22 shlokas
- 1
वैशम्पायन उवाच
एवं सम्भाषमाणे तु धौम्ये कौरवनन्दन
लोमशः सुमहातेजा ऋषिस्तत्राजगाम ह
vaiśampāyana uvāca
evaṃ sambhāṣamāṇe tu dhaumye kauravanandana
lomaśaḥ sumahātejā ṛṣistatrājagāma ha
- 2
तं पाण्डवाग्रजो राजा सगणो ब्राह्मणाश्च ते
उदतिष्ठन्महाभागं दिवि शक्रम् इवामराः
taṃ pāṇḍavāgrajo rājā sagaṇo brāhmaṇāśca te
udatiṣṭhanmahābhāgaṃ divi śakram ivāmarāḥ
- 3
तम् अभ्यर्च्य यथान्यायं धर्मराजो युधिष्ठिरः
पप्रच्छागमने हेतुम् अटने च प्रयोजनम्
tam abhyarcya yathānyāyaṃ dharmarājo yudhiṣṭhiraḥ
papracchāgamane hetum aṭane ca prayojanam
- 4
स पृष्टः पाण्डुपुत्रेण प्रीयमाणो महामनाः
उवाच श्लक्ष्णया वाचा हर्षयन्न् इव पाण्डवान्
sa pṛṣṭaḥ pāṇḍuputreṇa prīyamāṇo mahāmanāḥ
uvāca ślakṣṇayā vācā harṣayann iva pāṇḍavān
- 5
संचरन्न् अस्मि कौन्तेय सर्वलोकान्यदृच्छया
गतः शक्रस्य सदनं तत्रापश्यं सुरेश्वरम्
saṃcarann asmi kaunteya sarvalokānyadṛcchayā
gataḥ śakrasya sadanaṃ tatrāpaśyaṃ sureśvaram
- 6
तव च भ्रातरं वीरम् अपश्यं सव्यसाचिनम्
शक्रस्यार्धासनगतं तत्र मे विस्मयो महान्
आसीत्पुरुषशार्दूल दृष्ट्वा पार्थं तथागतम्
tava ca bhrātaraṃ vīram apaśyaṃ savyasācinam
śakrasyārdhāsanagataṃ tatra me vismayo mahān
āsītpuruṣaśārdūla dṛṣṭvā pārthaṃ tathāgatam
- 7
आह मां तत्र देवेशो गच्छ पाण्डुसुतान् इति
सो ऽहम् अभ्यागतः क्षिप्रं दिदृक्षुस्त्वां सहानुजम्
āha māṃ tatra deveśo gaccha pāṇḍusutān iti
so 'ham abhyāgataḥ kṣipraṃ didṛkṣustvāṃ sahānujam
- 8
वचनात्पुरुहूतस्य पार्थस्य च महात्मनः
आख्यास्ये ते प्रियं तात महत्पाण्डवनन्दन
vacanātpuruhūtasya pārthasya ca mahātmanaḥ
ākhyāsye te priyaṃ tāta mahatpāṇḍavanandana
- 9
भ्रातृभिः सहितो राजन्कृष्णया चैव तच्छृणु
यत्त्वयोक्तो महाबाहुर् अस्त्रार्थं पाण्डवर्षभ
bhrātṛbhiḥ sahito rājankṛṣṇayā caiva tacchṛṇu
yattvayokto mahābāhur astrārthaṃ pāṇḍavarṣabha
- 10
तद् अस्त्रम् आप्तं पार्थेन रुद्राद् अप्रतिमं महत्
यत्तद्ब्रह्मशिरो नाम तपसा रुद्रम् आगतम्
tad astram āptaṃ pārthena rudrād apratimaṃ mahat
yattadbrahmaśiro nāma tapasā rudram āgatam
- 11
अमृताद् उत्थितं रौद्रं तल्लब्धं सव्यसाचिना
तत्समन्त्रं ससंहारं सप्रायश्चित्तमङ्गलम्
amṛtād utthitaṃ raudraṃ tallabdhaṃ savyasācinā
tatsamantraṃ sasaṃhāraṃ saprāyaścittamaṅgalam
- 12
वज्रं चान्यानि चास्त्राणि दण्डादीनि युधिष्ठिर
यमात्कुबेराद्वरुणाद् इन्द्राच्च कुरुनन्दन
अस्त्राण्यधीतवान्पार्थो दिव्यान्यमितविक्रमः
vajraṃ cānyāni cāstrāṇi daṇḍādīni yudhiṣṭhira
yamātkuberādvaruṇād indrācca kurunandana
astrāṇyadhītavānpārtho divyānyamitavikramaḥ
- 13
विश्वावसोश्च तनयाद्गीतं नृत्तं च साम च
वादित्रं च यथान्यायं प्रत्यविन्दद्यथाविधि
viśvāvasośca tanayādgītaṃ nṛttaṃ ca sāma ca
vāditraṃ ca yathānyāyaṃ pratyavindadyathāvidhi
- 14
एवं कृतास्त्रः कौन्तेयो गान्धर्वं वेदम् आप्तवान्
सुखं वसति बीभत्सुर् अनुजस्यानुजस्तव
evaṃ kṛtāstraḥ kaunteyo gāndharvaṃ vedam āptavān
sukhaṃ vasati bībhatsur anujasyānujastava
- 15
यदर्थं मां सुरश्रेष्ठ इदं वचनम् अब्रवीत्
तच्च ते कथयिष्यामि युधिष्ठिर निबोध मे
yadarthaṃ māṃ suraśreṣṭha idaṃ vacanam abravīt
tacca te kathayiṣyāmi yudhiṣṭhira nibodha me
- 16
भवान्मनुष्यलोकाय गमिष्यति न संशयः
ब्रूयाद्युधिष्ठिरं तत्र वचनान्मे द्विजोत्तम
bhavānmanuṣyalokāya gamiṣyati na saṃśayaḥ
brūyādyudhiṣṭhiraṃ tatra vacanānme dvijottama
- 17
आगमिष्यति ते भ्राता कृतास्त्रः क्षिप्रम् अर्जुनः
सुरकार्यं महत्कृत्वा यद् अशक्यं दिवौकसैः
āgamiṣyati te bhrātā kṛtāstraḥ kṣipram arjunaḥ
surakāryaṃ mahatkṛtvā yad aśakyaṃ divaukasaiḥ
- 18
तपसा तु त्वम् आत्मानं भ्रातृभिः सह योजय
तपसो हि परं नास्ति तपसा विन्दते महत्
tapasā tu tvam ātmānaṃ bhrātṛbhiḥ saha yojaya
tapaso hi paraṃ nāsti tapasā vindate mahat
- 19
अहं च कर्णं जानामि यथावद्भरतर्षभ
न स पार्थस्य संग्रामे कलाम् अर्हति षोडशीम्
ahaṃ ca karṇaṃ jānāmi yathāvadbharatarṣabha
na sa pārthasya saṃgrāme kalām arhati ṣoḍaśīm
- 20
यच्चापि ते भयं तस्मान्मनसिस्थम् अरिंदम
तच्चाप्यपहरिष्यामि सव्यसाचाविहागते
yaccāpi te bhayaṃ tasmānmanasistham ariṃdama
taccāpyapahariṣyāmi savyasācāvihāgate
- 21
यच्च ते मानसं वीर तीर्थयात्राम् इमां प्रति
तच्च ते लोमशः सर्वं कथयिष्यत्य् असंशयम्
yacca te mānasaṃ vīra tīrthayātrām imāṃ prati
tacca te lomaśaḥ sarvaṃ kathayiṣyaty asaṃśayam
- 22
यच्च किंचित्तपोयुक्तं फलं तीर्थेषु भारत
महर्षिर् एष यद्ब्रूयात्तच्छ्रद्धेयम् अनन्यथा
yacca kiṃcittapoyuktaṃ phalaṃ tīrtheṣu bhārata
maharṣir eṣa yadbrūyāttacchraddheyam ananyathā

