19 shlokas
- 1
कुन्त्युवाच
ब्राह्मणं यन्त्रिता राजन् उपस्थास्यामि पूजया
यथाप्रतिज्ञं राजेन्द्र न च मिथ्या ब्रवीम्यहम्
kuntyuvāca
brāhmaṇaṃ yantritā rājan upasthāsyāmi pūjayā
yathāpratijñaṃ rājendra na ca mithyā bravīmyaham
- 2
एष चैव स्वभावो मे पूजयेयं द्विजान् इति
तव चैव प्रियं कार्यं श्रेयश्चैतत्परं मम
eṣa caiva svabhāvo me pūjayeyaṃ dvijān iti
tava caiva priyaṃ kāryaṃ śreyaścaitatparaṃ mama
- 3
यद्येवैष्यति सायाह्ने यदि प्रातर् अथो निशि
यद्यर्धरात्रे भगवान्न मे कोपं करिष्यति
yadyevaiṣyati sāyāhne yadi prātar atho niśi
yadyardharātre bhagavānna me kopaṃ kariṣyati
- 4
लाभो ममैष राजेन्द्र यद्वै पूजयती द्विजान्
आदेशे तव तिष्ठन्ती हितं कुर्यां नरोत्तम
lābho mamaiṣa rājendra yadvai pūjayatī dvijān
ādeśe tava tiṣṭhantī hitaṃ kuryāṃ narottama
- 5
विस्रब्धो भव राजेन्द्र न व्यलीकं द्विजोत्तमः
वसन्प्राप्स्यति ते गेहे सत्यम् एतद्ब्रवीमि ते
visrabdho bhava rājendra na vyalīkaṃ dvijottamaḥ
vasanprāpsyati te gehe satyam etadbravīmi te
- 6
यत्प्रियं च द्विजस्यास्य हितं चैव तवानघ
यतिष्यामि तथा राजन्व्येतु ते मानसो ज्वरः
yatpriyaṃ ca dvijasyāsya hitaṃ caiva tavānagha
yatiṣyāmi tathā rājanvyetu te mānaso jvaraḥ
- 7
ब्राह्मणा हि महाभागाः पूजिताः पृथिवीपते
तारणाय समर्थाः स्युर्विपरीते वधाय च
brāhmaṇā hi mahābhāgāḥ pūjitāḥ pṛthivīpate
tāraṇāya samarthāḥ syurviparīte vadhāya ca
- 8
साहम् एतद्विजानन्ती तोषयिष्ये द्विजोत्तमम्
न मत्कृते व्यथां राजन्प्राप्स्यसि द्विजसत्तमात्
sāham etadvijānantī toṣayiṣye dvijottamam
na matkṛte vyathāṃ rājanprāpsyasi dvijasattamāt
- 9
अपराधे हि राजेन्द्र राज्ञाम् अश्रेयसे द्विजाः
भवन्ति च्यवनो यद्वत्सुकन्यायाः कृते पुरा
aparādhe hi rājendra rājñām aśreyase dvijāḥ
bhavanti cyavano yadvatsukanyāyāḥ kṛte purā
- 10
नियमेन परेणाहम् उपस्थास्ये द्विजोत्तमम्
यथा त्वया नरेन्द्रेदं भाषितं ब्राह्मणं प्रति
niyamena pareṇāham upasthāsye dvijottamam
yathā tvayā narendredaṃ bhāṣitaṃ brāhmaṇaṃ prati
- 11
राजोवाच
एवम् एतत्त्वया भद्रे कर्तव्यम् अविशङ्कया
मद्धितार्थं कुलार्थं च तथात्मार्थं च नन्दिनि
rājovāca
evam etattvayā bhadre kartavyam aviśaṅkayā
maddhitārthaṃ kulārthaṃ ca tathātmārthaṃ ca nandini
- 12
वैशम्पायन उवाच
एवम् उक्त्वा तु तां कन्यां कुन्तिभोजो महायशाः
पृथां परिददौ तस्मै द्विजाय सुतवत्सलः
vaiśampāyana uvāca
evam uktvā tu tāṃ kanyāṃ kuntibhojo mahāyaśāḥ
pṛthāṃ paridadau tasmai dvijāya sutavatsalaḥ
- 13
इयं ब्रह्मन्मम सुता बाला सुखविवर्धिता
अपराध्येत यत्किंचिन्न तत्कार्यं हृदि त्वया
iyaṃ brahmanmama sutā bālā sukhavivardhitā
aparādhyeta yatkiṃcinna tatkāryaṃ hṛdi tvayā
- 14
द्विजातयो महाभागा वृद्धबालतपस्विषु
भवन्त्य् अक्रोधनाः प्रायो विरुद्धेष्वपि नित्यदा
dvijātayo mahābhāgā vṛddhabālatapasviṣu
bhavanty akrodhanāḥ prāyo viruddheṣvapi nityadā
- 15
सुमहत्यपराधे ऽपि क्षान्तिः कार्या द्विजातिभिः
यथाशक्ति यथोत्साहं पूजा ग्राह्या द्विजोत्तम
sumahatyaparādhe 'pi kṣāntiḥ kāryā dvijātibhiḥ
yathāśakti yathotsāhaṃ pūjā grāhyā dvijottama
- 16
तथेति ब्राह्मणेनोक्ते स राजा प्रीतमानसः
हंसचन्द्रांशुसंकाशं गृहम् अस्य न्यवेदयत्
tatheti brāhmaṇenokte sa rājā prītamānasaḥ
haṃsacandrāṃśusaṃkāśaṃ gṛham asya nyavedayat
- 17
तत्राग्निशरणे क्ᄆप्तम् आसनं तस्य भानुमत्
आहारादि च सर्वं तत्तथैव प्रत्यवेदयत्
tatrāgniśaraṇe kᄆptam āsanaṃ tasya bhānumat
āhārādi ca sarvaṃ tattathaiva pratyavedayat
- 18
निक्षिप्य राजपुत्री तु तन्द्रीं मानं तथैव च
आतस्थे परमं यत्नं ब्राह्मणस्याभिराधने
nikṣipya rājaputrī tu tandrīṃ mānaṃ tathaiva ca
ātasthe paramaṃ yatnaṃ brāhmaṇasyābhirādhane
- 19
तत्र सा ब्राह्मणं गत्वा पृथा शौचपरा सती
विधिवत्परिचारार्हं देववत्पर्यतोषयत्
tatra sā brāhmaṇaṃ gatvā pṛthā śaucaparā satī
vidhivatparicārārhaṃ devavatparyatoṣayat

