24 shlokas
- 1
धौम्य उवाच
दक्षिणस्यां तु पुण्यानि शृणु तीर्थानि भारत
विस्तरेण यथाबुद्धि कीर्त्यमानानि भारत
dhaumya uvāca
dakṣiṇasyāṃ tu puṇyāni śṛṇu tīrthāni bhārata
vistareṇa yathābuddhi kīrtyamānāni bhārata
- 2
यस्याम् आख्यायते पुण्या दिशि गोदावरी नदी
बह्वारामा बहुजला तापसाचरिता शुभा
yasyām ākhyāyate puṇyā diśi godāvarī nadī
bahvārāmā bahujalā tāpasācaritā śubhā
- 3
वेण्णा भीमरथी चोभे नद्यौ पापभयापहे
मृगद्विजसमाकीर्णे तापसालयभूषिते
veṇṇā bhīmarathī cobhe nadyau pāpabhayāpahe
mṛgadvijasamākīrṇe tāpasālayabhūṣite
- 4
राजर्षेस्तत्र च सरिन्नृगस्य भरतर्षभ
रम्यतीर्था बहुजला पयोष्णी द्विजसेविता
rājarṣestatra ca sarinnṛgasya bharatarṣabha
ramyatīrthā bahujalā payoṣṇī dvijasevitā
- 5
अपि चात्र महायोगी मार्कण्डेयो महातपाः
अनुवंश्यां जगौ गाथां नृगस्य धरणीपतेः
api cātra mahāyogī mārkaṇḍeyo mahātapāḥ
anuvaṃśyāṃ jagau gāthāṃ nṛgasya dharaṇīpateḥ
- 6
नृगस्य यजमानस्य प्रत्यक्षम् इति नः श्रुतम्
अमाद्यद् इन्द्रः सोमेन दक्षिणाभिर्द्विजातयः
nṛgasya yajamānasya pratyakṣam iti naḥ śrutam
amādyad indraḥ somena dakṣiṇābhirdvijātayaḥ
- 7
माठरस्य वनं पुण्यं बहुमूलफलं शिवम्
यूपश्च भरतश्रेष्ठ वरुणस्रोतसे गिरौ
māṭharasya vanaṃ puṇyaṃ bahumūlaphalaṃ śivam
yūpaśca bharataśreṣṭha varuṇasrotase girau
- 8
प्रवेण्युत्तरपार्श्वे तु पुण्ये कण्वाश्रमे तथा
तापसानाम् अरण्यानि कीर्तितानि यथाश्रुति
praveṇyuttarapārśve tu puṇye kaṇvāśrame tathā
tāpasānām araṇyāni kīrtitāni yathāśruti
- 9
वेदी शूर्पारके तात जमदग्नेर्महात्मनः
रम्या पाषाणतीर्था च पुरश्चन्द्रा च भारत
vedī śūrpārake tāta jamadagnermahātmanaḥ
ramyā pāṣāṇatīrthā ca puraścandrā ca bhārata
- 10
अशोकतीर्थं मर्त्येषु कौन्तेय बहुलाश्रमम्
अगस्त्यतीर्थं पाण्ड्येषु वारुणं च युधिष्ठिर
aśokatīrthaṃ martyeṣu kaunteya bahulāśramam
agastyatīrthaṃ pāṇḍyeṣu vāruṇaṃ ca yudhiṣṭhira
- 11
कुमार्यः कथिताः पुण्याः पाण्ड्येष्वेव नरर्षभ
ताम्रपर्णीं तु कौन्तेय कीर्तयिष्यामि तां शृणु
kumāryaḥ kathitāḥ puṇyāḥ pāṇḍyeṣveva nararṣabha
tāmraparṇīṃ tu kaunteya kīrtayiṣyāmi tāṃ śṛṇu
- 12
यत्र देवैस्तपस्तप्तं महद् इच्छद्भिर् आश्रमे
गोकर्णम् इति विख्यातं त्रिषु लोकेषु भारत
yatra devaistapastaptaṃ mahad icchadbhir āśrame
gokarṇam iti vikhyātaṃ triṣu lokeṣu bhārata
- 13
शीततोयो बहुजलः पुण्यस्तात शिवश्च सः
ह्रदः परमदुष्प्रापो मानुषैर् अकृतात्मभिः
śītatoyo bahujalaḥ puṇyastāta śivaśca saḥ
hradaḥ paramaduṣprāpo mānuṣair akṛtātmabhiḥ
- 14
तत्रैव तृणसोमाग्नेः सम्पन्नफलमूलवान्
आश्रमो ऽगस्त्यशिष्यस्य पुण्यो देवसभे गिरौ
tatraiva tṛṇasomāgneḥ sampannaphalamūlavān
āśramo 'gastyaśiṣyasya puṇyo devasabhe girau
- 15
वैडूर्यपर्वतस्तत्र श्रीमान्मणिमयः शिवः
अगस्त्यस्याश्रमश्चैव बहुमूलफलोदकः
vaiḍūryaparvatastatra śrīmānmaṇimayaḥ śivaḥ
agastyasyāśramaścaiva bahumūlaphalodakaḥ
- 16
सुराष्ट्रेष्वपि वक्ष्यामि पुण्यान्यायतनानि च
आश्रमान्सरितः शैलान्सरांसि च नराधिप
surāṣṭreṣvapi vakṣyāmi puṇyānyāyatanāni ca
āśramānsaritaḥ śailānsarāṃsi ca narādhipa
- 17
चमसोन्मज्जनं विप्रास्तत्रापि कथयन्त्युत
प्रभासं चोदधौ तीर्थं त्रिदशानां युधिष्ठिर
camasonmajjanaṃ viprāstatrāpi kathayantyuta
prabhāsaṃ codadhau tīrthaṃ tridaśānāṃ yudhiṣṭhira
- 18
तत्र पिण्डारकं नाम तापसाचरितं शुभम्
उज्जयन्तश्च शिखरी क्षिप्रं सिद्धिकरो महान्
tatra piṇḍārakaṃ nāma tāpasācaritaṃ śubham
ujjayantaśca śikharī kṣipraṃ siddhikaro mahān
- 19
तत्र देवर्षिवर्येण नारदेनानुकीर्तितः
पुराणः श्रूयते श्लोकस्तं निबोध युधिष्ठिर
tatra devarṣivaryeṇa nāradenānukīrtitaḥ
purāṇaḥ śrūyate ślokastaṃ nibodha yudhiṣṭhira
- 20
पुण्ये गिरौ सुराष्ट्रेषु मृगपक्षिनिषेविते
उज्जयन्ते स्म तप्ताङ्गो नाकपृष्ठे महीयते
puṇye girau surāṣṭreṣu mṛgapakṣiniṣevite
ujjayante sma taptāṅgo nākapṛṣṭhe mahīyate
- 21
पुण्या द्वारवती तत्र यत्रास्ते मधुसूदनः
साक्षाद्देवः पुराणो ऽसौ स हि धर्मः सनातनः
puṇyā dvāravatī tatra yatrāste madhusūdanaḥ
sākṣāddevaḥ purāṇo 'sau sa hi dharmaḥ sanātanaḥ
- 22
ये च वेदविदो विप्रा ये चाध्यात्मविदो जनाः
ते वदन्ति महात्मानं कृष्णं धर्मं सनातनम्
ye ca vedavido viprā ye cādhyātmavido janāḥ
te vadanti mahātmānaṃ kṛṣṇaṃ dharmaṃ sanātanam
- 23
पवित्राणां हि गोविन्दः पवित्रं परम् उच्यते
पुण्यानाम् अपि पुण्यो ऽसौ मङ्गलानां च मङ्गलम्
pavitrāṇāṃ hi govindaḥ pavitraṃ param ucyate
puṇyānām api puṇyo 'sau maṅgalānāṃ ca maṅgalam
- 24
त्रैलोक्यं पुण्डरीकाक्षो देवदेवः सनातनः
आस्ते हरिर् अचिन्त्यात्मा तत्रैव मधुसूदनः
trailokyaṃ puṇḍarīkākṣo devadevaḥ sanātanaḥ
āste harir acintyātmā tatraiva madhusūdanaḥ

