10 shlokas
- 1
जनमेजय उवाच
एवं हृतायां कृष्णायां प्राप्य क्लेशम् अनुत्तमम्
अत ऊर्ध्वं नरव्याघ्राः किम् अकुर्वत पाण्डवाः
janamejaya uvāca
evaṃ hṛtāyāṃ kṛṣṇāyāṃ prāpya kleśam anuttamam
ata ūrdhvaṃ naravyāghrāḥ kim akurvata pāṇḍavāḥ
- 2
वैशम्पायन उवाच
एवं कृष्णां मोक्षयित्वा विनिर्जित्य जयद्रथम्
आसांचक्रे मुनिगणैर्धर्मराजो युधिष्ठिरः
vaiśampāyana uvāca
evaṃ kṛṣṇāṃ mokṣayitvā vinirjitya jayadratham
āsāṃcakre munigaṇairdharmarājo yudhiṣṭhiraḥ
- 3
तेषां मध्ये महर्षीणां शृण्वताम् अनुशोचताम्
मार्कण्डेयम् इदं वाक्यम् अब्रवीत्पाण्डुनन्दनः
teṣāṃ madhye maharṣīṇāṃ śṛṇvatām anuśocatām
mārkaṇḍeyam idaṃ vākyam abravītpāṇḍunandanaḥ
- 4
मन्ये कालश्च बलवान्दैवं च विधिनिर्मितम्
भवितव्यं च भूतानां यस्य नास्ति व्यतिक्रमः
manye kālaśca balavāndaivaṃ ca vidhinirmitam
bhavitavyaṃ ca bhūtānāṃ yasya nāsti vyatikramaḥ
- 5
कथं हि पत्नीम् अस्माकं धर्मज्ञां धर्मचारिणीम्
संस्पृशेद् ईदृशो भावः शुचिं स्तैन्यम् इवानृतम्
kathaṃ hi patnīm asmākaṃ dharmajñāṃ dharmacāriṇīm
saṃspṛśed īdṛśo bhāvaḥ śuciṃ stainyam ivānṛtam
- 6
न हि पापं कृतं किंचित्कर्म वा निन्दितं क्वचित्
द्रौपद्या ब्राह्मणेष्वेव धर्मः सुचरितो महान्
na hi pāpaṃ kṛtaṃ kiṃcitkarma vā ninditaṃ kvacit
draupadyā brāhmaṇeṣveva dharmaḥ sucarito mahān
- 7
तां जहार बलाद्राजा मूढबुद्धिर्जयद्रथः
तस्याः संहरणात्प्राप्तः शिरसः केशवापनम्
पराजयं च संग्रामे ससहायः समाप्तवान्
tāṃ jahāra balādrājā mūḍhabuddhirjayadrathaḥ
tasyāḥ saṃharaṇātprāptaḥ śirasaḥ keśavāpanam
parājayaṃ ca saṃgrāme sasahāyaḥ samāptavān
- 8
प्रत्याहृता तथास्माभिर्हत्वा तत्सैन्धवं बलम्
तद्दारहरणं प्राप्तम् अस्माभिरवितर्कितम्
pratyāhṛtā tathāsmābhirhatvā tatsaindhavaṃ balam
taddāraharaṇaṃ prāptam asmābhiravitarkitam
- 9
दुःखश्चायं वने वासो मृगयायां च जीविका
हिंसा च मृगजातीनां वनौकोभिर्वनौकसाम्
ज्ञातिभिर्विप्रवासश्च मिथ्या व्यवसितैरयम्
duḥkhaścāyaṃ vane vāso mṛgayāyāṃ ca jīvikā
hiṃsā ca mṛgajātīnāṃ vanaukobhirvanaukasām
jñātibhirvipravāsaśca mithyā vyavasitairayam
- 10
अस्ति नूनं मया कश्चिद् अल्पभाग्यतरो नरः
भवता दृष्टपूर्वो वा श्रुतपूर्वो ऽपि वा भवेत्
asti nūnaṃ mayā kaścid alpabhāgyataro naraḥ
bhavatā dṛṣṭapūrvo vā śrutapūrvo 'pi vā bhavet

