12 shlokas
- 1
जनमेजय उवाच
यद् इदं शोचितं राज्ञा धृतराष्ट्रेण वै मुने
प्रव्राज्य पाण्डवान्वीरान्सर्वम् एतन्निरर्थकम्
janamejaya uvāca
yad idaṃ śocitaṃ rājñā dhṛtarāṣṭreṇa vai mune
pravrājya pāṇḍavānvīrānsarvam etannirarthakam
- 2
कथं हि राजा पुत्रं स्वम् उपेक्षेताल्पचेतसम्
दुर्योधनं पाण्डुपुत्रान्कोपयानं महारथान्
kathaṃ hi rājā putraṃ svam upekṣetālpacetasam
duryodhanaṃ pāṇḍuputrānkopayānaṃ mahārathān
- 3
किम् आसीत्पाण्डुपुत्राणां वने भोजनम् उच्यताम्
वानेयम् अथवा कृष्टम् एतद् आख्यातु मे भवान्
kim āsītpāṇḍuputrāṇāṃ vane bhojanam ucyatām
vāneyam athavā kṛṣṭam etad ākhyātu me bhavān
- 4
वैशम्पायन उवाच
वानेयं च मृगांश्चैव शुद्धैर्बाणैर्निपातितान्
ब्राह्मणानां निवेद्याग्रम् अभुञ्जन्पुरुषर्षभाः
vaiśampāyana uvāca
vāneyaṃ ca mṛgāṃścaiva śuddhairbāṇairnipātitān
brāhmaṇānāṃ nivedyāgram abhuñjanpuruṣarṣabhāḥ
- 5
तांस्तु शूरान्महेष्वासांस्तदा निवसतो वने
अन्वयुर्ब्राह्मणा राजन्साग्नयो ऽनग्नयस्तथा
tāṃstu śūrānmaheṣvāsāṃstadā nivasato vane
anvayurbrāhmaṇā rājansāgnayo 'nagnayastathā
- 6
ब्राह्मणानां सहस्राणि स्नातकानां महात्मनाम्
दश मोक्षविदां तद्वद्यान्बिभर्ति युधिष्ठिरः
brāhmaṇānāṃ sahasrāṇi snātakānāṃ mahātmanām
daśa mokṣavidāṃ tadvadyānbibharti yudhiṣṭhiraḥ
- 7
रुरून्कृष्णमृगांश्चैव मेध्यांश्चान्यान्वनेचरान्
बाणैर् उन्मथ्य विधिवद्ब्राह्मणेभ्यो न्यवेदयत्
rurūnkṛṣṇamṛgāṃścaiva medhyāṃścānyānvanecarān
bāṇair unmathya vidhivadbrāhmaṇebhyo nyavedayat
- 8
न तत्र कश्चिद्दुर्वर्णो व्याधितो वाप्यदृश्यत
कृशो वा दुर्बलो वापि दीनो भीतो ऽपि वा नरः
na tatra kaściddurvarṇo vyādhito vāpyadṛśyata
kṛśo vā durbalo vāpi dīno bhīto 'pi vā naraḥ
- 9
पुत्रान् इव प्रियाञ्ज्ञातीन्भ्रातॄन् इव सहोदरान्
पुपोष कौरवश्रेष्ठो धर्मराजो युधिष्ठिरः
putrān iva priyāñjñātīnbhrātṝn iva sahodarān
pupoṣa kauravaśreṣṭho dharmarājo yudhiṣṭhiraḥ
- 10
पतींश्च द्रौपदी सर्वान्द्विजांश्चैव यशस्विनी
मातेव भोजयित्वाग्रे शिष्टम् आहारयत्तदा
patīṃśca draupadī sarvāndvijāṃścaiva yaśasvinī
māteva bhojayitvāgre śiṣṭam āhārayattadā
- 11
प्राचीं राजा दक्षिणां भीमसेनो यमौ प्रतीचीम् अथ वाप्युदीचीम्
धनुर्धरा मांसहेतोर्मृगाणां क्षयं चक्रुर्नित्यम् एवोपगम्य
prācīṃ rājā dakṣiṇāṃ bhīmaseno yamau pratīcīm atha vāpyudīcīm
dhanurdharā māṃsahetormṛgāṇāṃ kṣayaṃ cakrurnityam evopagamya
- 12
तथा तेषां वसतां काम्यके वै विहीनानाम् अर्जुनेनोत्सुकानाम्
पञ्चैव वर्षाणि तदा व्यतीयुर् अधीयतां जपतां जुह्वतां च
tathā teṣāṃ vasatāṃ kāmyake vai vihīnānām arjunenotsukānām
pañcaiva varṣāṇi tadā vyatīyur adhīyatāṃ japatāṃ juhvatāṃ ca

