15 shlokas
- 1
मार्कण्डेय उवाच
ततो ब्रह्मर्षयः सिद्धा देवराजर्षयस्तथा
हव्यवाहं पुरस्कृत्य ब्रह्माणं शरणं गताः
mārkaṇḍeya uvāca
tato brahmarṣayaḥ siddhā devarājarṣayastathā
havyavāhaṃ puraskṛtya brahmāṇaṃ śaraṇaṃ gatāḥ
- 2
अग्निर् उवाच
यः स विश्रवसः पुत्रो दशग्रीवो महाबलः
अवध्यो वरदानेन कृतो भगवता पुरा
agnir uvāca
yaḥ sa viśravasaḥ putro daśagrīvo mahābalaḥ
avadhyo varadānena kṛto bhagavatā purā
- 3
स बाधते प्रजाः सर्वा विप्रकारैर्महाबलः
ततो नस्त्रातु भगवन्नान्यस्त्राता हि विद्यते
sa bādhate prajāḥ sarvā viprakārairmahābalaḥ
tato nastrātu bhagavannānyastrātā hi vidyate
- 4
ब्रह्मोवाच
न स देवासुरैः शक्यो युद्धे जेतुं विभावसो
विहितं तत्र यत्कार्यम् अभितस्तस्य निग्रहे
brahmovāca
na sa devāsuraiḥ śakyo yuddhe jetuṃ vibhāvaso
vihitaṃ tatra yatkāryam abhitastasya nigrahe
- 5
तदर्थम् अवतीर्णो ऽसौ मन्नियोगाच्चतुर्भुजः
विष्णुः प्रहरतां श्रेष्ठः स कर्मैतत्करिष्यति
tadartham avatīrṇo 'sau manniyogāccaturbhujaḥ
viṣṇuḥ praharatāṃ śreṣṭhaḥ sa karmaitatkariṣyati
- 6
मार्कण्डेय उवाच
पितामहस्ततस्तेषां संनिधौ वाक्यम् अब्रवीत्
सर्वैर्देवगणैः सार्धं संभवध्वं महीतले
mārkaṇḍeya uvāca
pitāmahastatasteṣāṃ saṃnidhau vākyam abravīt
sarvairdevagaṇaiḥ sārdhaṃ saṃbhavadhvaṃ mahītale
- 7
विष्णोः सहायान् ऋक्षीषु वानरीषु च सर्वशः
जनयध्वं सुतान्वीरान्कामरूपबलान्वितान्
viṣṇoḥ sahāyān ṛkṣīṣu vānarīṣu ca sarvaśaḥ
janayadhvaṃ sutānvīrānkāmarūpabalānvitān
- 8
ततो भागानुभागेन देवगन्धर्वदानवाः
अवतर्तुं महीं सर्वे रञ्जयामासुर् अञ्जसा
tato bhāgānubhāgena devagandharvadānavāḥ
avatartuṃ mahīṃ sarve rañjayāmāsur añjasā
- 9
तेषां समक्षं गन्धर्वीं दुन्दुभीं नाम नामतः
शशास वरदो देवो देवकार्यार्थसिद्धये
teṣāṃ samakṣaṃ gandharvīṃ dundubhīṃ nāma nāmataḥ
śaśāsa varado devo devakāryārthasiddhaye
- 10
पितामहवचः श्रुत्वा गन्धर्वी दुन्दुभी ततः
मन्थरा मानुषे लोके कुब्जा समभवत्तदा
pitāmahavacaḥ śrutvā gandharvī dundubhī tataḥ
mantharā mānuṣe loke kubjā samabhavattadā
- 11
शक्रप्रभृतयश्चैव सर्वे ते सुरसत्तमाः
वानरर्क्षवरस्त्रीषु जनयामासुर् आत्मजान्
ते ऽन्ववर्तन्पितॄन्सर्वे यशसा च बलेन च
śakraprabhṛtayaścaiva sarve te surasattamāḥ
vānararkṣavarastrīṣu janayāmāsur ātmajān
te 'nvavartanpitṝnsarve yaśasā ca balena ca
- 12
भेत्तारो गिरिशृङ्गाणां शालतालशिलायुधाः
वज्रसंहननाः सर्वे सर्वे चौघबलास्तथा
bhettāro giriśṛṅgāṇāṃ śālatālaśilāyudhāḥ
vajrasaṃhananāḥ sarve sarve caughabalāstathā
- 13
कामवीर्यधराश्चैव सर्वे युद्धविशारदाः
नागायुतसमप्राणा वायुवेगसमा जवे
यत्रेच्छकनिवासाश्च केचिद् अत्र वनौकसः
kāmavīryadharāścaiva sarve yuddhaviśāradāḥ
nāgāyutasamaprāṇā vāyuvegasamā jave
yatrecchakanivāsāśca kecid atra vanaukasaḥ
- 14
एवं विधाय तत्सर्वं भगवांल्लोकभावनः
मन्थरां बोधयामास यद्यत्कार्यं यथा यथा
evaṃ vidhāya tatsarvaṃ bhagavāṃllokabhāvanaḥ
mantharāṃ bodhayāmāsa yadyatkāryaṃ yathā yathā
- 15
सा तद्वचनम् आज्ञाय तथा चक्रे मनोजवा
इतश्चेतश्च गच्छन्ती वैरसंधुक्षणे रता
sā tadvacanam ājñāya tathā cakre manojavā
itaścetaśca gacchantī vairasaṃdhukṣaṇe ratā

