24 shlokas
- 1
वैशम्पायन उवाच
तस्यां रजन्यां व्युष्टायां धर्मराजो युधिष्ठिरः
उत्थायावश्यकार्याणि कृतवान्भ्रातृभिः सह
vaiśampāyana uvāca
tasyāṃ rajanyāṃ vyuṣṭāyāṃ dharmarājo yudhiṣṭhiraḥ
utthāyāvaśyakāryāṇi kṛtavānbhrātṛbhiḥ saha
- 2
ततः संचोदयामास सो ऽर्जुनं भ्रातृनन्दनम्
दर्शयास्त्राणि कौन्तेय यैर्जिता दानवास्त्वया
tataḥ saṃcodayāmāsa so 'rjunaṃ bhrātṛnandanam
darśayāstrāṇi kaunteya yairjitā dānavāstvayā
- 3
ततो धनंजयो राजन्देवैर्दत्तानि पाण्डवः
अस्त्राणि तानि दिव्यानि दर्शयामास भारत
tato dhanaṃjayo rājandevairdattāni pāṇḍavaḥ
astrāṇi tāni divyāni darśayāmāsa bhārata
- 4
यथान्यायं महातेजाः शौचं परमम् आस्थितः
गिरिकूबरं पादपाङ्गं शुभवेणु त्रिवेणुकम्
पार्थिवं रथम् आस्थाय शोभमानो धनंजयः
yathānyāyaṃ mahātejāḥ śaucaṃ paramam āsthitaḥ
girikūbaraṃ pādapāṅgaṃ śubhaveṇu triveṇukam
pārthivaṃ ratham āsthāya śobhamāno dhanaṃjayaḥ
- 5
ततः सुदंशितस्तेन कवचेन सुवर्चसा
धनुर् आदाय गाण्डीवं देवदत्तं च वारिजम्
tataḥ sudaṃśitastena kavacena suvarcasā
dhanur ādāya gāṇḍīvaṃ devadattaṃ ca vārijam
- 6
शोशुभ्यमानः कौन्तेय आनुपूर्व्यान्महाभुजः
अस्त्राणि तानि दिव्यानि दर्शनायोपचक्रमे
śośubhyamānaḥ kaunteya ānupūrvyānmahābhujaḥ
astrāṇi tāni divyāni darśanāyopacakrame
- 7
अथ प्रयोक्ष्यमाणेन दिव्यान्यस्त्राणि तेन वै
समाक्रान्ता मही पद्भ्यां समकम्पत सद्रुमा
atha prayokṣyamāṇena divyānyastrāṇi tena vai
samākrāntā mahī padbhyāṃ samakampata sadrumā
- 8
क्षुभिताः सरितश्चैव तथैव च महोदधिः
शैलाश्चापि व्यशीर्यन्त न ववौ च समीरणः
kṣubhitāḥ saritaścaiva tathaiva ca mahodadhiḥ
śailāścāpi vyaśīryanta na vavau ca samīraṇaḥ
- 9
न बभासे सहस्रांशुर्न जज्वाल च पावकः
न वेदाः प्रतिभान्ति स्म द्विजातीनां कथंचन
na babhāse sahasrāṃśurna jajvāla ca pāvakaḥ
na vedāḥ pratibhānti sma dvijātīnāṃ kathaṃcana
- 10
अन्तर्भूमिगता ये च प्राणिनो जनमेजय
पीड्यमानाः समुत्थाय पाण्डवं पर्यवारयन्
antarbhūmigatā ye ca prāṇino janamejaya
pīḍyamānāḥ samutthāya pāṇḍavaṃ paryavārayan
- 11
वेपमानाः प्राञ्जलयस्ते सर्वे पिहिताननाः
दह्यमानास्तदास्त्रैस्तैर्याचन्ति स्म धनंजयम्
vepamānāḥ prāñjalayaste sarve pihitānanāḥ
dahyamānāstadāstraistairyācanti sma dhanaṃjayam
- 12
ततो ब्रह्मर्षयश्चैव सिद्धाश्चैव सुरर्षयः
जङ्गमानि च भूतानि सर्वाण्येवावतस्थिरे
tato brahmarṣayaścaiva siddhāścaiva surarṣayaḥ
jaṅgamāni ca bhūtāni sarvāṇyevāvatasthire
- 13
राजर्षयश्च प्रवरास्तथैव च दिवौकसः
यक्षराक्षसगन्धर्वास्तथैव च पतत्रिणः
rājarṣayaśca pravarāstathaiva ca divaukasaḥ
yakṣarākṣasagandharvāstathaiva ca patatriṇaḥ
- 14
ततः पितामहश्चैव लोकपालाश्च सर्वशः
भगवांश्च महादेवः सगणो ऽभ्याययौ तदा
tataḥ pitāmahaścaiva lokapālāśca sarvaśaḥ
bhagavāṃśca mahādevaḥ sagaṇo 'bhyāyayau tadā
- 15
ततो वायुर्महाराज दिव्यैर्माल्यैः सुगन्धिभिः
अभितः पाण्डवांश्चित्रैर् अवचक्रे समन्ततः
tato vāyurmahārāja divyairmālyaiḥ sugandhibhiḥ
abhitaḥ pāṇḍavāṃścitrair avacakre samantataḥ
- 16
जगुश्च गाथा विविधा गन्धर्वाः सुरचोदिताः
ननृतुः संघशश्चैव राजन्न् अप्सरसां गणाः
jaguśca gāthā vividhā gandharvāḥ suracoditāḥ
nanṛtuḥ saṃghaśaścaiva rājann apsarasāṃ gaṇāḥ
- 17
तस्मिंस्तु तुमुले काले नारदः सुरचोदितः
आगम्याह वचः पार्थं श्रवणीयम् इदं नृप
tasmiṃstu tumule kāle nāradaḥ suracoditaḥ
āgamyāha vacaḥ pārthaṃ śravaṇīyam idaṃ nṛpa
- 18
अर्जुनार्जुन मा युङ्क्ष्व दिव्यान्यस्त्राणि भारत
नैतानि निरधिष्ठाने प्रयुज्यन्ते कदाचन
arjunārjuna mā yuṅkṣva divyānyastrāṇi bhārata
naitāni niradhiṣṭhāne prayujyante kadācana
- 19
अधिष्ठाने न वानार्तः प्रयुञ्जीत कदाचन
प्रयोगे सुमहान्दोषो ह्यस्त्राणां कुरुनन्दन
adhiṣṭhāne na vānārtaḥ prayuñjīta kadācana
prayoge sumahāndoṣo hyastrāṇāṃ kurunandana
- 20
एतानि रक्ष्यमाणानि धनंजय यथागमम्
बलवन्ति सुखार्हाणि भविष्यन्ति न संशयः
etāni rakṣyamāṇāni dhanaṃjaya yathāgamam
balavanti sukhārhāṇi bhaviṣyanti na saṃśayaḥ
- 21
अरक्ष्यमाणान्येतानि त्रैलोक्यस्यापि पाण्डव
भवन्ति स्म विनाशाय मैवं भूयः कृथाः क्वचित्
arakṣyamāṇānyetāni trailokyasyāpi pāṇḍava
bhavanti sma vināśāya maivaṃ bhūyaḥ kṛthāḥ kvacit
- 22
अजातशत्रो त्वं चैव द्रक्ष्यसे तानि संयुगे
योज्यमानानि पार्थेन द्विषताम् अवमर्दने
ajātaśatro tvaṃ caiva drakṣyase tāni saṃyuge
yojyamānāni pārthena dviṣatām avamardane
- 23
निवार्याथ ततः पार्थं सर्वे देवा यथागतम्
जग्मुर् अन्ये च ये तत्र समाजग्मुर्नरर्षभ
nivāryātha tataḥ pārthaṃ sarve devā yathāgatam
jagmur anye ca ye tatra samājagmurnararṣabha
- 24
तेषु सर्वेषु कौरव्य प्रतियातेषु पाण्डवाः
तस्मिन्न् एव वने हृष्टास्त ऊषुः सह कृष्णया
teṣu sarveṣu kauravya pratiyāteṣu pāṇḍavāḥ
tasminn eva vane hṛṣṭāsta ūṣuḥ saha kṛṣṇayā

