23 shlokas
- 1
लोमश उवाच
तं दृष्ट्वा घोरवदनं मदं देवः शतक्रतुः
आयान्तं भक्षयिष्यन्तं व्यात्ताननम् इवान्तकम्
lomaśa uvāca
taṃ dṛṣṭvā ghoravadanaṃ madaṃ devaḥ śatakratuḥ
āyāntaṃ bhakṣayiṣyantaṃ vyāttānanam ivāntakam
- 2
भयात्संस्तम्भितभुजः सृक्किणी लेलिहन्मुहुः
ततो ऽब्रवीद्देवराजश्च्यवनं भयपीडितः
bhayātsaṃstambhitabhujaḥ sṛkkiṇī lelihanmuhuḥ
tato 'bravīddevarājaścyavanaṃ bhayapīḍitaḥ
- 3
सोमार्हावश्विनावेतावद्य प्रभृति भार्गव
भविष्यतः सत्यम् एतद्वचो ब्रह्मन्ब्रवीमि ते
somārhāvaśvināvetāvadya prabhṛti bhārgava
bhaviṣyataḥ satyam etadvaco brahmanbravīmi te
- 4
न ते मिथ्या समारम्भो भवत्वेष परो विधिः
जानामि चाहं विप्रर्षे न मिथ्या त्वं करिष्यसि
na te mithyā samārambho bhavatveṣa paro vidhiḥ
jānāmi cāhaṃ viprarṣe na mithyā tvaṃ kariṣyasi
- 5
सोमार्हावश्विनावेतौ यथैवाद्य कृतौ त्वया
भूय एव तु ते वीर्यं प्रकाशेद् इति भार्गव
somārhāvaśvināvetau yathaivādya kṛtau tvayā
bhūya eva tu te vīryaṃ prakāśed iti bhārgava
- 6
सुकन्यायाः पितुश्चास्य लोके कीर्तिः प्रथेद् इति
अतो मयैतद्विहितं तव वीर्यप्रकाशनम्
तस्मात्प्रसादं कुरु मे भवत्वेतद्यथेच्छसि
sukanyāyāḥ pituścāsya loke kīrtiḥ prathed iti
ato mayaitadvihitaṃ tava vīryaprakāśanam
tasmātprasādaṃ kuru me bhavatvetadyathecchasi
- 7
एवम् उक्तस्य शक्रेण च्यवनस्य महात्मनः
स मन्युर्व्यगमच्छीघ्रं मुमोच च पुरंदरम्
evam uktasya śakreṇa cyavanasya mahātmanaḥ
sa manyurvyagamacchīghraṃ mumoca ca puraṃdaram
- 8
मदं च व्यभजद्राजन्पाने स्त्रीषु च वीर्यवान्
अक्षेषु मृगयायां च पूर्वसृष्टं पुनः पुनः
madaṃ ca vyabhajadrājanpāne strīṣu ca vīryavān
akṣeṣu mṛgayāyāṃ ca pūrvasṛṣṭaṃ punaḥ punaḥ
- 9
तथा मदं विनिष्क्षिप्य शक्रं संतर्प्य चेन्दुना
अश्विभ्यां सहितान्देवान्याजयित्वा च तं नृपम्
tathā madaṃ viniṣkṣipya śakraṃ saṃtarpya cendunā
aśvibhyāṃ sahitāndevānyājayitvā ca taṃ nṛpam
- 10
विख्याप्य वीर्यं सर्वेषु लोकेषु वदतां वरः
सुकन्यया सहारण्ये विजहारानुरक्तया
vikhyāpya vīryaṃ sarveṣu lokeṣu vadatāṃ varaḥ
sukanyayā sahāraṇye vijahārānuraktayā
- 11
तस्यैतद्द्विजसंघुष्टं सरो राजन्प्रकाशते
अत्र त्वं सह सोदर्यैः पितॄन्देवांश्च तर्पय
tasyaitaddvijasaṃghuṣṭaṃ saro rājanprakāśate
atra tvaṃ saha sodaryaiḥ pitṝndevāṃśca tarpaya
- 12
एतद्दृष्ट्वा महीपाल सिकताक्षं च भारत
सैन्धवारण्यम् आसाद्य कुल्यानां कुरु दर्शनम्
पुष्करेषु महाराज सर्वेषु च जलं स्पृश
etaddṛṣṭvā mahīpāla sikatākṣaṃ ca bhārata
saindhavāraṇyam āsādya kulyānāṃ kuru darśanam
puṣkareṣu mahārāja sarveṣu ca jalaṃ spṛśa
- 13
आर्चीकपर्वतश्चैव निवासो वै मनीषिणाम्
सदाफलः सदास्रोतो मरुतां स्थानम् उत्तमम्
चैत्याश्चैते बहुशतास्त्रिदशानां युधिष्ठिर
ārcīkaparvataścaiva nivāso vai manīṣiṇām
sadāphalaḥ sadāsroto marutāṃ sthānam uttamam
caityāścaite bahuśatāstridaśānāṃ yudhiṣṭhira
- 14
एतच्चन्द्रमसस्तीर्थम् ऋषयः पर्युपासते
वैखानसाश्च ऋषयो वालखिल्यास्तथैव च
etaccandramasastīrtham ṛṣayaḥ paryupāsate
vaikhānasāśca ṛṣayo vālakhilyāstathaiva ca
- 15
शृङ्गाणि त्रीणि पुण्याणि त्रीणि प्रस्रवणानि च
सर्वाण्यनुपरिक्रम्य यथाकामम् उपस्पृश
śṛṅgāṇi trīṇi puṇyāṇi trīṇi prasravaṇāni ca
sarvāṇyanuparikramya yathākāmam upaspṛśa
- 16
शंतनुश्चात्र कौन्तेय शुनकश्च नराधिप
नरनारायणौ चोभौ स्थानं प्राप्ताः सनातनम्
śaṃtanuścātra kaunteya śunakaśca narādhipa
naranārāyaṇau cobhau sthānaṃ prāptāḥ sanātanam
- 17
इह नित्यशया देवाः पितरश्च महर्षिभिः
आर्चीकपर्वते तेपुस्तान्यजस्व युधिष्ठिर
iha nityaśayā devāḥ pitaraśca maharṣibhiḥ
ārcīkaparvate tepustānyajasva yudhiṣṭhira
- 18
इह ते वै चरून्प्राश्नन्नृषयश्च विशां पते
यमुना चाक्षयस्रोताः कृष्णश्चेह तपोरतः
iha te vai carūnprāśnannṛṣayaśca viśāṃ pate
yamunā cākṣayasrotāḥ kṛṣṇaśceha taporataḥ
- 19
यमौ च भीमसेनश्च कृष्णा चामित्रकर्शन
सर्वे चात्र गमिष्यामः सुकृशाः सुतपस्विनः
yamau ca bhīmasenaśca kṛṣṇā cāmitrakarśana
sarve cātra gamiṣyāmaḥ sukṛśāḥ sutapasvinaḥ
- 20
एतत्प्रस्रवणं पुण्यम् इन्द्रस्य मनुजाधिप
यत्र धाता विधाता च वरुणश्चोर्ध्वम् आगताः
etatprasravaṇaṃ puṇyam indrasya manujādhipa
yatra dhātā vidhātā ca varuṇaścordhvam āgatāḥ
- 21
इह ते न्यवसन्राजन्क्षान्ताः परमधर्मिणः
मैत्राणाम् ऋजुबुद्धीनाम् अयं गिरिवरः शुभः
iha te nyavasanrājankṣāntāḥ paramadharmiṇaḥ
maitrāṇām ṛjubuddhīnām ayaṃ girivaraḥ śubhaḥ
- 22
एषा सा यमुना राजन्राजर्षिगणसेविता
नानायज्ञचिता राजन्पुण्या पापभयापहा
eṣā sā yamunā rājanrājarṣigaṇasevitā
nānāyajñacitā rājanpuṇyā pāpabhayāpahā
- 23
अत्र राजा महेष्वासो मान्धातायजत स्वयम्
सहदेवश्च कौन्तेय सोमको ददतां वरः
atra rājā maheṣvāso māndhātāyajata svayam
sahadevaśca kaunteya somako dadatāṃ varaḥ

