17 shlokas
- 1
वैशम्पायन उवाच
मार्कण्डेयादिभिर्विप्रैः पाण्डवैश्च महात्मभिः
कथाभिर् अनुकूलाभिः सहासित्वा जनार्दनः
vaiśampāyana uvāca
mārkaṇḍeyādibhirvipraiḥ pāṇḍavaiśca mahātmabhiḥ
kathābhir anukūlābhiḥ sahāsitvā janārdanaḥ
- 2
ततस्तैः संविदं कृत्वा यथावन्मधुसूदनः
आरुरुक्षू रथं सत्याम् आह्वयामास केशवः
tatastaiḥ saṃvidaṃ kṛtvā yathāvanmadhusūdanaḥ
ārurukṣū rathaṃ satyām āhvayāmāsa keśavaḥ
- 3
सत्यभामा ततस्तत्र स्वजित्वा द्रुपदात्मजाम्
उवाच वचनं हृद्यं यथाभावसमाहितम्
satyabhāmā tatastatra svajitvā drupadātmajām
uvāca vacanaṃ hṛdyaṃ yathābhāvasamāhitam
- 4
कृष्णे मा भूत्तवोत्कण्ठा मा व्यथा मा प्रजागरः
भर्तृभिर्देवसंकाशैर्जितां प्राप्स्यसि मेदिनीम्
kṛṣṇe mā bhūttavotkaṇṭhā mā vyathā mā prajāgaraḥ
bhartṛbhirdevasaṃkāśairjitāṃ prāpsyasi medinīm
- 5
न ह्येवं शीलसम्पन्ना नैवं पूजितलक्षणाः
प्राप्नुवन्ति चिरं क्लेशं यथा त्वम् असितेक्षणे
na hyevaṃ śīlasampannā naivaṃ pūjitalakṣaṇāḥ
prāpnuvanti ciraṃ kleśaṃ yathā tvam asitekṣaṇe
- 6
अवश्यं च त्वया भूमिर् इयं निहतकण्टका
भर्तृभिः सह भोक्तव्या निर्द्वंद्वेति श्रुतं मया
avaśyaṃ ca tvayā bhūmir iyaṃ nihatakaṇṭakā
bhartṛbhiḥ saha bhoktavyā nirdvaṃdveti śrutaṃ mayā
- 7
धार्तराष्ट्रवधं कृत्वा वैराणि प्रतियात्य च
युधिष्ठिरस्थां पृथिवीं द्रष्टासि द्रुपदात्मजे
dhārtarāṣṭravadhaṃ kṛtvā vairāṇi pratiyātya ca
yudhiṣṭhirasthāṃ pṛthivīṃ draṣṭāsi drupadātmaje
- 8
यास्ताः प्रव्राजमानां त्वां प्राहसन्दर्पमोहिताः
ताः क्षिप्रं हतसंकल्पा द्रक्ष्यसि त्वं कुरुस्त्रियः
yāstāḥ pravrājamānāṃ tvāṃ prāhasandarpamohitāḥ
tāḥ kṣipraṃ hatasaṃkalpā drakṣyasi tvaṃ kurustriyaḥ
- 9
तव दुःखोपपन्नाया यैर् आचरितम् अप्रियम्
विद्धि सम्प्रस्थितान्सर्वांस्तान्कृष्णे यमसादनम्
tava duḥkhopapannāyā yair ācaritam apriyam
viddhi samprasthitānsarvāṃstānkṛṣṇe yamasādanam
- 10
पुत्रस्ते प्रतिविन्ध्यश्च सुतसोमस्तथा विभुः
श्रुतकर्मार्जुनिश्चैव शतानीकश्च नाकुलिः
सहदेवाच्च यो जातः श्रुतसेनस्तवात्मजः
putraste prativindhyaśca sutasomastathā vibhuḥ
śrutakarmārjuniścaiva śatānīkaśca nākuliḥ
sahadevācca yo jātaḥ śrutasenastavātmajaḥ
- 11
सर्वे कुशलिनो वीराः कृतास्त्राश्च सुतास्तव
अभिमन्युर् इव प्रीता द्वारवत्यां रता भृशम्
sarve kuśalino vīrāḥ kṛtāstrāśca sutāstava
abhimanyur iva prītā dvāravatyāṃ ratā bhṛśam
- 12
त्वम् इवैषां सुभद्रा च प्रीत्या सर्वात्मना स्थिता
प्रीयते भावनिर्द्वंद्वा तेभ्यश्च विगतज्वरा
tvam ivaiṣāṃ subhadrā ca prītyā sarvātmanā sthitā
prīyate bhāvanirdvaṃdvā tebhyaśca vigatajvarā
- 13
भेजे सर्वात्मना चैव प्रद्युम्नजननी तथा
भानुप्रभृतिभिश्चैनान्विशिनष्टि च केशवः
bheje sarvātmanā caiva pradyumnajananī tathā
bhānuprabhṛtibhiścainānviśinaṣṭi ca keśavaḥ
- 14
भोजनाच्छादने चैषां नित्यं मे श्वशुरः स्थितः
रामप्रभृतयः सर्वे भजन्त्यन्धकवृष्णयः
तुल्यो हि प्रणयस्तेषां प्रद्युम्नस्य च भामिनि
bhojanācchādane caiṣāṃ nityaṃ me śvaśuraḥ sthitaḥ
rāmaprabhṛtayaḥ sarve bhajantyandhakavṛṣṇayaḥ
tulyo hi praṇayasteṣāṃ pradyumnasya ca bhāmini
- 15
एवमादि प्रियं प्रीत्या हृद्यम् उक्त्वा मनोनुगम्
गमनाय मनश्चक्रे वासुदेवरथं प्रति
evamādi priyaṃ prītyā hṛdyam uktvā manonugam
gamanāya manaścakre vāsudevarathaṃ prati
- 16
तां कृष्णां कृष्णमहिषी चकाराभिप्रदक्षिणम्
आरुरोह रथं शौरेः सत्यभामा च भामिनी
tāṃ kṛṣṇāṃ kṛṣṇamahiṣī cakārābhipradakṣiṇam
āruroha rathaṃ śaureḥ satyabhāmā ca bhāminī
- 17
स्मयित्वा तु यदुश्रेष्ठो द्रौपदीं परिसान्त्व्य च
उपावर्त्य ततः शीघ्रैर्हयैः प्रायात्परंतपः
smayitvā tu yaduśreṣṭho draupadīṃ parisāntvya ca
upāvartya tataḥ śīghrairhayaiḥ prāyātparaṃtapaḥ

