17 shlokas
- 1
वैशम्पायन उवाच
तस्मिन्बहुमृगे ऽरण्ये रममाणा महारथाः
काम्यके भरतश्रेष्ठा विजह्रुस्ते यथामराः
vaiśampāyana uvāca
tasminbahumṛge 'raṇye ramamāṇā mahārathāḥ
kāmyake bharataśreṣṭhā vijahruste yathāmarāḥ
- 2
प्रेक्षमाणा बहुविधान्वनोद्देशान्समन्ततः
यथर्तुकालरम्याश्च वनराजीः सुपुष्पिताः
prekṣamāṇā bahuvidhānvanoddeśānsamantataḥ
yathartukālaramyāśca vanarājīḥ supuṣpitāḥ
- 3
पाण्डवा मृगयाशीलाश्चरन्तस्तन्महावनम्
विजह्रुर् इन्द्रप्रतिमाः कंचित्कालम् अरिंदमाः
pāṇḍavā mṛgayāśīlāścarantastanmahāvanam
vijahrur indrapratimāḥ kaṃcitkālam ariṃdamāḥ
- 4
ततस्ते यौगपद्येन ययुः सर्वे चतुर्दिशम्
मृगयां पुरुषव्याघ्रा ब्राह्मणार्थे परंतपाः
tataste yaugapadyena yayuḥ sarve caturdiśam
mṛgayāṃ puruṣavyāghrā brāhmaṇārthe paraṃtapāḥ
- 5
द्रौपदीम् आश्रमे न्यस्य तृणबिन्दोर् अनुज्ञया
महर्षेर्दीप्ततपसो धौम्यस्य च पुरोधसः
draupadīm āśrame nyasya tṛṇabindor anujñayā
maharṣerdīptatapaso dhaumyasya ca purodhasaḥ
- 6
ततस्तु राजा सिन्धूनां वार्द्धक्षत्रिर्महायशाः
विवाहकामः शाल्वेयान्प्रयातः सो ऽभवत्तदा
tatastu rājā sindhūnāṃ vārddhakṣatrirmahāyaśāḥ
vivāhakāmaḥ śālveyānprayātaḥ so 'bhavattadā
- 7
महता परिबर्हेण राजयोग्येन संवृतः
राजभिर्बहुभिः सार्धम् उपायात्काम्यकं च सः
mahatā paribarheṇa rājayogyena saṃvṛtaḥ
rājabhirbahubhiḥ sārdham upāyātkāmyakaṃ ca saḥ
- 8
तत्रापश्यत्प्रियां भार्यां पाण्डवानां यशस्विनीम्
तिष्ठन्तीम् आश्रमद्वारि द्रौपदीं निर्जने वने
tatrāpaśyatpriyāṃ bhāryāṃ pāṇḍavānāṃ yaśasvinīm
tiṣṭhantīm āśramadvāri draupadīṃ nirjane vane
- 9
विभ्राजमानां वपुषा बिभ्रतीं रूपम् उत्तमम्
भ्राजयन्तीं वनोद्देशं नीलाभ्रम् इव विद्युतम्
vibhrājamānāṃ vapuṣā bibhratīṃ rūpam uttamam
bhrājayantīṃ vanoddeśaṃ nīlābhram iva vidyutam
- 10
अप्सरा देवकन्या वा माया वा देवनिर्मिता
इति कृत्वाञ्जलिं सर्वे ददृशुस्ताम् अनिन्दिताम्
apsarā devakanyā vā māyā vā devanirmitā
iti kṛtvāñjaliṃ sarve dadṛśustām aninditām
- 11
ततः स राजा सिन्धूनां वार्द्धक्षत्रिर्जयद्रथः
विस्मितस्ताम् अनिन्द्याङ्गीं दृष्ट्वासीद्धृष्टमानसः
tataḥ sa rājā sindhūnāṃ vārddhakṣatrirjayadrathaḥ
vismitastām anindyāṅgīṃ dṛṣṭvāsīddhṛṣṭamānasaḥ
- 12
स कोटिकाश्यं राजानम् अब्रवीत्काममोहितः
कस्य त्व् एषानवद्याङ्गी यदि वापि न मानुषी
sa koṭikāśyaṃ rājānam abravītkāmamohitaḥ
kasya tv eṣānavadyāṅgī yadi vāpi na mānuṣī
- 13
विवाहार्थो न मे कश्चिद् इमां दृष्ट्वातिसुन्दरीम्
एताम् एवाहम् आदाय गमिष्यामि स्वम् आलयम्
vivāhārtho na me kaścid imāṃ dṛṣṭvātisundarīm
etām evāham ādāya gamiṣyāmi svam ālayam
- 14
गच्छ जानीहि सौम्यैनां कस्य का च कुतो ऽपि वा
किमर्थम् आगता सुभ्रूर् इदं कण्टकितं वनम्
gaccha jānīhi saumyaināṃ kasya kā ca kuto 'pi vā
kimartham āgatā subhrūr idaṃ kaṇṭakitaṃ vanam
- 15
अपि नाम वरारोहा माम् एषा लोकसुन्दरी
भजेद् अद्यायतापाङ्गी सुदती तनुमध्यमा
api nāma varārohā mām eṣā lokasundarī
bhajed adyāyatāpāṅgī sudatī tanumadhyamā
- 16
अप्यहं कृतकामः स्याम् इमां प्राप्य वरस्त्रियम्
गच्छ जानीहि को न्वस्या नाथ इत्येव कोटिक
apyahaṃ kṛtakāmaḥ syām imāṃ prāpya varastriyam
gaccha jānīhi ko nvasyā nātha ityeva koṭika
- 17
स कोटिकाश्यस्तच्छ्रुत्वा रथात्प्रस्कन्द्य कुण्डली
उपेत्य पप्रच्छ तदा क्रोष्टा व्याघ्रवधूम् इव
sa koṭikāśyastacchrutvā rathātpraskandya kuṇḍalī
upetya papraccha tadā kroṣṭā vyāghravadhūm iva

