30 shlokas
- 1
धौम्य उवाच
उदीच्यां राजशार्दूल दिशि पुण्यानि यानि वै
तानि ते कीर्तयिष्यामि पुण्यान्यायतनानि च
dhaumya uvāca
udīcyāṃ rājaśārdūla diśi puṇyāni yāni vai
tāni te kīrtayiṣyāmi puṇyānyāyatanāni ca
- 2
सरस्वती पुण्यवहा ह्रदिनी वनमालिनी
समुद्रगा महावेगा यमुना यत्र पाण्डव
sarasvatī puṇyavahā hradinī vanamālinī
samudragā mahāvegā yamunā yatra pāṇḍava
- 3
तत्र पुण्यतमं तीर्थं प्लक्षावतरणं शिवम्
यत्र सारस्वतैर् इष्ट्वा गच्छन्त्यवभृथं द्विजाः
tatra puṇyatamaṃ tīrthaṃ plakṣāvataraṇaṃ śivam
yatra sārasvatair iṣṭvā gacchantyavabhṛthaṃ dvijāḥ
- 4
पुण्यं चाख्यायते दिव्यं शिवम् अग्निशिरो ऽनघ
सहदेवो ऽयजद्यत्र शम्याक्षेपेण भारत
puṇyaṃ cākhyāyate divyaṃ śivam agniśiro 'nagha
sahadevo 'yajadyatra śamyākṣepeṇa bhārata
- 5
एतस्मिन्न् एव चार्थेयम् इन्द्रगीता युधिष्ठिर
गाथा चरति लोके ऽस्मिन्गीयमाना द्विजातिभिः
etasminn eva cārtheyam indragītā yudhiṣṭhira
gāthā carati loke 'smingīyamānā dvijātibhiḥ
- 6
अग्नयः सहदेवेन ये चिता यमुनाम् अनु
शतं शतसहस्राणि सहस्रशतदक्षिणाः
agnayaḥ sahadevena ye citā yamunām anu
śataṃ śatasahasrāṇi sahasraśatadakṣiṇāḥ
- 7
तत्रैव भरतो राजा चक्रवर्ती महायशाः
विंशतिं सप्त चाष्टौ च हयमेधान् उपाहरत्
tatraiva bharato rājā cakravartī mahāyaśāḥ
viṃśatiṃ sapta cāṣṭau ca hayamedhān upāharat
- 8
कामकृद्यो द्विजातीनां श्रुतस्तात मया पुरा
अत्यन्तम् आश्रमः पुण्यः सरकस्तस्य विश्रुतः
kāmakṛdyo dvijātīnāṃ śrutastāta mayā purā
atyantam āśramaḥ puṇyaḥ sarakastasya viśrutaḥ
- 9
सरस्वती नदी सद्भिः सततं पार्थ पूजिता
वालखिल्यैर्महाराज यत्रेष्टम् ऋषिभिः पुरा
sarasvatī nadī sadbhiḥ satataṃ pārtha pūjitā
vālakhilyairmahārāja yatreṣṭam ṛṣibhiḥ purā
- 10
दृषद्वती पुण्यतमा तत्र ख्याता युधिष्ठिर
तत्र वैवर्ण्यवर्णौ च सुपुण्यौ मनुजाधिप
dṛṣadvatī puṇyatamā tatra khyātā yudhiṣṭhira
tatra vaivarṇyavarṇau ca supuṇyau manujādhipa
- 11
वेदज्ञौ वेदविदितौ विद्यावेदविदाव् उभौ
यजन्तौ क्रतुभिर्नित्यं पुण्यैर्भरतसत्तम
vedajñau vedaviditau vidyāvedavidāv ubhau
yajantau kratubhirnityaṃ puṇyairbharatasattama
- 12
समेत्य बहुशो देवाः सेन्द्राः सवरुणाः पुरा
विशाखयूपे ऽतप्यन्त तस्मात्पुण्यतमः स वै
sametya bahuśo devāḥ sendrāḥ savaruṇāḥ purā
viśākhayūpe 'tapyanta tasmātpuṇyatamaḥ sa vai
- 13
ऋषिर्महान्महाभागो जमदग्निर्महायशाः
पलाशकेषु पुण्येषु रम्येष्व् अयजताभिभूः
ṛṣirmahānmahābhāgo jamadagnirmahāyaśāḥ
palāśakeṣu puṇyeṣu ramyeṣv ayajatābhibhūḥ
- 14
यत्र सर्वाः सरिच्छ्रेष्ठाः साक्षात्तम् ऋषिसत्तमम्
स्वं स्वं तोयम् उपादाय परिवार्योपतस्थिरे
yatra sarvāḥ saricchreṣṭhāḥ sākṣāttam ṛṣisattamam
svaṃ svaṃ toyam upādāya parivāryopatasthire
- 15
अपि चात्र महाराज स्वयं विश्वावसुर्जगौ
इमं श्लोकं तदा वीर प्रेक्ष्य वीर्यं महात्मनः
api cātra mahārāja svayaṃ viśvāvasurjagau
imaṃ ślokaṃ tadā vīra prekṣya vīryaṃ mahātmanaḥ
- 16
यजमानस्य वै देवाञ्जमदग्नेर्महात्मनः
आगम्य सरितः सर्वा मधुना समतर्पयन्
yajamānasya vai devāñjamadagnermahātmanaḥ
āgamya saritaḥ sarvā madhunā samatarpayan
- 17
गन्धर्वयक्षरक्षोभिर् अप्सरोभिश्च शोभितम्
किरातकिंनरावासं शैलं शिखरिणां वरम्
gandharvayakṣarakṣobhir apsarobhiśca śobhitam
kirātakiṃnarāvāsaṃ śailaṃ śikhariṇāṃ varam
- 18
बिभेद तरसा गङ्गा गङ्गाद्वारे युधिष्ठिर
पुण्यं तत्ख्यायते राजन्ब्रह्मर्षिगणसेवितम्
bibheda tarasā gaṅgā gaṅgādvāre yudhiṣṭhira
puṇyaṃ tatkhyāyate rājanbrahmarṣigaṇasevitam
- 19
सनत्कुमारः कौरव्य पुण्यं कनखलं तथा
पर्वतश्च पुरुर्नाम यत्र जातः पुरूरवाः
sanatkumāraḥ kauravya puṇyaṃ kanakhalaṃ tathā
parvataśca pururnāma yatra jātaḥ purūravāḥ
- 20
भृगुर्यत्र तपस्तेपे महर्षिगणसेवितः
स राजन्न् आश्रमः ख्यातो भृगुतुङ्गो महागिरिः
bhṛguryatra tapastepe maharṣigaṇasevitaḥ
sa rājann āśramaḥ khyāto bhṛgutuṅgo mahāgiriḥ
- 21
यच्च भूतं भविष्यच्च भवच्च पुरुषर्षभ
नारायणः प्रभुर्विष्णुः शाश्वतः पुरुषोत्तमः
yacca bhūtaṃ bhaviṣyacca bhavacca puruṣarṣabha
nārāyaṇaḥ prabhurviṣṇuḥ śāśvataḥ puruṣottamaḥ
- 22
तस्यातियशसः पुण्यां विशालां बदरीम् अनु
आश्रमः ख्यायते पुण्यस्त्रिषु लोकेषु विश्रुतः
tasyātiyaśasaḥ puṇyāṃ viśālāṃ badarīm anu
āśramaḥ khyāyate puṇyastriṣu lokeṣu viśrutaḥ
- 23
उष्णतोयवहा गङ्गा शीततोयवहापरा
सुवर्णसिकता राजन्विशालां बदरीम् अनु
uṣṇatoyavahā gaṅgā śītatoyavahāparā
suvarṇasikatā rājanviśālāṃ badarīm anu
- 24
ऋषयो यत्र देवाश्च महाभागा महौजसः
प्राप्य नित्यं नमस्यन्ति देवं नारायणं विभुम्
ṛṣayo yatra devāśca mahābhāgā mahaujasaḥ
prāpya nityaṃ namasyanti devaṃ nārāyaṇaṃ vibhum
- 25
यत्र नारायणो देवः परमात्मा सनातनः
तत्र कृत्स्नं जगत्पार्थ तीर्थान्यायतनानि च
yatra nārāyaṇo devaḥ paramātmā sanātanaḥ
tatra kṛtsnaṃ jagatpārtha tīrthānyāyatanāni ca
- 26
तत्पुण्यं तत्परं ब्रह्म तत्तीर्थं तत्तपोवनम्
तत्र देवर्षयः सिद्धाः सर्वे चैव तपोधनाः
tatpuṇyaṃ tatparaṃ brahma tattīrthaṃ tattapovanam
tatra devarṣayaḥ siddhāḥ sarve caiva tapodhanāḥ
- 27
आदिदेवो महायोगी यत्रास्ते मधुसूदनः
पुण्यानाम् अपि तत्पुण्यं तत्र ते संशयो ऽस्तु मा
ādidevo mahāyogī yatrāste madhusūdanaḥ
puṇyānām api tatpuṇyaṃ tatra te saṃśayo 'stu mā
- 28
एतानि राजन्पुण्यानि पृथिव्यां पृथिवीपते
कीर्तितानि नरश्रेष्ठ तीर्थान्यायतनानि च
etāni rājanpuṇyāni pṛthivyāṃ pṛthivīpate
kīrtitāni naraśreṣṭha tīrthānyāyatanāni ca
- 29
एतानि वसुभिः साध्यैर् आदित्यैर्मरुदश्विभिः
ऋषिभिर्ब्रह्मकल्पैश्च सेवितानि महात्मभिः
etāni vasubhiḥ sādhyair ādityairmarudaśvibhiḥ
ṛṣibhirbrahmakalpaiśca sevitāni mahātmabhiḥ
- 30
चरन् एतानि कौन्तेय सहितो ब्राह्मणर्षभैः
भ्रातृभिश्च महाभागैर् उत्कण्ठां विजहिष्यसि
caran etāni kaunteya sahito brāhmaṇarṣabhaiḥ
bhrātṛbhiśca mahābhāgair utkaṇṭhāṃ vijahiṣyasi

