9 shlokas
- 1
वैशम्पायन उवाच
अथाब्रवीद्द्रौपदी राजपुत्री पृष्टा शिबीनां प्रवरेण तेन
अवेक्ष्य मन्दं प्रविमुच्य शाखां संगृह्णती कौशिकम् उत्तरीयम्
vaiśampāyana uvāca
athābravīddraupadī rājaputrī pṛṣṭā śibīnāṃ pravareṇa tena
avekṣya mandaṃ pravimucya śākhāṃ saṃgṛhṇatī kauśikam uttarīyam
- 2
बुद्ध्याभिजानामि नरेन्द्रपुत्र न मादृशी त्वाम् अभिभाष्टुम् अर्हा
न त्वेह वक्तास्ति तवेह वाक्यम् अन्यो नरो वाप्यथ वापि नारी
buddhyābhijānāmi narendraputra na mādṛśī tvām abhibhāṣṭum arhā
na tveha vaktāsti taveha vākyam anyo naro vāpyatha vāpi nārī
- 3
एका ह्यहं सम्प्रति तेन वाचं ददानि वै भद्र निबोध चेदम्
अहं ह्यरण्ये कथम् एकम् एका त्वाम् आलपेयं निरता स्वधर्मे
ekā hyahaṃ samprati tena vācaṃ dadāni vai bhadra nibodha cedam
ahaṃ hyaraṇye katham ekam ekā tvām ālapeyaṃ niratā svadharme
- 4
जानामि च त्वां सुरथस्य पुत्रं यं कोटिकाश्येति विदुर्मनुष्याः
तस्माद् अहं शैब्य तथैव तुभ्यम् आख्यामि बन्धून्प्रति तन्निबोध
jānāmi ca tvāṃ surathasya putraṃ yaṃ koṭikāśyeti vidurmanuṣyāḥ
tasmād ahaṃ śaibya tathaiva tubhyam ākhyāmi bandhūnprati tannibodha
- 5
अपत्यम् अस्मि द्रुपदस्य राज्ञः कृष्णेति मां शैब्य विदुर्मनुष्याः
साहं वृणे पञ्च जनान्पतित्वे ये खाण्डवप्रस्थगताः श्रुतास्ते
apatyam asmi drupadasya rājñaḥ kṛṣṇeti māṃ śaibya vidurmanuṣyāḥ
sāhaṃ vṛṇe pañca janānpatitve ye khāṇḍavaprasthagatāḥ śrutāste
- 6
युधिष्ठिरो भीमसेनार्जुनौ च माद्र्याश्च पुत्रौ पुरुषप्रवीरौ
ते मां निवेश्येह दिशश्चतस्रो विभज्य पार्था मृगयां प्रयाताः
yudhiṣṭhiro bhīmasenārjunau ca mādryāśca putrau puruṣapravīrau
te māṃ niveśyeha diśaścatasro vibhajya pārthā mṛgayāṃ prayātāḥ
- 7
प्राचीं राजा दक्षिणां भीमसेनो जयः प्रतीचीं यमजावुदीचीम्
मन्ये तु तेषां रथसत्तमानां कालो ऽभितः प्राप्त इहोपयातुम्
prācīṃ rājā dakṣiṇāṃ bhīmaseno jayaḥ pratīcīṃ yamajāvudīcīm
manye tu teṣāṃ rathasattamānāṃ kālo 'bhitaḥ prāpta ihopayātum
- 8
संमानिता यास्यथ तैर्यथेष्टं विमुच्य वाहान् अवगाहयध्वम्
प्रियातिथिर्धर्मसुतो महात्मा प्रीतो भविष्यत्यभिवीक्ष्य युष्मान्
saṃmānitā yāsyatha tairyatheṣṭaṃ vimucya vāhān avagāhayadhvam
priyātithirdharmasuto mahātmā prīto bhaviṣyatyabhivīkṣya yuṣmān
- 9
एतावद् उक्त्वा द्रुपदात्मजा सा शैब्यात्मजं चन्द्रमुखी प्रतीता
विवेश तां पर्णकुटीं प्रशस्तां संचिन्त्य तेषाम् अतिथिस्वधर्मम्
etāvad uktvā drupadātmajā sā śaibyātmajaṃ candramukhī pratītā
viveśa tāṃ parṇakuṭīṃ praśastāṃ saṃcintya teṣām atithisvadharmam

