10 shlokas
- 1
वैशम्पायन उवाच
ततो दिवाकरः प्रीतो दर्शयामास पाण्डवम्
दीप्यमानः स्ववपुषा ज्वलन्न् इव हुताशनः
vaiśampāyana uvāca
tato divākaraḥ prīto darśayāmāsa pāṇḍavam
dīpyamānaḥ svavapuṣā jvalann iva hutāśanaḥ
- 2
यत्ते ऽभिलषितं राजन्सर्वम् एतद् अवाप्स्यसि
अहम् अन्नं प्रदास्यामि सप्त पञ्च च ते समाः
yatte 'bhilaṣitaṃ rājansarvam etad avāpsyasi
aham annaṃ pradāsyāmi sapta pañca ca te samāḥ
- 3
फलमूलामिषं शाकं संस्कृतं यन्महानसे
चतुर्विधं तदन्नाद्यम् अक्षय्यं ते भविष्यति
धनं च विविधं तुभ्यम् इत्य् उक्त्वान्तरधीयत
phalamūlāmiṣaṃ śākaṃ saṃskṛtaṃ yanmahānase
caturvidhaṃ tadannādyam akṣayyaṃ te bhaviṣyati
dhanaṃ ca vividhaṃ tubhyam ity uktvāntaradhīyata
- 4
लब्ध्वा वरं तु कौन्तेयो जलाद् उत्तीर्य धर्मवित्
जग्राह पादौ धौम्यस्य भ्रातॄंश्चास्वजताच्युतः
labdhvā varaṃ tu kaunteyo jalād uttīrya dharmavit
jagrāha pādau dhaumyasya bhrātṝṃścāsvajatācyutaḥ
- 5
द्रौपद्या सह संगम्य पश्यमानो ऽभ्ययात्प्रभुः
महानसे तदान्नं तु साधयामास पाण्डवः
draupadyā saha saṃgamya paśyamāno 'bhyayātprabhuḥ
mahānase tadānnaṃ tu sādhayāmāsa pāṇḍavaḥ
- 6
संस्कृतं प्रसवं याति वन्यम् अन्नं चतुर्विधम्
अक्षय्यं वर्धते चान्नं तेन भोजयते द्विजान्
saṃskṛtaṃ prasavaṃ yāti vanyam annaṃ caturvidham
akṣayyaṃ vardhate cānnaṃ tena bhojayate dvijān
- 7
भुक्तवत्सु च विप्रेषु भोजयित्वानुजान् अपि
शेषं विघससंज्ञं तु पश्चाद्भुङ्क्ते युधिष्ठिरः
युधिष्ठिरं भोजयित्वा शेषम् अश्नाति पार्षती
bhuktavatsu ca vipreṣu bhojayitvānujān api
śeṣaṃ vighasasaṃjñaṃ tu paścādbhuṅkte yudhiṣṭhiraḥ
yudhiṣṭhiraṃ bhojayitvā śeṣam aśnāti pārṣatī
- 8
एवं दिवाकरात्प्राप्य दिवाकरसमद्युतिः
कामान्मनोऽभिलषितान्ब्राह्मणेभ्यो ददौ प्रभुः
evaṃ divākarātprāpya divākarasamadyutiḥ
kāmānmano'bhilaṣitānbrāhmaṇebhyo dadau prabhuḥ
- 9
पुरोहितपुरोगाश्च तिथिनक्षत्रपर्वसु
यज्ञियार्थाः प्रवर्तन्ते विधिमन्त्रप्रमाणतः
purohitapurogāśca tithinakṣatraparvasu
yajñiyārthāḥ pravartante vidhimantrapramāṇataḥ
- 10
ततः कृतस्वस्त्ययना धौम्येन सह पाण्डवाः
द्विजसंघैः परिवृताः प्रययुः काम्यकं वनम्
tataḥ kṛtasvastyayanā dhaumyena saha pāṇḍavāḥ
dvijasaṃghaiḥ parivṛtāḥ prayayuḥ kāmyakaṃ vanam

