14 shlokas
- 1
मार्कण्डेय उवाच
ततो निविशमानांस्तान्सैनिकान्रावणानुगाः
अभिजग्मुर्गणान् एके पिशाचक्षुद्ररक्षसाम्
mārkaṇḍeya uvāca
tato niviśamānāṃstānsainikānrāvaṇānugāḥ
abhijagmurgaṇān eke piśācakṣudrarakṣasām
- 2
पर्वणः पूतनो जम्भः खरः क्रोधवशो हरिः
प्ररुजश्चारुजश्चैव प्रघसश्चैवमादयः
parvaṇaḥ pūtano jambhaḥ kharaḥ krodhavaśo hariḥ
prarujaścārujaścaiva praghasaścaivamādayaḥ
- 3
ततो ऽभिपततां तेषाम् अदृश्यानां दुरात्मनाम्
अन्तर्धानवधं तज्ज्ञश्चकार स विभीषणः
tato 'bhipatatāṃ teṣām adṛśyānāṃ durātmanām
antardhānavadhaṃ tajjñaścakāra sa vibhīṣaṇaḥ
- 4
ते दृश्यमाना हरिभिर्बलिभिर्दूरपातिभिः
निहताः सर्वशो राजन्महीं जग्मुर्गतासवः
te dṛśyamānā haribhirbalibhirdūrapātibhiḥ
nihatāḥ sarvaśo rājanmahīṃ jagmurgatāsavaḥ
- 5
अमृष्यमाणः सबलो रावणो निर्ययावथ
व्यूह्य चौशनसं व्यूहं हरीन्सर्वान् अहारयत्
amṛṣyamāṇaḥ sabalo rāvaṇo niryayāvatha
vyūhya cauśanasaṃ vyūhaṃ harīnsarvān ahārayat
- 6
राघवस्त्वभिनिर्याय व्यूढानीकं दशाननम्
बार्हस्पत्यं विधिं कृत्वा प्रत्यव्यूहन्निशाचरम्
rāghavastvabhiniryāya vyūḍhānīkaṃ daśānanam
bārhaspatyaṃ vidhiṃ kṛtvā pratyavyūhanniśācaram
- 7
समेत्य युयुधे तत्र ततो रामेण रावणः
युयुधे लक्ष्मणश्चैव तथैवेन्द्रजिता सह
sametya yuyudhe tatra tato rāmeṇa rāvaṇaḥ
yuyudhe lakṣmaṇaścaiva tathaivendrajitā saha
- 8
विरूपाक्षेण सुग्रीवस्तारेण च निखर्वटः
तुण्डेन च नलस्तत्र पटुशः पनसेन च
virūpākṣeṇa sugrīvastāreṇa ca nikharvaṭaḥ
tuṇḍena ca nalastatra paṭuśaḥ panasena ca
- 9
विषह्यं यं हि यो मेने स स तेन समेयिवान्
युयुधे युद्धवेलायां स्वबाहुबलम् आश्रितः
viṣahyaṃ yaṃ hi yo mene sa sa tena sameyivān
yuyudhe yuddhavelāyāṃ svabāhubalam āśritaḥ
- 10
स सम्प्रहारो ववृधे भीरूणां भयवर्धनः
लोमसंहर्षणो घोरः पुरा देवासुरे यथा
sa samprahāro vavṛdhe bhīrūṇāṃ bhayavardhanaḥ
lomasaṃharṣaṇo ghoraḥ purā devāsure yathā
- 11
रावणो रामम् आनर्छच्छक्तिशूलासिवृष्टिभिः
निशितैर् आयसैस्तीक्ष्णै रावणं चापि राघवः
rāvaṇo rāmam ānarchacchaktiśūlāsivṛṣṭibhiḥ
niśitair āyasaistīkṣṇai rāvaṇaṃ cāpi rāghavaḥ
- 12
तथैवेन्द्रजितं यत्तं लक्ष्मणो मर्मभेदिभिः
इन्द्रजिच्चापि सौमित्रिं बिभेद बहुभिः शरैः
tathaivendrajitaṃ yattaṃ lakṣmaṇo marmabhedibhiḥ
indrajiccāpi saumitriṃ bibheda bahubhiḥ śaraiḥ
- 13
विभीषणः प्रहस्तं च प्रहस्तश्च विभीषणम्
खगपत्त्रैः शरैस्तीक्ष्णैर् अभ्यवर्षद्गतव्यथः
vibhīṣaṇaḥ prahastaṃ ca prahastaśca vibhīṣaṇam
khagapattraiḥ śaraistīkṣṇair abhyavarṣadgatavyathaḥ
- 14
तेषां बलवताम् आसीन्महास्त्राणां समागमः
विव्यथुः सकला येन त्रयो लोकाश्चराचराः
teṣāṃ balavatām āsīnmahāstrāṇāṃ samāgamaḥ
vivyathuḥ sakalā yena trayo lokāścarācarāḥ

