32 shlokas
- 1
वैशम्पायन उवाच
स ददर्श पुरीं रम्यां सिद्धचारणसेविताम्
सर्वर्तुकुसुमैः पुण्यैः पादपैर् उपशोभिताम्
vaiśampāyana uvāca
sa dadarśa purīṃ ramyāṃ siddhacāraṇasevitām
sarvartukusumaiḥ puṇyaiḥ pādapair upaśobhitām
- 2
तत्र सौगन्धिकानां स द्रुमाणां पुण्यगन्धिनाम्
उपवीज्यमानो मिश्रेण वायुना पुण्यगन्धिना
tatra saugandhikānāṃ sa drumāṇāṃ puṇyagandhinām
upavījyamāno miśreṇa vāyunā puṇyagandhinā
- 3
नन्दनं च वनं दिव्यम् अप्सरोगणसेवितम्
ददर्श दिव्यकुसुमैर् आह्वयद्भिर् इव द्रुमैः
nandanaṃ ca vanaṃ divyam apsarogaṇasevitam
dadarśa divyakusumair āhvayadbhir iva drumaiḥ
- 4
नातप्ततपसा शक्यो द्रष्टुं नानाहिताग्निना
स लोकः पुण्यकर्तॄणां नापि युद्धपराङ्मुखैः
nātaptatapasā śakyo draṣṭuṃ nānāhitāgninā
sa lokaḥ puṇyakartṝṇāṃ nāpi yuddhaparāṅmukhaiḥ
- 5
नायज्वभिर्नानृतकैर्न वेदश्रुतिवर्जितैः
नानाप्लुताङ्गैस्तीर्थेषु यज्ञदानबहिष्कृतैः
nāyajvabhirnānṛtakairna vedaśrutivarjitaiḥ
nānāplutāṅgaistīrtheṣu yajñadānabahiṣkṛtaiḥ
- 6
नापि यज्ञहनैः क्षुद्रैर्द्रष्टुं शक्यः कथंचन
पानपैर्गुरुतल्पैश्च मांसादैर्वा दुरात्मभिः
nāpi yajñahanaiḥ kṣudrairdraṣṭuṃ śakyaḥ kathaṃcana
pānapairgurutalpaiśca māṃsādairvā durātmabhiḥ
- 7
स तद्दिव्यं वनं पश्यन्दिव्यगीतनिनादितम्
प्रविवेश महाबाहुः शक्रस्य दयितां पुरीम्
sa taddivyaṃ vanaṃ paśyandivyagītanināditam
praviveśa mahābāhuḥ śakrasya dayitāṃ purīm
- 8
तत्र देवविमानानि कामगानि सहस्रशः
संस्थितान्यभियातानि ददर्शायुतशस्तदा
tatra devavimānāni kāmagāni sahasraśaḥ
saṃsthitānyabhiyātāni dadarśāyutaśastadā
- 9
संस्तूयमानो गन्धर्वैर् अप्सरोभिश्च पाण्डवः
पुष्पगन्धवहैः पुण्यैर्वायुभिश्चानुवीजितः
saṃstūyamāno gandharvair apsarobhiśca pāṇḍavaḥ
puṣpagandhavahaiḥ puṇyairvāyubhiścānuvījitaḥ
- 10
ततो देवाः सगन्धर्वाः सिद्धाश्च परमर्षयः
हृष्टाः संपूजयामासुः पार्थम् अक्लिष्टकारिणम्
tato devāḥ sagandharvāḥ siddhāśca paramarṣayaḥ
hṛṣṭāḥ saṃpūjayāmāsuḥ pārtham akliṣṭakāriṇam
- 11
आशीर्वादैः स्तूयमानो दिव्यवादित्रनिस्वनैः
प्रतिपेदे महाबाहुः शङ्खदुन्दुभिनादितम्
āśīrvādaiḥ stūyamāno divyavāditranisvanaiḥ
pratipede mahābāhuḥ śaṅkhadundubhināditam
- 12
नक्षत्रमार्गं विपुलं सुरवीथीति विश्रुतम्
इन्द्राज्ञया ययौ पार्थः स्तूयमानः समन्ततः
nakṣatramārgaṃ vipulaṃ suravīthīti viśrutam
indrājñayā yayau pārthaḥ stūyamānaḥ samantataḥ
- 13
तत्र साध्यास्तथा विश्वे मरुतोऽथाश्विनावपि
आदित्या वसवो रुद्रास्तथा ब्रह्मर्षयो ऽमलाः
tatra sādhyāstathā viśve maruto'thāśvināvapi
ādityā vasavo rudrāstathā brahmarṣayo 'malāḥ
- 14
राजर्षयश्च बहवो दिलीपप्रमुखा नृपाः
तुम्बुरुर्नारदश्चैव गन्धर्वौ च हहाहुहू
rājarṣayaśca bahavo dilīpapramukhā nṛpāḥ
tumbururnāradaścaiva gandharvau ca hahāhuhū
- 15
तान्सर्वान्स समागम्य विधिवत्कुरुनन्दनः
ततो ऽपश्यद्देवराजं शतक्रतुम् अरिंदमम्
tānsarvānsa samāgamya vidhivatkurunandanaḥ
tato 'paśyaddevarājaṃ śatakratum ariṃdamam
- 16
ततः पार्थो महाबाहुर् अवतीर्य रथोत्तमात्
ददर्श साक्षाद्देवेन्द्रं पितरं पाकशासनम्
tataḥ pārtho mahābāhur avatīrya rathottamāt
dadarśa sākṣāddevendraṃ pitaraṃ pākaśāsanam
- 17
पाण्डुरेणातपत्रेण हेमदण्डेन चारुणा
दिव्यगन्धाधिवासेन व्यजनेन विधूयता
pāṇḍureṇātapatreṇa hemadaṇḍena cāruṇā
divyagandhādhivāsena vyajanena vidhūyatā
- 18
विश्वावसुप्रभृतिभिर्गन्धर्वैः स्तुतिवन्दनैः
स्तूयमानं द्विजाग्र्यैश्च ऋग्यजुःसामसंस्तवैः
viśvāvasuprabhṛtibhirgandharvaiḥ stutivandanaiḥ
stūyamānaṃ dvijāgryaiśca ṛgyajuḥsāmasaṃstavaiḥ
- 19
ततो ऽभिगम्य कौन्तेयः शिरसाभ्यनमद्बली
स चैनम् अनुवृत्ताभ्यां भुजाभ्यां प्रत्यगृह्णत
tato 'bhigamya kaunteyaḥ śirasābhyanamadbalī
sa cainam anuvṛttābhyāṃ bhujābhyāṃ pratyagṛhṇata
- 20
ततः शक्रासने पुण्ये देवराजर्षिपूजिते
शक्रः पाणौ गृहीत्वैनम् उपावेशयद् अन्तिके
tataḥ śakrāsane puṇye devarājarṣipūjite
śakraḥ pāṇau gṛhītvainam upāveśayad antike
- 21
मूर्ध्नि चैनम् उपाघ्राय देवेन्द्रः परवीरहा
अङ्कम् आरोपयामास प्रश्रयावनतं तदा
mūrdhni cainam upāghrāya devendraḥ paravīrahā
aṅkam āropayāmāsa praśrayāvanataṃ tadā
- 22
सहस्राक्षनियोगात्स पार्थः शक्रासनं तदा
अध्यक्रामद् अमेयात्मा द्वितीय इव वासवः
sahasrākṣaniyogātsa pārthaḥ śakrāsanaṃ tadā
adhyakrāmad ameyātmā dvitīya iva vāsavaḥ
- 23
ततः प्रेम्णा वृत्रशत्रुर् अर्जुनस्य शुभं मुखम्
पस्पर्श पुण्यगन्धेन करेण परिसान्त्वयन्
tataḥ premṇā vṛtraśatrur arjunasya śubhaṃ mukham
pasparśa puṇyagandhena kareṇa parisāntvayan
- 24
परिमार्जमानः शनकैर्बाहू चास्यायतौ शुभौ
ज्याशरक्षेपकठिनौ स्तम्भाविव हिरण्मयौ
parimārjamānaḥ śanakairbāhū cāsyāyatau śubhau
jyāśarakṣepakaṭhinau stambhāviva hiraṇmayau
- 25
वज्रग्रहणचिह्नेन करेण बलसूदनः
मुहुर्मुहुर्वज्रधरो बाहू संस्फालयञ्शनैः
vajragrahaṇacihnena kareṇa balasūdanaḥ
muhurmuhurvajradharo bāhū saṃsphālayañśanaiḥ
- 26
स्मयन्न् इव गुडाकेशं प्रेक्षमाणः सहस्रदृक्
हर्षेणोत्फुल्लनयनो न चातृप्यत वृत्रहा
smayann iva guḍākeśaṃ prekṣamāṇaḥ sahasradṛk
harṣeṇotphullanayano na cātṛpyata vṛtrahā
- 27
एकासनोपविष्टौ तौ शोभयांचक्रतुः सभाम्
सूर्याचन्द्रमसौ व्योम्नि चतुर्दश्याम् इवोदितौ
ekāsanopaviṣṭau tau śobhayāṃcakratuḥ sabhām
sūryācandramasau vyomni caturdaśyām ivoditau
- 28
तत्र स्म गाथा गायन्ति साम्ना परमवल्गुना
गन्धर्वास्तुम्बुरुश्रेष्ठाः कुशला गीतसामसु
tatra sma gāthā gāyanti sāmnā paramavalgunā
gandharvāstumburuśreṣṭhāḥ kuśalā gītasāmasu
- 29
घृताची मेनका रम्भा पूर्वचित्तिः स्वयम्प्रभा
उर्वशी मिश्रकेशी च डुण्डुर्गौरी वरूथिनी
ghṛtācī menakā rambhā pūrvacittiḥ svayamprabhā
urvaśī miśrakeśī ca ḍuṇḍurgaurī varūthinī
- 30
गोपाली सहजन्या च कुम्भयोनिः प्रजागरा
चित्रसेना चित्रलेखा सहा च मधुरस्वरा
gopālī sahajanyā ca kumbhayoniḥ prajāgarā
citrasenā citralekhā sahā ca madhurasvarā

