28 shlokas
- 1
वैशम्पायन उवाच
ततो दिव्यास्त्रसम्पन्ना गन्धर्वा हेममालिनः
विसृजन्तः शरान्दीप्तान्समन्तात्पर्यवारयन्
vaiśampāyana uvāca
tato divyāstrasampannā gandharvā hemamālinaḥ
visṛjantaḥ śarāndīptānsamantātparyavārayan
- 2
चत्वारः पाण्डवा वीरा गन्धर्वाश्च सहस्रशः
रणे संन्यपतन्राजंस्तद् अद्भुतम् इवाभवत्
catvāraḥ pāṇḍavā vīrā gandharvāśca sahasraśaḥ
raṇe saṃnyapatanrājaṃstad adbhutam ivābhavat
- 3
यथा कर्णस्य च रथो धार्तराष्ट्रस्य चोभयोः
गन्धर्वैः शतशश्छिन्नौ तथा तेषां प्रचक्रिरे
yathā karṇasya ca ratho dhārtarāṣṭrasya cobhayoḥ
gandharvaiḥ śataśaśchinnau tathā teṣāṃ pracakrire
- 4
तान्समापततो राजन्गन्धर्वाञ्शतशो रणे
प्रत्यगृह्णन्नरव्याघ्राः शरवर्षैर् अनेकशः
tānsamāpatato rājangandharvāñśataśo raṇe
pratyagṛhṇannaravyāghrāḥ śaravarṣair anekaśaḥ
- 5
अवकीर्यमाणाः खगमाः शरवर्षैः समन्ततः
न शेकुः पाण्डुपुत्राणां समीपे परिवर्तितुम्
avakīryamāṇāḥ khagamāḥ śaravarṣaiḥ samantataḥ
na śekuḥ pāṇḍuputrāṇāṃ samīpe parivartitum
- 6
अभिक्रुद्धान् अभिप्रेक्ष्य गन्धर्वान् अर्जुनस्तदा
लक्षयित्वाथ दिव्यानि महास्त्राण्युपचक्रमे
abhikruddhān abhiprekṣya gandharvān arjunastadā
lakṣayitvātha divyāni mahāstrāṇyupacakrame
- 7
सहस्राणां सहस्रं स प्राहिणोद्यमसादनम्
आग्नेयेनार्जुनः संख्ये गन्धर्वाणां बलोत्कटः
sahasrāṇāṃ sahasraṃ sa prāhiṇodyamasādanam
āgneyenārjunaḥ saṃkhye gandharvāṇāṃ balotkaṭaḥ
- 8
तथा भीमो महेष्वासः संयुगे बलिनां वरः
गन्धर्वाञ्शतशो राजञ्जघान निशितैः शरैः
tathā bhīmo maheṣvāsaḥ saṃyuge balināṃ varaḥ
gandharvāñśataśo rājañjaghāna niśitaiḥ śaraiḥ
- 9
माद्रीपुत्रावपि तथा युध्यमानौ बलोत्कटौ
परिगृह्याग्रतो राजञ्जघ्नतुः शतशः परान्
mādrīputrāvapi tathā yudhyamānau balotkaṭau
parigṛhyāgrato rājañjaghnatuḥ śataśaḥ parān
- 10
ते वध्यमाना गन्धर्वा दिव्यैर् अस्त्रैर्महात्मभिः
उत्पेतुः खम् उपादाय धृतराष्ट्रसुतांस्ततः
te vadhyamānā gandharvā divyair astrairmahātmabhiḥ
utpetuḥ kham upādāya dhṛtarāṣṭrasutāṃstataḥ
- 11
तान् उत्पतिष्णून्बुद्ध्वा तु कुन्तीपुत्रो धनंजयः
महता शरजालेन समन्तात्पर्यवारयत्
tān utpatiṣṇūnbuddhvā tu kuntīputro dhanaṃjayaḥ
mahatā śarajālena samantātparyavārayat
- 12
ते बद्धाः शरजालेन शकुन्ता इव पञ्जरे
ववर्षुर् अर्जुनं क्रोधाद्गदाशक्त्यृष्टिवृष्टिभिः
te baddhāḥ śarajālena śakuntā iva pañjare
vavarṣur arjunaṃ krodhādgadāśaktyṛṣṭivṛṣṭibhiḥ
- 13
गदाशक्त्यसिवृष्टीस्ता निहत्य स महास्त्रवित्
गात्राणि चाहनद्भल्लैर्गन्धर्वाणां धनंजयः
gadāśaktyasivṛṣṭīstā nihatya sa mahāstravit
gātrāṇi cāhanadbhallairgandharvāṇāṃ dhanaṃjayaḥ
- 14
शिरोभिः प्रपतद्भिश्च चरणैर्बाहुभिस्तथा
अश्मवृष्टिर् इवाभाति परेषाम् अभवद्भयम्
śirobhiḥ prapatadbhiśca caraṇairbāhubhistathā
aśmavṛṣṭir ivābhāti pareṣām abhavadbhayam
- 15
ते वध्यमाना गन्धर्वाः पाण्डवेन महात्मना
भूमिष्ठम् अन्तरिक्षस्थाः शरवर्षैर् अवाकिरन्
te vadhyamānā gandharvāḥ pāṇḍavena mahātmanā
bhūmiṣṭham antarikṣasthāḥ śaravarṣair avākiran
- 16
तेषां तु शरवर्षाणि सव्यसाची परंतपः
अस्त्रैः संवार्य तेजस्वी गन्धर्वान्प्रत्यविध्यत
teṣāṃ tu śaravarṣāṇi savyasācī paraṃtapaḥ
astraiḥ saṃvārya tejasvī gandharvānpratyavidhyata
- 17
स्थूणाकर्णेन्द्रजालं च सौरं चापि तथार्जुनः
आग्नेयं चापि सौम्यं च ससर्ज कुरुनन्दनः
sthūṇākarṇendrajālaṃ ca sauraṃ cāpi tathārjunaḥ
āgneyaṃ cāpi saumyaṃ ca sasarja kurunandanaḥ
- 18
ते दह्यमाना गन्धर्वाः कुन्तीपुत्रस्य सायकैः
दैतेया इव शक्रेण विषादम् अगमन्परम्
te dahyamānā gandharvāḥ kuntīputrasya sāyakaiḥ
daiteyā iva śakreṇa viṣādam agamanparam
- 19
ऊर्ध्वम् आक्रममाणाश्च शरजालेन वारिताः
विसर्पमाणा भल्लैश्च वार्यन्ते सव्यसाचिना
ūrdhvam ākramamāṇāśca śarajālena vāritāḥ
visarpamāṇā bhallaiśca vāryante savyasācinā
- 20
गन्धर्वांस्त्रासितान्दृष्ट्वा कुन्तीपुत्रेण धीमता
चित्रसेनो गदां गृह्य सव्यसाचिनम् आद्रवत्
gandharvāṃstrāsitāndṛṣṭvā kuntīputreṇa dhīmatā
citraseno gadāṃ gṛhya savyasācinam ādravat
- 21
तस्याभिपततस्तूर्णं गदाहस्तस्य संयुगे
गदां सर्वायसीं पार्थः शरैश्चिछेद सप्तधा
tasyābhipatatastūrṇaṃ gadāhastasya saṃyuge
gadāṃ sarvāyasīṃ pārthaḥ śaraiścicheda saptadhā
- 22
स गदां बहुधा दृष्ट्वा कृत्तां बाणैस्तरस्विना
संवृत्य विद्ययात्मानं योधयामास पाण्डवम्
अस्त्राणि तस्य दिव्यानि योधयामास खे स्थितः
sa gadāṃ bahudhā dṛṣṭvā kṛttāṃ bāṇaistarasvinā
saṃvṛtya vidyayātmānaṃ yodhayāmāsa pāṇḍavam
astrāṇi tasya divyāni yodhayāmāsa khe sthitaḥ
- 23
गन्धर्वराजो बलवान्माययान्तर्हितस्तदा
अन्तर्हितं समालक्ष्य प्रहरन्तम् अथार्जुनः
ताडयामास खचरैर्दिव्यास्त्रप्रतिमन्त्रितैः
gandharvarājo balavānmāyayāntarhitastadā
antarhitaṃ samālakṣya praharantam athārjunaḥ
tāḍayāmāsa khacarairdivyāstrapratimantritaiḥ
- 24
अन्तर्धानवधं चास्य चक्रे क्रुद्धो ऽर्जुनस्तदा
शब्दवेध्यम् उपाश्रित्य बहुरूपो धनंजयः
antardhānavadhaṃ cāsya cakre kruddho 'rjunastadā
śabdavedhyam upāśritya bahurūpo dhanaṃjayaḥ
- 25
स वध्यमानस्तैर् अस्त्रैर् अर्जुनेन महात्मना
अथास्य दर्शयामास तदात्मानं प्रियः सखा
sa vadhyamānastair astrair arjunena mahātmanā
athāsya darśayāmāsa tadātmānaṃ priyaḥ sakhā
- 26
चित्रसेनम् अथालक्ष्य सखायं युधि दुर्बलम्
संजहारास्त्रम् अथ तत्प्रसृष्टं पाण्डवर्षभः
citrasenam athālakṣya sakhāyaṃ yudhi durbalam
saṃjahārāstram atha tatprasṛṣṭaṃ pāṇḍavarṣabhaḥ
- 27
दृष्ट्वा तु पाण्डवाः सर्वे संहृतास्त्रं धनंजयम्
संजह्रुः प्रद्रुतान् अश्वाञ्शरवेगान्धनूंषि च
dṛṣṭvā tu pāṇḍavāḥ sarve saṃhṛtāstraṃ dhanaṃjayam
saṃjahruḥ pradrutān aśvāñśaravegāndhanūṃṣi ca
- 28
चित्रसेनश्च भीमश्च सव्यसाची यमावपि
पृष्ट्वा कौशलम् अन्योन्यं रथेष्वेवावतस्थिरे
citrasenaśca bhīmaśca savyasācī yamāvapi
pṛṣṭvā kauśalam anyonyaṃ ratheṣvevāvatasthire

