सर्वतमोऽपह
कुण्डली कवची शूरो महाबाहुर्महाबलः
kuntyuvāca
yadi putro mama bhavettvattaḥ sarvatamo'paha
kuṇḍalī kavacī śūro mahābāhurmahābalaḥ
- 18
सूर्य उवाच
भविष्यति महाबाहुः कुण्डली दिव्यवर्मभृत्
उभयं चामृतमयं तस्य भद्रे भविष्यति
sūrya uvāca
bhaviṣyati mahābāhuḥ kuṇḍalī divyavarmabhṛt
ubhayaṃ cāmṛtamayaṃ tasya bhadre bhaviṣyati
- 19
कुन्त्युवाच
यद्येतद् अमृताद् अस्ति कुण्डले वर्म चोत्तमम्
मम पुत्रस्य यं वै त्वं मत्त उत्पादयिष्यसि
kuntyuvāca
yadyetad amṛtād asti kuṇḍale varma cottamam
mama putrasya yaṃ vai tvaṃ matta utpādayiṣyasi
- 20
अस्तु मे संगमो देव यथोक्तं भगवंस्त्वया
त्वद्वीर्यरूपसत्त्वौजा धर्मयुक्तो भवेत्स च
astu me saṃgamo deva yathoktaṃ bhagavaṃstvayā
tvadvīryarūpasattvaujā dharmayukto bhavetsa ca
- 21
सूर्य उवाच
अदित्या कुण्डले राज्ञि दत्ते मे मत्तकाशिनि
ते ऽस्य दास्यामि वै भीरु वर्म चैवेदम् उत्तमम्
sūrya uvāca
adityā kuṇḍale rājñi datte me mattakāśini
te 'sya dāsyāmi vai bhīru varma caivedam uttamam
- 22
पृथोवाच
परमं भगवन्देव संगमिष्ये त्वया सह
यदि पुत्रो भवेद् एवं यथा वदसि गोपते
pṛthovāca
paramaṃ bhagavandeva saṃgamiṣye tvayā saha
yadi putro bhaved evaṃ yathā vadasi gopate
- 23
वैशम्पायन उवाच
तथेत्युक्त्वा तु तां कुन्तीम् आविवेश विहंगमः
स्वर्भानुशत्रुर्योगात्मा नाभ्यां पस्पर्श चैव ताम्
vaiśampāyana uvāca
tathetyuktvā tu tāṃ kuntīm āviveśa vihaṃgamaḥ
svarbhānuśatruryogātmā nābhyāṃ pasparśa caiva tām
- 24
ततः सा विह्वलेवासीत्कन्या सूर्यस्य तेजसा
पपाताथ च सा देवी शयने मूढचेतना
tataḥ sā vihvalevāsītkanyā sūryasya tejasā
papātātha ca sā devī śayane mūḍhacetanā
- 25
सूर्य उवाच
साधयिष्यामि सुश्रोणि पुत्रं वै जनयिष्यसि
सर्वशस्त्रभृतां श्रेष्ठं कन्या चैव भविष्यसि
sūrya uvāca
sādhayiṣyāmi suśroṇi putraṃ vai janayiṣyasi
sarvaśastrabhṛtāṃ śreṣṭhaṃ kanyā caiva bhaviṣyasi
- 26
वैशम्पायन उवाच
ततः सा व्रीडिता बाला तदा सूर्यम् अथाब्रवीत्
एवम् अस्त्विति राजेन्द्र प्रस्थितं भूरिवर्चसम्
vaiśampāyana uvāca
tataḥ sā vrīḍitā bālā tadā sūryam athābravīt
evam astviti rājendra prasthitaṃ bhūrivarcasam
- 27
इति स्मोक्ता कुन्तिराजात्मजा सा विवस्वन्तं याचमाना सलज्जा
तस्मिन्पुण्ये शयनीये पपात मोहाविष्टा भज्यमाना लतेव
iti smoktā kuntirājātmajā sā vivasvantaṃ yācamānā salajjā
tasminpuṇye śayanīye papāta mohāviṣṭā bhajyamānā lateva
- 28
तां तिग्मांशुस्तेजसा मोहयित्वा योगेनाविष्यात्मसंस्थां चकार
न चैवैनां दूषयामास भानुः संज्ञां लेभे भूय एवाथ बाला
tāṃ tigmāṃśustejasā mohayitvā yogenāviṣyātmasaṃsthāṃ cakāra
na caivaināṃ dūṣayāmāsa bhānuḥ saṃjñāṃ lebhe bhūya evātha bālā

