16 shlokas
- 1
मार्कण्डेय उवाच
तस्यां रात्र्यां व्यतीतायाम् उदिते सूर्यमण्डले
कृतपूर्वाह्णिकाः सर्वे समेयुस्ते तपोधनाः
mārkaṇḍeya uvāca
tasyāṃ rātryāṃ vyatītāyām udite sūryamaṇḍale
kṛtapūrvāhṇikāḥ sarve sameyuste tapodhanāḥ
- 2
तद् एव सर्वं सावित्र्या महाभाग्यं महर्षयः
द्युमत्सेनाय नातृप्यन्कथयन्तः पुनः पुनः
tad eva sarvaṃ sāvitryā mahābhāgyaṃ maharṣayaḥ
dyumatsenāya nātṛpyankathayantaḥ punaḥ punaḥ
- 3
ततः प्रकृतयः सर्वाः शाल्वेभ्यो ऽभ्यागता नृप
आचख्युर्निहतं चैव स्वेनामात्येन तं नृपम्
tataḥ prakṛtayaḥ sarvāḥ śālvebhyo 'bhyāgatā nṛpa
ācakhyurnihataṃ caiva svenāmātyena taṃ nṛpam
- 4
तं मन्त्रिणा हतं श्रुत्वा ससहायं सबान्धवम्
न्यवेदयन्यथातत्त्वं विद्रुतं च द्विषद्बलम्
taṃ mantriṇā hataṃ śrutvā sasahāyaṃ sabāndhavam
nyavedayanyathātattvaṃ vidrutaṃ ca dviṣadbalam
- 5
ऐकमत्यं च सर्वस्य जनस्याथ नृपं प्रति
सचक्षुर्वाप्यचक्षुर्वा स नो राजा भवत्विति
aikamatyaṃ ca sarvasya janasyātha nṛpaṃ prati
sacakṣurvāpyacakṣurvā sa no rājā bhavatviti
- 6
अनेन निश्चयेनेह वयं प्रस्थापिता नृप
प्राप्तानीमानि यानानि चतुरङ्गं च ते बलम्
anena niścayeneha vayaṃ prasthāpitā nṛpa
prāptānīmāni yānāni caturaṅgaṃ ca te balam
- 7
प्रयाहि राजन्भद्रं ते घुष्टस्ते नगरे जयः
अध्यास्स्व चिररात्राय पितृपैतामहं पदम्
prayāhi rājanbhadraṃ te ghuṣṭaste nagare jayaḥ
adhyāssva cirarātrāya pitṛpaitāmahaṃ padam
- 8
चक्षुष्मन्तं च तं दृष्ट्वा राजानं वपुषान्वितम्
मूर्धभिः पतिताः सर्वे विस्मयोत्फुल्ललोचनाः
cakṣuṣmantaṃ ca taṃ dṛṣṭvā rājānaṃ vapuṣānvitam
mūrdhabhiḥ patitāḥ sarve vismayotphullalocanāḥ
- 9
ततो ऽभिवाद्य तान्वृद्धान्द्विजान् आश्रमवासिनः
तैश्चाभिपूजितः सर्वैः प्रययौ नगरं प्रति
tato 'bhivādya tānvṛddhāndvijān āśramavāsinaḥ
taiścābhipūjitaḥ sarvaiḥ prayayau nagaraṃ prati
- 10
शैब्या च सह सावित्र्या स्वास्तीर्णेन सुवर्चसा
नरयुक्तेन यानेन प्रययौ सेनया वृता
śaibyā ca saha sāvitryā svāstīrṇena suvarcasā
narayuktena yānena prayayau senayā vṛtā
- 11
ततो ऽभिषिषिचुः प्रीत्या द्युमत्सेनं पुरोहिताः
पुत्रं चास्य महात्मानं यौवराज्ये ऽभ्यषेचयन्
tato 'bhiṣiṣicuḥ prītyā dyumatsenaṃ purohitāḥ
putraṃ cāsya mahātmānaṃ yauvarājye 'bhyaṣecayan
- 12
ततः कालेन महता सावित्र्याः कीर्तिवर्धनम्
तद्वै पुत्रशतं जज्ञे शूराणाम् अनिवर्तिनाम्
tataḥ kālena mahatā sāvitryāḥ kīrtivardhanam
tadvai putraśataṃ jajñe śūrāṇām anivartinām
- 13
भ्रातॄणां सोदराणां च तथैवास्याभवच्छतम्
मद्राधिपस्याश्वपतेर्मालव्यां सुमहाबलम्
bhrātṝṇāṃ sodarāṇāṃ ca tathaivāsyābhavacchatam
madrādhipasyāśvapatermālavyāṃ sumahābalam
- 14
एवम् आत्मा पिता माता श्वश्रूः श्वशुर एव च
भर्तुः कुलं च सावित्र्या सर्वं कृच्छ्रात्समुद्धृतम्
evam ātmā pitā mātā śvaśrūḥ śvaśura eva ca
bhartuḥ kulaṃ ca sāvitryā sarvaṃ kṛcchrātsamuddhṛtam
- 15
तथैवैषापि कल्याणी द्रौपदी शीलसंमता
तारयिष्यति वः सर्वान्सावित्रीव कुलाङ्गना
tathaivaiṣāpi kalyāṇī draupadī śīlasaṃmatā
tārayiṣyati vaḥ sarvānsāvitrīva kulāṅganā
- 16
वैशम्पायन उवाच
एवं स पाण्डवस्तेन अनुनीतो महात्मना
विशोको विज्वरो राजन्काम्यके न्यवसत्तदा
vaiśampāyana uvāca
evaṃ sa pāṇḍavastena anunīto mahātmanā
viśoko vijvaro rājankāmyake nyavasattadā

