143 shlokas
- 1
पुलस्त्य उवाच
ततो गच्छेत धर्मज्ञ धर्मतीर्थं पुरातनम्
तत्र स्नात्वा नरो राजन्धर्मशीलः समाहितः
आसप्तमं कुलं राजन्पुनीते नात्र संशयः
pulastya uvāca
tato gaccheta dharmajña dharmatīrthaṃ purātanam
tatra snātvā naro rājandharmaśīlaḥ samāhitaḥ
āsaptamaṃ kulaṃ rājanpunīte nātra saṃśayaḥ
- 2
ततो गच्छेत धर्मज्ञ कारापतनम् उत्तमम्
अग्निष्टोमम् अवाप्नोति मुनिलोकं च गच्छति
tato gaccheta dharmajña kārāpatanam uttamam
agniṣṭomam avāpnoti munilokaṃ ca gacchati
- 3
सौगन्धिकं वनं राजंस्ततो गच्छेत मानवः
यत्र ब्रह्मादयो देवा ऋषयश्च तपोधनाः
saugandhikaṃ vanaṃ rājaṃstato gaccheta mānavaḥ
yatra brahmādayo devā ṛṣayaśca tapodhanāḥ
- 4
सिद्धचारणगन्धर्वाः किंनराः समहोरगाः
तद्वनं प्रविशन्न् एव सर्वपापैः प्रमुच्यते
siddhacāraṇagandharvāḥ kiṃnarāḥ samahoragāḥ
tadvanaṃ praviśann eva sarvapāpaiḥ pramucyate
- 5
ततो हि सा सरिच्छ्रेष्ठा नदीनाम् उत्तमा नदी
प्लक्षाद्देवी स्रुता राजन्महापुण्या सरस्वती
tato hi sā saricchreṣṭhā nadīnām uttamā nadī
plakṣāddevī srutā rājanmahāpuṇyā sarasvatī
- 6
तत्राभिषेकं कुर्वीत वल्मीकान्निःसृते जले
अर्चयित्वा पितॄन्देवान् अश्वमेधफलं लभेत्
tatrābhiṣekaṃ kurvīta valmīkānniḥsṛte jale
arcayitvā pitṝndevān aśvamedhaphalaṃ labhet
- 7
ईशानाध्युषितं नाम तत्र तीर्थं सुदुर्लभम्
षट्सु शम्यानिपातेषु वल्मीकाद् इति निश्चयः
īśānādhyuṣitaṃ nāma tatra tīrthaṃ sudurlabham
ṣaṭsu śamyānipāteṣu valmīkād iti niścayaḥ
- 8
कपिलानां सहस्रं च वाजिमेधं च विन्दति
तत्र स्नात्वा नरव्याघ्र दृष्टम् एतत्पुरातने
kapilānāṃ sahasraṃ ca vājimedhaṃ ca vindati
tatra snātvā naravyāghra dṛṣṭam etatpurātane
- 9
सुगन्धां शतकुम्भां च पञ्चयज्ञां च भारत
अभिगम्य नरश्रेष्ठ स्वर्गलोके महीयते
sugandhāṃ śatakumbhāṃ ca pañcayajñāṃ ca bhārata
abhigamya naraśreṣṭha svargaloke mahīyate
- 10
त्रिशूलखातं तत्रैव तीर्थम् आसाद्य भारत
तत्राभिषेकं कुर्वीत पितृदेवार्चने रतः
गाणपत्यं स लभते देहं त्यक्त्वा न संशयः
triśūlakhātaṃ tatraiva tīrtham āsādya bhārata
tatrābhiṣekaṃ kurvīta pitṛdevārcane rataḥ
gāṇapatyaṃ sa labhate dehaṃ tyaktvā na saṃśayaḥ
- 11
ततो गच्छेत राजेन्द्र देव्याः स्थानं सुदुर्लभम्
शाकम्भरीति विख्याता त्रिषु लोकेषु विश्रुता
tato gaccheta rājendra devyāḥ sthānaṃ sudurlabham
śākambharīti vikhyātā triṣu lokeṣu viśrutā
- 12
दिव्यं वर्षसहस्रं हि शाकेन किल सुव्रत
आहारं सा कृतवती मासि मासि नराधिप
divyaṃ varṣasahasraṃ hi śākena kila suvrata
āhāraṃ sā kṛtavatī māsi māsi narādhipa
- 13
ऋषयो ऽभ्यागतास्तत्र देव्या भक्त्या तपोधनाः
आतिथ्यं च कृतं तेषां शाकेन किल भारत
ततः शाकम्भरीत्येव नाम तस्याः प्रतिष्ठितम्
ṛṣayo 'bhyāgatāstatra devyā bhaktyā tapodhanāḥ
ātithyaṃ ca kṛtaṃ teṣāṃ śākena kila bhārata
tataḥ śākambharītyeva nāma tasyāḥ pratiṣṭhitam
- 14
शाकम्भरीं समासाद्य ब्रह्मचारी समाहितः
त्रिरात्रम् उषितः शाकं भक्षयेन्नियतः शुचिः
śākambharīṃ samāsādya brahmacārī samāhitaḥ
trirātram uṣitaḥ śākaṃ bhakṣayenniyataḥ śuciḥ
- 15
शाकाहारस्य यत्सम्यग्वर्षैर्द्वादशभिः फलम्
तत्फलं तस्य भवति देव्याश्छन्देन भारत
śākāhārasya yatsamyagvarṣairdvādaśabhiḥ phalam
tatphalaṃ tasya bhavati devyāśchandena bhārata
- 16
ततो गच्छेत्सुवर्णाक्षं त्रिषु लोकेषु विश्रुतम्
यत्र विष्णुः प्रसादार्थं रुद्रम् आराधयत्पुरा
tato gacchetsuvarṇākṣaṃ triṣu lokeṣu viśrutam
yatra viṣṇuḥ prasādārthaṃ rudram ārādhayatpurā
- 17
वरांश्च सुबहूंल्लेभे दैवतेषु सुदुर्लभान्
उक्तश्च त्रिपुरघ्नेन परितुष्टेन भारत
varāṃśca subahūṃllebhe daivateṣu sudurlabhān
uktaśca tripuraghnena parituṣṭena bhārata
- 18
अपि चास्मत्प्रियतरो लोके कृष्ण भविष्यसि
त्वन्मुखं च जगत्कृत्स्नं भविष्यति न संशयः
api cāsmatpriyataro loke kṛṣṇa bhaviṣyasi
tvanmukhaṃ ca jagatkṛtsnaṃ bhaviṣyati na saṃśayaḥ
- 19
तत्राभिगम्य राजेन्द्र पूजयित्वा वृषध्वजम्
अश्वमेधम् अवाप्नोति गाणपत्यं च विन्दति
tatrābhigamya rājendra pūjayitvā vṛṣadhvajam
aśvamedham avāpnoti gāṇapatyaṃ ca vindati
- 20
धूमावतीं ततो गच्छेत्त्रिरात्रोपोषितो नरः
मनसा प्रार्थितान्कामांल्लभते नात्र संशयः
dhūmāvatīṃ tato gacchettrirātropoṣito naraḥ
manasā prārthitānkāmāṃllabhate nātra saṃśayaḥ
- 21
देव्यास्तु दक्षिणार्धेन रथावर्तो नराधिप
तत्रारोहेत धर्मज्ञ श्रद्दधानो जितेन्द्रियः
महादेवप्रसादाद्धि गच्छेत परमां गतिम्
devyāstu dakṣiṇārdhena rathāvarto narādhipa
tatrāroheta dharmajña śraddadhāno jitendriyaḥ
mahādevaprasādāddhi gaccheta paramāṃ gatim
- 22
प्रदक्षिणम् उपावृत्य गच्छेत भरतर्षभ
धारां नाम महाप्राज्ञ सर्वपापप्रणाशिनीम्
तत्र स्नात्वा नरव्याघ्र न शोचति नराधिप
pradakṣiṇam upāvṛtya gaccheta bharatarṣabha
dhārāṃ nāma mahāprājña sarvapāpapraṇāśinīm
tatra snātvā naravyāghra na śocati narādhipa
- 23
ततो गच्छेत धर्मज्ञ नमस्कृत्य महागिरिम्
स्वर्गद्वारेण यत्तुल्यं गङ्गाद्वारं न संशयः
tato gaccheta dharmajña namaskṛtya mahāgirim
svargadvāreṇa yattulyaṃ gaṅgādvāraṃ na saṃśayaḥ
- 24
तत्राभिषेकं कुर्वीत कोटितीर्थे समाहितः
पुण्डरीकम् अवाप्नोति कुलं चैव समुद्धरेत्
tatrābhiṣekaṃ kurvīta koṭitīrthe samāhitaḥ
puṇḍarīkam avāpnoti kulaṃ caiva samuddharet
- 25
सप्तगङ्गे त्रिगङ्गे च शक्रावर्ते च तर्पयन्
देवान्पितॄंश्च विधिवत्पुण्यलोके महीयते
saptagaṅge trigaṅge ca śakrāvarte ca tarpayan
devānpitṝṃśca vidhivatpuṇyaloke mahīyate
- 26
ततः कनखले स्नात्वा त्रिरात्रोपोषितो नरः
अश्वमेधम् अवाप्नोति स्वर्गलोकं च गच्छति
tataḥ kanakhale snātvā trirātropoṣito naraḥ
aśvamedham avāpnoti svargalokaṃ ca gacchati
- 27
कपिलावटं च गच्छेत तीर्थसेवी नराधिप
उष्यैकां रजनीं तत्र गोसहस्रफलं लभेत्
kapilāvaṭaṃ ca gaccheta tīrthasevī narādhipa
uṣyaikāṃ rajanīṃ tatra gosahasraphalaṃ labhet
- 28
नागराजस्य राजेन्द्र कपिलस्य महात्मनः
तीर्थं कुरुवरश्रेष्ठ सर्वलोकेषु विश्रुतम्
nāgarājasya rājendra kapilasya mahātmanaḥ
tīrthaṃ kuruvaraśreṣṭha sarvalokeṣu viśrutam
- 29
तत्राभिषेकं कुर्वीत नागतीर्थे नराधिप
कपिलानां सहस्रस्य फलं प्राप्नोति मानवः
tatrābhiṣekaṃ kurvīta nāgatīrthe narādhipa
kapilānāṃ sahasrasya phalaṃ prāpnoti mānavaḥ
- 30
ततो ललितिकां गच्छेच्छंतनोस्तीर्थम् उत्तमम्
तत्र स्नात्वा नरो राजन्न दुर्गतिम् अवाप्नुयात्
tato lalitikāṃ gacchecchaṃtanostīrtham uttamam
tatra snātvā naro rājanna durgatim avāpnuyāt

