14 shlokas
- 1
मार्कण्डेय उवाच
स्कन्दस्य पार्षदान्घोराञ्शृणुष्वाद्भुतदर्शनान्
वज्रप्रहारात्स्कन्दस्य जज्ञुस्तत्र कुमारकाः
ये हरन्ति शिशूञ्जातान्गर्भस्थांश्चैव दारुणाः
mārkaṇḍeya uvāca
skandasya pārṣadānghorāñśṛṇuṣvādbhutadarśanān
vajraprahārātskandasya jajñustatra kumārakāḥ
ye haranti śiśūñjātāngarbhasthāṃścaiva dāruṇāḥ
- 2
वज्रप्रहारात्कन्याश्च जज्ञिरे ऽस्य महाबलाः
कुमाराश्च विशाखं तं पितृत्वे समकल्पयन्
vajraprahārātkanyāśca jajñire 'sya mahābalāḥ
kumārāśca viśākhaṃ taṃ pitṛtve samakalpayan
- 3
स भूत्वा भगवान्संख्ये रक्षंश्छागमुखस्तदा
वृतः कन्यागणैः सर्वैर् आत्मनीनैश्च पुत्रकैः
sa bhūtvā bhagavānsaṃkhye rakṣaṃśchāgamukhastadā
vṛtaḥ kanyāgaṇaiḥ sarvair ātmanīnaiśca putrakaiḥ
- 4
मातॄणां प्रेक्षतीनां च भद्रशाखश्च कौशलः
ततः कुमारपितरं स्कन्दम् आहुर्जना भुवि
mātṝṇāṃ prekṣatīnāṃ ca bhadraśākhaśca kauśalaḥ
tataḥ kumārapitaraṃ skandam āhurjanā bhuvi
- 5
रुद्रम् अग्निम् उमां स्वाहां प्रदेशेषु महाबलाम्
यजन्ति पुत्रकामाश्च पुत्रिणश्च सदा जनाः
rudram agnim umāṃ svāhāṃ pradeśeṣu mahābalām
yajanti putrakāmāśca putriṇaśca sadā janāḥ
- 6
यास्तास्त्वजनयत्कन्यास्तपो नाम हुताशनः
किं करोमीति ताः स्कन्दं सम्प्राप्ताः समभाषत
yāstāstvajanayatkanyāstapo nāma hutāśanaḥ
kiṃ karomīti tāḥ skandaṃ samprāptāḥ samabhāṣata
- 7
मातर ऊचुः
भवेम सर्वलोकस्य वयं मातर उत्तमाः
प्रसादात्तव पूज्याश्च प्रियम् एतत्कुरुष्व नः
mātara ūcuḥ
bhavema sarvalokasya vayaṃ mātara uttamāḥ
prasādāttava pūjyāśca priyam etatkuruṣva naḥ
- 8
मार्कण्डेय उवाच
सो ऽब्रवीद्बाढम् इत्येवं भविष्यध्वं पृथग्विधाः
अशिवाश्च शिवाश्चैव पुनः पुनर् उदारधीः
mārkaṇḍeya uvāca
so 'bravīdbāḍham ityevaṃ bhaviṣyadhvaṃ pṛthagvidhāḥ
aśivāśca śivāścaiva punaḥ punar udāradhīḥ
- 9
ततः संकल्प्य पुत्रत्वे स्कन्दं मातृगणो ऽगमत्
काकी च हलिमा चैव रुद्राथ बृहली तथा
आर्या पलाला वै मित्रा सप्तैताः शिशुमातरः
tataḥ saṃkalpya putratve skandaṃ mātṛgaṇo 'gamat
kākī ca halimā caiva rudrātha bṛhalī tathā
āryā palālā vai mitrā saptaitāḥ śiśumātaraḥ
- 10
एतासां वीर्यसम्पन्नः शिशुर्नामातिदारुणः
स्कन्दप्रसादजः पुत्रो लोहिताक्षो भयंकरः
etāsāṃ vīryasampannaḥ śiśurnāmātidāruṇaḥ
skandaprasādajaḥ putro lohitākṣo bhayaṃkaraḥ
- 11
एष वीराष्टकः प्रोक्तः स्कन्दमातृगणोद्भवः
छागवक्त्रेण सहितो नवकः परिकीर्त्यते
eṣa vīrāṣṭakaḥ proktaḥ skandamātṛgaṇodbhavaḥ
chāgavaktreṇa sahito navakaḥ parikīrtyate
- 12
षष्ठं छागमयं वक्त्रं स्कन्दस्यैवेति विद्धि तत्
षट्शिरो ऽभ्यन्तरं राजन्नित्यं मातृगणार्चितम्
ṣaṣṭhaṃ chāgamayaṃ vaktraṃ skandasyaiveti viddhi tat
ṣaṭśiro 'bhyantaraṃ rājannityaṃ mātṛgaṇārcitam
- 13
षण्णां तु प्रवरं तस्य शीर्षाणाम् इह शब्द्यते
शक्तिं येनासृजद्दिव्यां भद्रशाख इति स्म ह
ṣaṇṇāṃ tu pravaraṃ tasya śīrṣāṇām iha śabdyate
śaktiṃ yenāsṛjaddivyāṃ bhadraśākha iti sma ha
- 14
इत्येतद्विविधाकारं वृत्तं शुक्लस्य पञ्चमीम्
तत्र युद्धं महाघोरं वृत्तं षष्ठ्यां जनाधिप
ityetadvividhākāraṃ vṛttaṃ śuklasya pañcamīm
tatra yuddhaṃ mahāghoraṃ vṛttaṃ ṣaṣṭhyāṃ janādhipa

