16 shlokas
- 1
वैशम्पायन उवाच
एतस्मिन्न् एव काले तु सर्ववादित्रनिस्वनः
बभूव तुमुलः शब्दस्त्वन्तरिक्षे दिवौकसाम्
vaiśampāyana uvāca
etasminn eva kāle tu sarvavāditranisvanaḥ
babhūva tumulaḥ śabdastvantarikṣe divaukasām
- 2
रथनेमिस्वनश्चैव घण्टाशब्दश्च भारत
पृथग्व्यालमृगाणां च पक्षिणां चैव सर्वशः
rathanemisvanaścaiva ghaṇṭāśabdaśca bhārata
pṛthagvyālamṛgāṇāṃ ca pakṣiṇāṃ caiva sarvaśaḥ
- 3
तं समन्ताद् अनुययुर्गन्धर्वाप्सरसस्तथा
विमानैः सूर्यसंकाशैर्देवराजम् अरिंदमम्
taṃ samantād anuyayurgandharvāpsarasastathā
vimānaiḥ sūryasaṃkāśairdevarājam ariṃdamam
- 4
ततः स हरिभिर्युक्तं जाम्बूनदपरिष्कृतम्
मेघनादिनम् आरुह्य श्रिया परमया ज्वलन्
tataḥ sa haribhiryuktaṃ jāmbūnadapariṣkṛtam
meghanādinam āruhya śriyā paramayā jvalan
- 5
पार्थान् अभ्याजगामाशु देवराजः पुरंदरः
आगत्य च सहस्राक्षो रथाद् अवरुरोह वै
pārthān abhyājagāmāśu devarājaḥ puraṃdaraḥ
āgatya ca sahasrākṣo rathād avaruroha vai
- 6
तं दृष्ट्वैव महात्मानं धर्मराजो युधिष्ठिरः
भ्रातृभिः सहितः श्रीमान्देवराजम् उपागमत्
taṃ dṛṣṭvaiva mahātmānaṃ dharmarājo yudhiṣṭhiraḥ
bhrātṛbhiḥ sahitaḥ śrīmāndevarājam upāgamat
- 7
पूजयामास चैवाथ विधिवद्भूरिदक्षिणः
यथार्हम् अमितात्मानं विधिदृष्टेन कर्मणा
pūjayāmāsa caivātha vidhivadbhūridakṣiṇaḥ
yathārham amitātmānaṃ vidhidṛṣṭena karmaṇā
- 8
धनंजयश्च तेजस्वी प्रणिपत्य पुरंदरम्
भृत्यवत्प्रणतस्तस्थौ देवराजसमीपतः
dhanaṃjayaśca tejasvī praṇipatya puraṃdaram
bhṛtyavatpraṇatastasthau devarājasamīpataḥ
- 9
आप्यायत महातेजाः कुन्तीपुत्रो युधिष्ठिरः
धनंजयम् अभिप्रेक्ष्य विनीतं स्थितम् अन्तिके
āpyāyata mahātejāḥ kuntīputro yudhiṣṭhiraḥ
dhanaṃjayam abhiprekṣya vinītaṃ sthitam antike
- 10
जटिलं देवराजस्य तपोयुक्तम् अकल्मषम्
हर्षेण महताविष्टः फल्गुनस्याथ दर्शनात्
jaṭilaṃ devarājasya tapoyuktam akalmaṣam
harṣeṇa mahatāviṣṭaḥ phalgunasyātha darśanāt
- 11
तं तथादीनमनसं राजानं हर्षसंप्लुतम्
उवाच वचनं धीमान्देवराजः पुरंदरः
taṃ tathādīnamanasaṃ rājānaṃ harṣasaṃplutam
uvāca vacanaṃ dhīmāndevarājaḥ puraṃdaraḥ
- 12
त्वम् इमां पृथिवीं राजन्प्रशासिष्यसि पाण्डव
स्वस्ति प्राप्नुहि कौन्तेय काम्यकं पुनर् आश्रमम्
tvam imāṃ pṛthivīṃ rājanpraśāsiṣyasi pāṇḍava
svasti prāpnuhi kaunteya kāmyakaṃ punar āśramam
- 13
अस्त्राणि लब्धानि च पाण्डवेन सर्वाणि मत्तः प्रयतेन राजन्
कृतप्रियश्चास्मि धनंजयेन जेतुं न शक्यस्त्रिभिर् एष लोकैः
astrāṇi labdhāni ca pāṇḍavena sarvāṇi mattaḥ prayatena rājan
kṛtapriyaścāsmi dhanaṃjayena jetuṃ na śakyastribhir eṣa lokaiḥ
- 14
एवम् उक्त्वा सहस्राक्षः कुन्तीपुत्रं युधिष्ठिरम्
जगाम त्रिदिवं हृष्टः स्तूयमानो महर्षिभिः
evam uktvā sahasrākṣaḥ kuntīputraṃ yudhiṣṭhiram
jagāma tridivaṃ hṛṣṭaḥ stūyamāno maharṣibhiḥ
- 15
धनेश्वरगृहस्थानां पाण्डवानां समागमम्
शक्रेण य इमं विद्वान् अधीयीत समाहितः
dhaneśvaragṛhasthānāṃ pāṇḍavānāṃ samāgamam
śakreṇa ya imaṃ vidvān adhīyīta samāhitaḥ
- 16
संवत्सरं ब्रह्मचारी नियतः संशितव्रतः
स जीवेत निराबाधः सुसुखी शरदां शतम्
saṃvatsaraṃ brahmacārī niyataḥ saṃśitavrataḥ
sa jīveta nirābādhaḥ susukhī śaradāṃ śatam

