15 shlokas
- 1
वैशम्पायन उवाच
स गत्वा नलिनीं रम्यां राक्षसैर् अभिरक्षिताम्
कैलासशिखरे रम्ये ददर्श शुभकानने
vaiśampāyana uvāca
sa gatvā nalinīṃ ramyāṃ rākṣasair abhirakṣitām
kailāsaśikhare ramye dadarśa śubhakānane
- 2
कुबेरभवनाभ्याशे जातां पर्वतनिर्झरे
सुरम्यां विपुलच्छायां नानाद्रुमलतावृताम्
kuberabhavanābhyāśe jātāṃ parvatanirjhare
suramyāṃ vipulacchāyāṃ nānādrumalatāvṛtām
- 3
हरिताम्बुजसंछन्नां दिव्यां कनकपुष्कराम्
पवित्रभूतां लोकस्य शुभाम् अद्भुतदर्शनाम्
haritāmbujasaṃchannāṃ divyāṃ kanakapuṣkarām
pavitrabhūtāṃ lokasya śubhām adbhutadarśanām
- 4
तत्रामृतरसं शीतं लघु कुन्तीसुतः शुभम्
ददर्श विमलं तोयं शिवं बहु च पाण्डवः
tatrāmṛtarasaṃ śītaṃ laghu kuntīsutaḥ śubham
dadarśa vimalaṃ toyaṃ śivaṃ bahu ca pāṇḍavaḥ
- 5
तां तु पुष्करिणीं रम्यां पद्मसौगन्धिकायुताम्
जातरूपमयैः पद्मैश्छन्नां परमगन्धिभिः
tāṃ tu puṣkariṇīṃ ramyāṃ padmasaugandhikāyutām
jātarūpamayaiḥ padmaiśchannāṃ paramagandhibhiḥ
- 6
वैडूर्यवरनालैश्च बहुचित्रैर्मनोहरैः
हंसकारण्डवोद्धूतैः सृजद्भिर् अमलं रजः
vaiḍūryavaranālaiśca bahucitrairmanoharaiḥ
haṃsakāraṇḍavoddhūtaiḥ sṛjadbhir amalaṃ rajaḥ
- 7
आक्रीडं यक्षराजस्य कुबेरस्य महात्मनः
गन्धर्वैर् अप्सरोभिश्च देवैश्च परमार्चिताम्
ākrīḍaṃ yakṣarājasya kuberasya mahātmanaḥ
gandharvair apsarobhiśca devaiśca paramārcitām
- 8
सेविताम् ऋषिभिर्दिव्यां यक्षैः किम्पुरुषैस्तथा
राक्षसैः किंनरैश्चैव गुप्तां वैश्रवणेन च
sevitām ṛṣibhirdivyāṃ yakṣaiḥ kimpuruṣaistathā
rākṣasaiḥ kiṃnaraiścaiva guptāṃ vaiśravaṇena ca
- 9
तां च दृष्ट्वैव कौन्तेयो भीमसेनो महाबलः
बभूव परमप्रीतो दिव्यं सम्प्रेक्ष्य तत्सरः
tāṃ ca dṛṣṭvaiva kaunteyo bhīmaseno mahābalaḥ
babhūva paramaprīto divyaṃ samprekṣya tatsaraḥ
- 10
तच्च क्रोधवशा नाम राक्षसा राजशासनात्
रक्षन्ति शतसाहस्राश्चित्रायुधपरिच्छदाः
tacca krodhavaśā nāma rākṣasā rājaśāsanāt
rakṣanti śatasāhasrāścitrāyudhaparicchadāḥ
- 11
ते तु दृष्ट्वैव कौन्तेयम् अजिनैः परिवारितम्
रुक्माङ्गदधरं वीरं भीमं भीमपराक्रमम्
te tu dṛṣṭvaiva kaunteyam ajinaiḥ parivāritam
rukmāṅgadadharaṃ vīraṃ bhīmaṃ bhīmaparākramam
- 12
सायुधं बद्धनिस्त्रिंशम् अशङ्कितम् अरिंदमम्
पुष्करेप्सुम् उपायान्तम् अन्योन्यम् अभिचुक्रुशुः
sāyudhaṃ baddhanistriṃśam aśaṅkitam ariṃdamam
puṣkarepsum upāyāntam anyonyam abhicukruśuḥ
- 13
अयं पुरुषशार्दूलः सायुधो ऽजिनसंवृतः
यच्चिकीर्षुर् इह प्राप्तस्तत्संप्रष्टुम् इहार्हथ
ayaṃ puruṣaśārdūlaḥ sāyudho 'jinasaṃvṛtaḥ
yaccikīrṣur iha prāptastatsaṃpraṣṭum ihārhatha
- 14
ततः सर्वे महाबाहुं समासाद्य वृकोदरम्
तेजोयुक्तम् अपृच्छन्त कस्त्वम् आख्यातुम् अर्हसि
tataḥ sarve mahābāhuṃ samāsādya vṛkodaram
tejoyuktam apṛcchanta kastvam ākhyātum arhasi
- 15
मुनिवेषधरश्चासि चीरवासाश्च लक्ष्यसे
यदर्थम् असि सम्प्राप्तस्तद् आचक्ष्व महाद्युते
muniveṣadharaścāsi cīravāsāśca lakṣyase
yadartham asi samprāptastad ācakṣva mahādyute

