30 shlokas
- 1
युधिष्ठिर उवाच
अन्तर्हितानि भूतानि रक्षांसि बलवन्ति च
अग्निना तपसा चैव शक्यं गन्तुं वृकोदर
yudhiṣṭhira uvāca
antarhitāni bhūtāni rakṣāṃsi balavanti ca
agninā tapasā caiva śakyaṃ gantuṃ vṛkodara
- 2
संनिवर्तय कौन्तेय क्षुत्पिपासे बलान्वयात्
ततो बलं च दाक्ष्यं च संश्रयस्व कुरूद्वह
saṃnivartaya kaunteya kṣutpipāse balānvayāt
tato balaṃ ca dākṣyaṃ ca saṃśrayasva kurūdvaha
- 3
ऋषेस्त्वया श्रुतं वाक्यं कैलासं पर्वतं प्रति
बुद्ध्या प्रपश्य कौन्तेय कथं कृष्णा गमिष्यति
ṛṣestvayā śrutaṃ vākyaṃ kailāsaṃ parvataṃ prati
buddhyā prapaśya kaunteya kathaṃ kṛṣṇā gamiṣyati
- 4
अथ वा सहदेवेन धौम्येन च सहाभिभो
सूदैः पौरोगवैश्चैव सर्वैश्च परिचारकैः
atha vā sahadevena dhaumyena ca sahābhibho
sūdaiḥ paurogavaiścaiva sarvaiśca paricārakaiḥ
- 5
रथैर् अश्वैश्च ये चान्ये विप्राः क्लेशासहाः पथि
सर्वैस्त्वं सहितो भीम निवर्तस्वायतेक्षण
rathair aśvaiśca ye cānye viprāḥ kleśāsahāḥ pathi
sarvaistvaṃ sahito bhīma nivartasvāyatekṣaṇa
- 6
त्रयो वयं गमिष्यामो लघ्वाहारा यतव्रताः
अहं च नकुलश्चैव लोमशश्च महातपाः
trayo vayaṃ gamiṣyāmo laghvāhārā yatavratāḥ
ahaṃ ca nakulaścaiva lomaśaśca mahātapāḥ
- 7
ममागमनम् आकाङ्क्षन्गङ्गाद्वारे समाहितः
वसेह द्रौपदीं रक्षन्यावदागमनं मम
mamāgamanam ākāṅkṣangaṅgādvāre samāhitaḥ
vaseha draupadīṃ rakṣanyāvadāgamanaṃ mama
- 8
भीम उवाच
राजपुत्री श्रमेणार्ता दुःखार्ता चैव भारत
व्रजत्येव हि कल्याणी श्वेतवाहदिदृक्षया
bhīma uvāca
rājaputrī śrameṇārtā duḥkhārtā caiva bhārata
vrajatyeva hi kalyāṇī śvetavāhadidṛkṣayā
- 9
तव चाप्यरतिस्तीव्रा वर्धते तम् अपश्यतः
किं पुनः सहदेवं च मां च कृष्णां च भारत
tava cāpyaratistīvrā vardhate tam apaśyataḥ
kiṃ punaḥ sahadevaṃ ca māṃ ca kṛṣṇāṃ ca bhārata
- 10
रथाः कामं निवर्तन्तां सर्वे च परिचारकाः
सूदाः पौरोगवाश्चैव मन्यते यत्र नो भवान्
rathāḥ kāmaṃ nivartantāṃ sarve ca paricārakāḥ
sūdāḥ paurogavāścaiva manyate yatra no bhavān
- 11
न ह्यहं हातुम् इच्छामि भवन्तम् इह कर्हिचित्
शैले ऽस्मिन्राक्षसाकीर्णे दुर्गेषु विषमेषु च
na hyahaṃ hātum icchāmi bhavantam iha karhicit
śaile 'sminrākṣasākīrṇe durgeṣu viṣameṣu ca
- 12
इयं चापि महाभागा राजपुत्री यतव्रता
त्वाम् ऋते पुरुषव्याघ्र नोत्सहेद्विनिवर्तितुम्
iyaṃ cāpi mahābhāgā rājaputrī yatavratā
tvām ṛte puruṣavyāghra notsahedvinivartitum
- 13
तथैव सहदेवो ऽयं सततं त्वाम् अनुव्रतः
न जातु विनिवर्तेत मतज्ञो ह्यहम् अस्य वै
tathaiva sahadevo 'yaṃ satataṃ tvām anuvrataḥ
na jātu vinivarteta matajño hyaham asya vai
- 14
अपि चात्र महाराज सव्यसाचिदिदृक्षया
सर्वे लालसभूताः स्म तस्माद्यास्यामहे सह
api cātra mahārāja savyasācididṛkṣayā
sarve lālasabhūtāḥ sma tasmādyāsyāmahe saha
- 15
यद्यशक्यो रथैर्गन्तुं शैलो ऽयं बहुकन्दरः
पद्भिर् एव गमिष्यामो मा राजन्विमना भव
yadyaśakyo rathairgantuṃ śailo 'yaṃ bahukandaraḥ
padbhir eva gamiṣyāmo mā rājanvimanā bhava
- 16
अहं वहिष्ये पाञ्चालीं यत्र यत्र न शक्ष्यति
इति मे वर्तते बुद्धिर्मा राजन्विमना भव
ahaṃ vahiṣye pāñcālīṃ yatra yatra na śakṣyati
iti me vartate buddhirmā rājanvimanā bhava
- 17
सुकुमारौ तथा वीरौ माद्रीनन्दिकरावुभौ
दुर्गे संतारयिष्यामि यद्यशक्तौ भविष्यतः
sukumārau tathā vīrau mādrīnandikarāvubhau
durge saṃtārayiṣyāmi yadyaśaktau bhaviṣyataḥ
- 18
युधिष्ठिर उवाच
एवं ते भाषमाणस्य बलं भीमाभिवर्धताम्
यस्त्वम् उत्सहसे वोढुं द्रौपदीं विपुले ऽध्वनि
yudhiṣṭhira uvāca
evaṃ te bhāṣamāṇasya balaṃ bhīmābhivardhatām
yastvam utsahase voḍhuṃ draupadīṃ vipule 'dhvani
- 19
यमजौ चापि भद्रं ते नैतद् अन्यत्र विद्यते
बलं च ते यशश्चैव धर्मः कीर्तिश्च वर्धताम्
yamajau cāpi bhadraṃ te naitad anyatra vidyate
balaṃ ca te yaśaścaiva dharmaḥ kīrtiśca vardhatām
- 20
यस्त्वम् उत्सहसे नेतुं भ्रातरौ सह कृष्णया
मा ते ग्लानिर्महाबाहो मा च ते ऽस्तु पराभवः
yastvam utsahase netuṃ bhrātarau saha kṛṣṇayā
mā te glānirmahābāho mā ca te 'stu parābhavaḥ
- 21
वैशम्पायन उवाच
ततः कृष्णाब्रवीद्वाक्यं प्रहसन्ती मनोरमा
गमिष्यामि न संतापः कार्यो मां प्रति भारत
vaiśampāyana uvāca
tataḥ kṛṣṇābravīdvākyaṃ prahasantī manoramā
gamiṣyāmi na saṃtāpaḥ kāryo māṃ prati bhārata
- 22
लोमश उवाच
तपसा शक्यते गन्तुं पर्वतो गन्धमादनः
तपसा चैव कौन्तेय सर्वे योक्ष्यामहे वयम्
lomaśa uvāca
tapasā śakyate gantuṃ parvato gandhamādanaḥ
tapasā caiva kaunteya sarve yokṣyāmahe vayam
- 23
नकुलः सहदेवश्च भीमसेनश्च पार्थिव
अहं च त्वं च कौन्तेय द्रक्ष्यामः श्वेतवाहनम्
nakulaḥ sahadevaśca bhīmasenaśca pārthiva
ahaṃ ca tvaṃ ca kaunteya drakṣyāmaḥ śvetavāhanam
- 24
वैशम्पायन उवाच
एवं सम्भाषमाणास्ते सुबाहोर्विषयं महत्
ददृशुर्मुदिता राजन्प्रभूतगजवाजिमत्
vaiśampāyana uvāca
evaṃ sambhāṣamāṇāste subāhorviṣayaṃ mahat
dadṛśurmuditā rājanprabhūtagajavājimat
- 25
किराततङ्गणाकीर्णं कुणिन्दशतसंकुलम्
हिमवत्यमरैर्जुष्टं बह्वाश्चर्यसमाकुलम्
kirātataṅgaṇākīrṇaṃ kuṇindaśatasaṃkulam
himavatyamarairjuṣṭaṃ bahvāścaryasamākulam
- 26
सुबाहुश्चापि तान्दृष्ट्वा पूजया प्रत्यगृह्णत
विषयान्ते कुणिन्दानाम् ईश्वरः प्रीतिपूर्वकम्
subāhuścāpi tāndṛṣṭvā pūjayā pratyagṛhṇata
viṣayānte kuṇindānām īśvaraḥ prītipūrvakam
- 27
तत्र ते पूजितास्तेन सर्व एव सुखोषिताः
प्रतस्थुर्विमले सूर्ये हिमवन्तं गिरिं प्रति
tatra te pūjitāstena sarva eva sukhoṣitāḥ
pratasthurvimale sūrye himavantaṃ giriṃ prati
- 28
इन्द्रसेनमुखांश्चैव भृत्यान्पौरोगवांस्तथा
सूदांश्च परिबर्हं च द्रौपद्याः सर्वशो नृप
indrasenamukhāṃścaiva bhṛtyānpaurogavāṃstathā
sūdāṃśca paribarhaṃ ca draupadyāḥ sarvaśo nṛpa
- 29
राज्ञः कुणिन्दाधिपतेः परिदाय महारथाः
पद्भिर् एव महावीर्या ययुः कौरवनन्दनाः
rājñaḥ kuṇindādhipateḥ paridāya mahārathāḥ
padbhir eva mahāvīryā yayuḥ kauravanandanāḥ
- 30
ते शनैः प्राद्रवन्सर्वे कृष्णया सह पाण्डवाः
तस्माद्देशात्सुसंहृष्टा द्रष्टुकामा धनंजयम्
te śanaiḥ prādravansarve kṛṣṇayā saha pāṇḍavāḥ
tasmāddeśātsusaṃhṛṣṭā draṣṭukāmā dhanaṃjayam

