17 shlokas
- 1
अर्जुन उवाच
ततो माम् अभिविश्वस्तं संरूढशरविक्षतम्
देवराजो ऽनुगृह्येदं काले वचनम् अब्रवीत्
arjuna uvāca
tato mām abhiviśvastaṃ saṃrūḍhaśaravikṣatam
devarājo 'nugṛhyedaṃ kāle vacanam abravīt
- 2
दिव्यान्यस्त्राणि सर्वाणि त्वयि तिष्ठन्ति भारत
न त्वाभिभवितुं शक्तो मानुषो भुवि कश्चन
divyānyastrāṇi sarvāṇi tvayi tiṣṭhanti bhārata
na tvābhibhavituṃ śakto mānuṣo bhuvi kaścana
- 3
भीष्मो द्रोणः कृपः कर्णः शकुनिः सह राजभिः
संग्रामस्थस्य ते पुत्र कलां नार्हन्ति षोडशीम्
bhīṣmo droṇaḥ kṛpaḥ karṇaḥ śakuniḥ saha rājabhiḥ
saṃgrāmasthasya te putra kalāṃ nārhanti ṣoḍaśīm
- 4
इदं च मे तनुत्राणं प्रायच्छन्मघवान्प्रभुः
अभेद्यं कवचं दिव्यं स्रजं चैव हिरण्मयीम्
idaṃ ca me tanutrāṇaṃ prāyacchanmaghavānprabhuḥ
abhedyaṃ kavacaṃ divyaṃ srajaṃ caiva hiraṇmayīm
- 5
देवदत्तं च मे शङ्खं देवः प्रादान्महारवम्
दिव्यं चेदं किरीटं मे स्वयम् इन्द्रो युयोज ह
devadattaṃ ca me śaṅkhaṃ devaḥ prādānmahāravam
divyaṃ cedaṃ kirīṭaṃ me svayam indro yuyoja ha
- 6
ततो दिव्यानि वस्त्राणि दिव्यान्याभरणानि च
प्रादाच्छक्रो ममैतानि रुचिराणि बृहन्ति च
tato divyāni vastrāṇi divyānyābharaṇāni ca
prādācchakro mamaitāni rucirāṇi bṛhanti ca
- 7
एवं सम्पूजितस्तत्र सुखम् अस्म्युषितो नृप
इन्द्रस्य भवने पुण्ये गन्धर्वशिशुभिः सह
evaṃ sampūjitastatra sukham asmyuṣito nṛpa
indrasya bhavane puṇye gandharvaśiśubhiḥ saha
- 8
ततो माम् अब्रवीच्छक्रः प्रीतिमान् अमरैः सह
समयो ऽर्जुन गन्तुं ते भ्रातरो हि स्मरन्ति ते
tato mām abravīcchakraḥ prītimān amaraiḥ saha
samayo 'rjuna gantuṃ te bhrātaro hi smaranti te
- 9
एवम् इन्द्रस्य भवने पञ्च वर्षाणि भारत
उषितानि मया राजन्स्मरता द्यूतजं कलिम्
evam indrasya bhavane pañca varṣāṇi bhārata
uṣitāni mayā rājansmaratā dyūtajaṃ kalim
- 10
ततो भवन्तम् अद्राक्षं भ्रातृभिः परिवारितम्
गन्धमादनम् आसाद्य पर्वतस्यास्य मूर्धनि
tato bhavantam adrākṣaṃ bhrātṛbhiḥ parivāritam
gandhamādanam āsādya parvatasyāsya mūrdhani
- 11
युधिष्ठिर उवाच
दिष्ट्या धनंजयास्त्राणि त्वया प्राप्तानि भारत
दिष्ट्या चाराधितो राजा देवानाम् ईश्वरः प्रभुः
yudhiṣṭhira uvāca
diṣṭyā dhanaṃjayāstrāṇi tvayā prāptāni bhārata
diṣṭyā cārādhito rājā devānām īśvaraḥ prabhuḥ
- 12
दिष्ट्या च भगवान्स्थाणुर्देव्या सह परंतप
साक्षाद्दृष्टः सुयुद्धेन तोषितश्च त्वयानघ
diṣṭyā ca bhagavānsthāṇurdevyā saha paraṃtapa
sākṣāddṛṣṭaḥ suyuddhena toṣitaśca tvayānagha
- 13
दिष्ट्या च लोकपालैस्त्वं समेतो भरतर्षभ
दिष्ट्या वर्धामहे सर्वे दिष्ट्यासि पुनरागतः
diṣṭyā ca lokapālaistvaṃ sameto bharatarṣabha
diṣṭyā vardhāmahe sarve diṣṭyāsi punarāgataḥ
- 14
अद्य कृत्स्नाम् इमां देवीं विजितां पुरमालिनीम्
मन्ये च धृतराष्ट्रस्य पुत्रान् अपि वशीकृतान्
adya kṛtsnām imāṃ devīṃ vijitāṃ puramālinīm
manye ca dhṛtarāṣṭrasya putrān api vaśīkṛtān
- 15
तानि त्विच्छामि ते द्रष्टुं दिव्यान्यस्त्राणि भारत
यैस्तथा वीर्यवन्तस्ते निवातकवचा हताः
tāni tvicchāmi te draṣṭuṃ divyānyastrāṇi bhārata
yaistathā vīryavantaste nivātakavacā hatāḥ
- 16
अर्जुन उवाच
श्वः प्रभाते भवान्द्रष्टा दिव्यान्यस्त्राणि सर्वशः
निवातकवचा घोरा यैर्मया विनिपातिताः
arjuna uvāca
śvaḥ prabhāte bhavāndraṣṭā divyānyastrāṇi sarvaśaḥ
nivātakavacā ghorā yairmayā vinipātitāḥ
- 17
वैशम्पायन उवाच
एवम् आगमनं तत्र कथयित्वा धनंजयः
भ्रातृभिः सहितः सर्वै रजनीं ताम् उवास ह
vaiśampāyana uvāca
evam āgamanaṃ tatra kathayitvā dhanaṃjayaḥ
bhrātṛbhiḥ sahitaḥ sarvai rajanīṃ tām uvāsa ha

